Ho vha ho no fhira miṅwaha ya 10 tshee Khosi Nebukadanetsara a dzhia Vhaisiraele vho funzeaho zwihulu a vha isa Babele. Zwino vhonani Yerusalema u khou fhiswa! Vhaisiraele vhe vha si vhulawe vha khou iswa Babele sa zwivhotshwa.

Humbulani, izwi ndi zwe vhaporofita vha Yehova vha sevha uri zwo vha zwi tshi ḓo itea arali vhathu vha sa shandula nḓila dzavho mmbi. Fhedzi Vhaisiraele vha si thetshelese vhaporofita. Vha ḓi rabela midzimu i sili. Ngauralo vhathu vha fanela u ṱarafiwa. Izwi ri zwi ḓivha ngauri muporofita wa Mudzimu Hesekiele u a ri vhudza zwithu zwivhi zwe vha vha vha tshi khou ita.

Ni a ḓivha uri Hesekiele o vha e nnyi? O vha e muṅwe wa vhaṱhannga vhe Khosi Nebukadanetsara a vha isa Babele hu fhiraho miṅwaha ya 10 hu sa athu u vha na uhu u fheliswa ha Yerusalema. Daniele na khonani dzawe tharu, Sadaraka, Mesaka na Abedenego, na vhone vho iswa Babele nga tshifhinga tshi fanaho.

Musi Hesekiele a tshee Babele, Yehova a mu sumbedza zwithu zwivhi zwe zwa vha zwi tshi khou itea thembeleni. Yehova o ita izwi nga vhuṱolo. Hesekiele o vha a tshee Babele, fhedzi Yehova a ita uri a vhone zwe zwa vha zwi tshi khou itea thembeleni. Zwe Hesekiele a zwi vhona zwo vha zwi tshi tatisa!

Yehova a vhudza Hesekiele: ‘Vhona zwithu zwi nengisaho zwine vhathu vha khou ita afha thembeleni. Vhona dzimbondo dzo ḓala zwifanyiso zwa dziṋowa na zwiṅwe zwipuka. U vhone na Vhaisiraele vha tshi khou zwi rabela!’ Hesekiele a zwi vhona izwi zwithu, nahone a ṅwala zwe zwa vha zwi tshi khou itea.

Yehova a vhudzisa Hesekiele: ‘U a vhona zwine vharangaphanḓa vha Vhaisiraele vha khou ita tshiphirini?’ Ee, a vhona vhanna vha 70, vhoṱhe vha tshi khou rabela midzimu i sili. Vha tshi khou ri: ‘Yehova ha ri vhoni. O ṱuwa shangoni.’

Zwenezwo Yehova a sumbedza Hesekiele vhasadzi khoroni ya devhula ya thembele. Vho vha vho dzula henefho vha tshi khou rabela mudzimu u sili Thamusi. Hesekiele a vhona vhanna vhane vha nga vha 25 muṋangoni wa thembele. Vho vha vho gwadama vho sedza vhubvaḓuvha vha tshi khou rabela ḓuvha!

Yehova a ri: ‘Avha vhathu a vha nṱhonifhi. A vha sokou ita zwithu zwivhi, fhedzi vha ḓa thembeleni yanga vha zwi itela hone!’ Ngauralo Yehova a fulufhedzisa: ‘Vha ḓo pfa maanḓa a vhuhali hanga. A thi nga vha pfeli vhuṱungu vha tshi fheliswa.’

Ho vha miṅwaha miraru fhedzi nga murahu Yehova o sumbedza Hesekiele zwithu izwi he Vhaisiraele vha shandukela Khosi Nebukadanetsara. Ngauralo a ya a vha lwisa. Nga murahu ha ṅwaha na hafu Vhababele vha pwasha mbondo dza Yerusalema vha dzhena vha fhisa muḓi u swika fhasi. Vhunzhi ha vhathu vha vhulawa kana u iswa Babele sa zwivhotshwa.

Ndi ngani Yehova o tendela uri uhu u fheliswa hu ofhisaho hu itee kha Vhaisiraele? Ee, ngauri a vho ngo thetshelesa Yehova nahone a vho ngo thetshelesa milayo yawe. Izwi zwi sumbedza uri ndi zwihulwane hani nga riṋe u ita zwine Yehova a amba.

U thomani vhathu vha si vhanzhi vho tendelwa u dzula shangoni ḽa Isiraele. Nebukadanetsara a vhea Muyuda a no pfi Gedalia uri a vhe muhulwane wa avha vhathu. Fhedzi vhaṅwe Vhaisiraele vha vhulaha Gedalia. Zwenezwo vhathu vha ofha uri Vhababele vha ḓo vhuya vha vha vhulaha. Ngauralo vha kombetshedza Yeremia uri a ṱuwe navho, vha shavhela Egipita.

Izwi zwa sia shango ḽa Isiraele ḽi si na muthu na muthihi. Miṅwaha ya 70 ho vha hu si na a dzulaho shangoni. Fhedzi Yehova a fulufhedzisa uri u ḓo vhuisa vhathu vhawe nga murahu ha miṅwaha ya 70. Nga itshi tshifhinga, ho vha hu tshi khou iteani kha vhathu vha Mudzimu Babele he vha iswa hone? Kha ri vhone.

2 Dzikhosi 25:1-26; Yeremia 29:10; Hesekiele 1:1-3; 8:1-18.