Nganea 65: Muvhuso u a Fhandekana
Ni a ḓivha uri ndi ngani uyu munna a tshi khou kherula nguvho yawe ya vha zwipiḓa? Yehova o mu vhudza uri a zwi ite. Uyu munna ndi Ahia muporofita wa Mudzimu. Muporofita ndi muthu ane Mudzimu a mu vhudza zwine zwa ḓo itea.
Ahia afha u khou amba na Yerobeamu. Yerobeamu o vha e munna we Salomo a mu vhea muhulwane wa u ita muṅwe wa mushumo wawe wa u fhaṱa. Musi Ahia a tshi ṱangana na Yerobeamu afha nḓilani, a bvula nguvho ntswa ye a vha o ambara a i kherula ya vha zwipiḓa zwa 12. A vhudza Yerobeamu: ‘Ḓidzhiele zwipiḓa zwa 10.’ Ni a ḓivha uri ndi ngani o mu fha zwipiḓa zwa 10?
Ahia o ṱalutshedza uri Yehova o vha a tshi ḓo dzhiela Salomo muvhuso. A ri Yehova o vha a tshi ḓo fha Yerobeamu tshaka dza 10. Izwi zwa amba uri tshaka mbili fhedzi dzo vha dzi tshi ḓo sielwa Rehabeamu murwa wa Salomo uri a dzi vhuse.
Musi Salomo a tshi pfa zwe Ahia a vhudza Yerobeamu, a sinyuwa zwihulu. A lingedza u vhulaha Yerobeamu. Fhedzi Yerobeamu a shavhela Egipita. Nga murahunyana Salomo a fa. O vha khosi miṅwaha ya 40, fhedzi zwenezwo murwa wawe Rehabeamu a itwa khosi. Yerobeamu a pfa uri Salomo o fa, a vhuya Isiraele.
Rehabeamu o vha a si khosi yavhuḓi. O vha e na tshiṱuhu kha vhathu u fhira khotsi awe Salomo. Yerobeamu na vhaṅwe vhanna vha ḓivhaleaho vha ya kha Khosi Rehabeamu u mu humbela uri a vhe wavhuḓi kha vhathu. Fhedzi Rehabeamu a si thetshelese. A vha na tshiṱuhu u fhirisa. Ngauralo vhathu vha ita Yerobeamu khosi kha tshaka dza 10, fhedzi tshaka mbili dza Benyamini na Yuda dza litsha Rehabeamu e khosi yadzo.
Yerobeamu o vha a sa ṱoḓi uri vhathu vhawe vha ye Yerusalema u rabela thembeleni ya Yehova. Ngauralo a ita ṋamana mbili dza musuku a ita uri vhathu vha muvhuso wa tshaka dza 10 vha dzi rabele. Nga u ṱavhanya shango ḽa ḓala vhupfukamulayo na vhuvemu.
Ho vha na khombo hafhu muvhusoni wa tshaka mbili. Miṅwaha i re fhasi ha miṱanu Rehabeamu o no vha khosi, khosi ya Egipita ya ḓa u lwa na Yerusalema. Ya dzhia lupfumo lunzhi thembeleni ya Yehova. Ngauralo ho vha na tshifhinga tshipfufhi fhedzi he thembele ya dzula i tshi fana na musi i tshi fhaṱiwa.
1 Dzikhosi 11:26-43; 12:1-33; 14:21-31.
Mbudziso
- Vhanna avha vha re kha tshifanyiso ndi vhonnyi?
- Ahia u ita mini nga nguvho ye a vha o i ambara, nahone wonoyo musumbedzo u imela mini?
- Salomo o lingedza u ita mini kha Yerobeamu?
- Ndi ngani vhathu vho vhea Yerobeamu uri a vhe khosi ya tshaka dza fumi?
- Ndi ngani Yerobeamu o ita ṋamana mbili dza musuku, nahone ho itea mini kha ḽeneḽo shango nga murahu a zwenezwo?
- Ho itea mini kha tshaka mbili dza muvhuso na kha thembele ngei Yerusalema?
Mbudziso dzo engedzeaho
- Vhalani 1 Dzikhosi 11:26-43.
Yerobeamu o vha e muthu wa mufuda-ḓe, nahone Yehova o mu fulufhedzisa mini arali a vhulunga milayo Yawe? (1 Dzikh. 11:28, 38)
- Vhalani 1 Dzikhosi 12:1-33.
Kha tsumbo mmbi ya Yerobeamu, vhabebi na vhahulwane vha nga guda mini malugana na u shumisa luvhi maanḓa? (1 Dzikh. 12:13; Muh. 7:7; 1 Pet. 5:2, 3)
Ṋamusi vhaswa vha fanela u ya kha vhafhio u itela vhulivhisi havhuḓi musi vha tshi ita phetho khulwane vhutshiloni? (1 Dzikh. 12:6, 7; Mir. 1:8, 9; 2 Tim. 3:16, 17; Vha-Heb. 13:7)
Ndi mini zwe zwa ṱuṱuwedza Yerobeamu uri a ite fhethu huvhili ha u gwadamela ṋamana, nahone zwenezwi zwi sumbedza hani u sa vha na lutendo kha Yehova? (1 Dzikh. 11:37; 12:26-28)
Ndi nnyi we a ranga phanḓa vhathu vha muvhuso wa tshaka dza fumi uri vha shandukele vhurabeli ha ngoho? (1 Dzikh. 12:32, 33)
