Miṅwaha i ṱoḓaho u vha mivhili yo vha yo no fhira u bva tshee Babele ḽa thubiwa nga Vhameda na Vhaperesia. Vhonani zwine zwa khou itea zwino! Ee, Vhaisiraele vha khou ṱuwa Babele. Vho vhofholowa hani? Ndi nnyi o vha litshaho vha ṱuwa?

O vha e Korese, khosi ya Peresia. Tshifhinga tshilapfu Korese a sa athu bebwa, Yehova o ita uri muporofita wawe Yesaya a ṅwale nga hae: ‘U ḓo ita zwine nda ṱoḓa uri u zwi ite. Dzikhoro dzi ḓo vulelwa iwe uri u thube muḓi.’ Nahone Korese o ḓi ranga phanḓa kha u thuba Babele. Vhameda na Vhaperesia vho ḓa muḓini vhusiku nga dzikhoro dze dza siiwa dzo vulea.

Fhedzi Yesaya muporofita wa Yehova o dovha a ri Korese o vha a tshi ḓo laya uri Yerusalema na thembele yawo zwi dovhe zwi fhaṱwe. Naa Korese o ṋea uyu mulayo? Ee. Khezwi zwe Korese a vhudza Vhaisiraele: ‘Ṱuwani, zwino, ni ye Yerusalema ni fhaṱe thembele ya Yehova, Mudzimu waṋu.’ Ndi zwine avha Vhaisiraele vha khou ya u zwi ita.

Fhedzi a si Vhaisiraele vhoṱhe vhe vha kona u fara lwendo lwa u vhuelela Yerusalema. Lwo vha lu lwendo lulapfulapfu lwa kilometere dza 800 nahone vhanzhi vho vha vho hulesa kana u lwalesa uri vha nga ya kule ngauralo. Ho vha hu na zwiṅwe zwo itaho uri vhaṅwe vha si ṱuwe. Fhedzi Korese a ri kha vha sa ṱuwi: Ìfhani tsimbitseṱha na musuku na dziṅwe mpho vhathu vhane vha khou ya u fhaṱa Yerusalema na thembele yawo.’

Ngauralo, mpho nnzhi dza fhiwa avha Vhaisiraele vhe vha vha vhe nḓilani yavho ya u ya Yerusalema. Hafhu, Korese a vha fha midzio na zwinwelo zwe Khosi Nebukadanetsara a vha o zwi dzhia thembeleni ya Yehova musi a tshi fhelisa Yerusalema. Vhathu vho vha vhe na zwithu zwinzhi zwa u huma nazwo.

Nga murahu ha miṅwedzi i ṱoḓaho u vha miṋa ya u tshimbila, Vhaisiraele vha swika Yerusalema nga tshifhinga. Yo vha i miṅwaha ya 70 tshee muḓi wa fheliswa, shango ḽo siiwa ḽi si na muthu. Fhedzi naho vho vhuya shangoni ḽavho, vho vha vha tshi ḓo vha na zwifhinga zwi konḓaho, samusi ri tshi ḓo guda.

Yesaya 44:28; 45:1-4; Esera 1:1-11.