Hu Khou iteani afha? Vhathu vha na tshimima tshihulu. Khosi ya Babele yo vha yo ramba vhaeni vha ḓivhaleaho vha gidi. Vho vha vha tshi khou shumisa zwinwelo zwa tsimbitseṱha na zwa musuku na midzio zwo dzhiiwaho thembeleni ya Yehova Yerusalema. Fhedzi, nga u ṱavhavhanya, miṅwe ya tshanḓa tsha muthu ya bvelela muyani ya thoma ṅwala kha luvhondo. Vhoṱhe vha tshuwa.

Belesatsara, muḓuhulu wa Nebukadanetsara, o vha e khosi zwenezwo. A vhidzelela uri hu ḓiswe vhaṱali vhawe. Khosi ya ri: Àne a nga vhala muṅwalo a mmbudza zwine wa amba, u ḓo fhiwa zwifhiwa zwinzhi nahone a itwa muvhusi wa vhuraru u ḓivhaleaho muvhusoni.’ Fhedzi ho vha hu si na muṱali we a vha a tshi nga kona u vhala muṅwalo a re kha luvhondo, kana a amba zwine wa amba.

Mme a khosi a pfa phosho a ḓa nḓuni khulwane ya u ḽela. A vhudza khosi: ‘U songo ofha. Hu na munna muvhusoni wau a ḓivhaho midzimu mikhethwa. Musi makhulu wau Nebukadanetsara e khosi o mu ita muhulwane wa vhaṱali vhawe vhoṱhe. Dzina ḽawe ndi Daniele. Mu vhidze, u ḓo u vhudza uri zwi amba mini.’

Daniele a ḓiswa nga u ṱavhanya. O no hana u dzhia zwifhiwa, Daniele a thoma u amba ndi ngani Yehova o vhuya a bvisa makhulu wa Belesatsara, Nebukadanetsara kha uvha khosi. Daniele a ri: ‘O vha a tshi ḓikukumusa, Yehova a mu ṱarafa.’

Daniele a vhudza Belesatsara: ‘Fhedzi iwe, wo ḓivha zwoṱhe zwe zwa itea khae, nahone u kha ḓi ḓikukumusa u fana na Nebukadanetsara. Wo ḓisa zwinwelo na midzio zwi tshi bva thembeleni ya Yehova wa nwa ngazwo. Wo renda midzimu yo itwaho nga thanda na tombo, a wo ngo renda Musiki washu Muhulwane. Ndi nga hone Mudzimu o rumela tshanḓa uri tshi ṅwale maipfi

Daniele a ri: ‘Ho ṅwalwa hezwi: MENE, MENE, TEKEL na UPHARSIN.’

‘MENE zwi amba uri Mudzimu o vhala maḓuvha a muvhuso wau a u tumula. TEKEL zwi amba uri wo elwa kha tshikalo wa wanala u songo luga. UPHARSIN zwi amba uri muvhuso wau wo ṋewa Vhameda na Vhaperesia.’

Ndi ra na musi Daniele a tshi khou amba, Vhameda na Vhaperesia vho vha vho no thoma a vutshela Babele. Vha thuba muḓi vha vhulaha Belesatsara. Muṅwalo wa kha luvhondo wo vha wa ngoho vhusiku honoho! Fhedzi ho vha hu tshi ḓo itea mini kha Vhaisiraele zwino? Ri ḓo zwi wana nga u ṱavhanya, fhedzi kha ri thome u vhona uri ho iteani kha Daniele.

Daniele 5:1-31.