Nganea 63: Khosi yo Thanyaho Salomo
Salomo o vha a tshee muswa musi a tshi vha khosi. O vha a tshi funa Yehova, nahone o tevhela ngeletshedzo yavhuḓi ye khotsi awe Davida a mu fha. Yehova o takadzwa nga Salomo, ngauralo vhuṅwe vhusiku a ri khae muḽoroni: ‘Salomo, u ṱoḓa ndi tshi u fha mini?’
Salomo a fhindula: ‘Yehova Mudzimu wanga, ndi muṱuku nga maanḓa nahone thi koni u vhusa. Ngauralo mphe vhuṱali ha u vhusa vhathu vhau nga nḓila yo fanelaho.’
Yehova a takadzwa nga zwe Salomo a humbela. Ngauralo a ri: ‘Ngauri wo humbela vhuṱali hu si vhutshilo vhulapfu kana lupfumo, ndi ḓo u fha vhuṱali vhu fhiraho ha vhoṱhe. Fhedzi ndi ḓo u fha na zwe wa si humbele, lupfumo na u khoḓiwa.’
Nga murahunyana ha ḓa vhasadzi vhavhili kha Salomo vhe na khakhathi i konḓaho. Muṅwe wavho a ṱalutshedza: ‘Hoyu musadzi na nṋe ri dzula nḓuni nthihi. Ndo beba mutukana, na ene a beba ṅwana wa mutukana nga murahu ha maḓuvha mavhili. Vhuṅwe vhusiku ṅwana wawe a fa. Fhedzi musi nṋe ndo eḓela, a vhea ṅwana wawe o faho tsini hanga a dzhia ṅwananga. Musi ndi tshi vuwa ndi tshi sedza ṅwana o faho, nda zwi vhona uri a si wanga.’
Zwenezwo muṅwe musadzi a ri: ‘Hai! Ṅwana a tshilaho ndi wanga, o faho ndi wawe!’ Musadzi wa u thoma a fhindula: ‘Hai! Ṅwana o faho ndi wau, a tshilaho ndi wanga!’ Vhasadzi vha ḓi pikisana ngauralo. Salomo o vha a tshi ḓo itani?
A ri hu ḓe banga, nahone, musi ḽo ḓiswa, a ri: ‘Pharulani ṅwana a tshilaho nga vhukati, ni fhe muṅwe na muṅwe hafu yawe.’
Mme wa vhukuma a lila: ‘Hai! U songo vhulaha ṅwana nandi. Mu fhe ene!’ Fhedzi muṅwe musadzi a ri: ‘U songo mu fha muṅwe washu; mu fhandule nga vhukati.’
Mafheleloni Salomo a amba: ‘U songo vhulaha ṅwana! Mu fhe musadzi wa u thoma. Ndi mme wa vhukuma!’ Salomo o ḓivha izwi ngauri mme wa vhukuma a funesa ṅwana lune a tenda u mu fha muṅwe musadzi uri a si vhulawe. Musi vhathu vha tshi pfa uri Salomo o fhedza hani khakhathi, vha takala u vha na khosi yo thanyaho ngauralo.
Vhukati ha u vhusa ha Salomo, Mudzimu a fhaṱutshedza vhathu nga u ita uri mavu a melise goroi nnzhi na mavhele, nḓirivhe na mahuyu na zwiṅwe zwiḽiwa. Vhathu vho vha vha tshi ambara zwiambaro zwavhuḓi nahone vho vha vha tshi dzula nḓuni dzavhuḓi.
1 Dzikhosi 3:3-28; 4:29-34.
Mbudziso
- Yehova o vhudza Salomo mini, nahone o fhindula hani?
- Nge a takadzwa nga zwe Salomo a zwi humbela, Yehova o mu fulufhedzisa u mu ṋea mini?
- Ndi khakhathi ifhio i konḓaho ye vhasadzi vhavhili vha i ḓisa kha Salomo?
- Samusi ni tshi khou zwi vhona kha tshifanyiso, Salomo o piringulula hani vhuleme?
- Vhuvhusi ha Salomo ho vha vhu hani, nahone ndi ngani?
Mbudziso dzo engedzeaho
- Vhalani 1 Dzikhosi 3:3-28.
Vhanna vha re na vhuḓifhinduleli ndanguloni ya Mudzimu ṋamusi vha nga guda mini kha maipfi a Salomo a bvaho mbiluni a re kha 1 Dzikhosi 3:7? (Ps. 119:105; Mir. 3:5, 6)
Khumbelo ya Salomo ndi tsumbo yavhuḓi hani ya zwithu zwo teaho zwine ra nga zwi rabelela? (1 Dzikh. 3:9, 11; Mir. 30:8, 9; 1 Yoh. 5:14)
U dzudzanya ha Salomo khakhathi vhukati ha vhasadzi vhavhili zwi ri ṋea fulufhelo ḽifhio malugana na vhuvhusi ha tshifhingani tshi ḓaho ha Salomo Muhulwane, Yesu Kristo? (1 Dzikh. 3:28; Yes. 9:6, 7; 11:2-4)
- Vhalani 1 Dzikhosi 4:29-34.
Yehova o aravha hani khumbelo ya Salomo ya mbilu yavhuḓi? (1 Dzikh. 4:29)
Nga ṅwambo wa vhuḓidini ho itwaho nga vhathu u itela u pfa vhuṱali ha Salomo, mavhonele ashu a fanela u vha afhio malugana na u guda Ipfi ḽa Mudzimu? (1 Dzikh. 4:29, 34; Yoh. 17:3; 2 Tim. 3:16)
