Vhonani munna a re maḓini. U khomboni khulu, a si zwone? Khovhe iyo i ṱoḓou mu mila! Ni a ḓivha uri uyu munna ndi nnyi? Dzina ḽawe ndi Yona. Kha ri vhone uri o dzhena hani khomboni khulu ngaurali.

Yona o vha e muporofita wa Yehova. Tsho vha tshi si tshifhinga tshilapfu muporofita Elisa o no fa he Yehova a vhudza Yona: Ìya muḓini muhulu wa Ninive. Vhuvhi ha vhathu henengei ndi vhuhulu, nahone ndi ṱoḓa uri u vha vhudze nga haho.’

Fhedzi Yona o vha a sa ṱoḓi u ya. Ngauralo a namela gungwa ḽe ḽa vha ḽi sa yi Ninive. Yehova a si takadzwe nga Yona ngauri a shavha. Ngauralo A ita maḓumbu mahulu. Zwa vhifha lwe gungwa ḽa vha khomboni ya u nupela maḓini. Vhatshimbidzi vha ofha zwihulu lwe vha lilela midzimu yavho uri i vha thuse.

Mafheleloni Yona a vha vhudza: ‘Ndi rabela Yehova, Mudzimu o itaho ḽiṱaḓulu na ḽifhasi. Ndi khou shavha u ita zwe Yehova a ri ndi zwi ite.’ Vhatshimbidzi vha vhudzisa: ‘Ri iteni nga iwe uri ri imise maḓumbu?’

Yona a ri: ‘Mposeni lwanzheni, lu ḓo dovha lwa dzika.’ Vhatshimbidzi vho vha vha sa funi u zwi ita, fhedzi musi maḓumbu a tshi ṋaṋa, vha vhuya vha posa Yona maḓini. Nga u ṱavhanya maḓumbu a ima, na lwanzhe lwa dovha lwa dzika.

Musi Yona a tshi tsela fhasi maḓini, khovhe khulu ya mu mila. Fhedzi a si fe. maḓuvha mararu na vhusiku vhuraru o vha e thumbuni ya khovhe. Yona a ḓisola zwihulu nge a si thetshelese Yehova a ya Ninive. Ni a ḓivha uri a ita mini?

Yona a rabela Yehova uri a mu thuse. Zwenezwo Yehova a ita uri khovhe i ṱanzele Yona kha shango ḽo omaho. Nga murahu ha henefho Yona a ya Ninive. Naa izwi a zwi ri funzi uri ndi zwihulwane hani u ita zwoṱhe zwine Yehova a amba?

Bugu ya Bivhili ya Yona.