Kha ri vhuelele murahu miṅwahani i si minzhi Esera a sa athu u ya Yerusalema. Maradokai na Esitere vho vha vhe Vhaisiraele vha ḓivhaleaho muvhusoni wa Peresia. Esitere o vha e mufumakadzi, muzwala wawe Maradokai e wa vhuvhili kha khosi nga maanḓa. Kha ri vhone uri izwi zwo itea hani.

Vhabebi vha Esitere vho vha vho fa a tshee muṱuku-ṱuku, ngauralo Maradokai a mu alusa. Ahasiverosi, khosi ya Peresia, o vha e na pfamo muḓini wa Susani, Maradokai e muṅwe wa vhaḓinḓa vhawe. Ḽiṅwe ḓuvha Vasithi musadzi wa khosi a si mu thetshelese, ngauralo khosi ya nanga Esitere wa u naka uri a vhe mufumakadzi wayo. Esitere o vha a tshee muswa.

Ni a mu vhona munna a ḓikukumusaho ane vhathu vha khou mu gwadamela? Ndi Hamani. O vha e munna a ḓivhaleaho Peresia. Hamani o ṱoḓa uri Maradokai, ane na nga mu vhona o dzula afha, na ene a mu gwadamele. Fhedzi Maradokai a si zwi ite. O vha a sa humbuli uri zwo vha zwo fanela u gwadamela munna muvhi ngauralo. Izwi zwa sinyusa Hamani. Ngauralo a ita hezwi.

Hamani a vhudza khosi mazwifhi nga ha Vhaisiraele. A ri: ‘Ndi vhathu vhavhi vha sa thetshelesi milayo yau. Vha fanela u vhulawa.’ Ahasiverosi o vha a sa zwi ḓivhi uri musadzi wawe Esitere ndi Muisiraele. Ngauralo a thetshelesa Hamani, a tendela mulayo wa uri nga ḓuvha ḽiṅwe-vho Vhaisiraele vha vhulawe.

Musi Maradokai a tshi pfa nga ha mulayo, a dinalea zwihulu. A rumela ndaela kha Esitere: ‘U fanela u vhudza khosi, u mu humbele uri a ri tshidze.’ Ho vha hu u pfuka mulayo Peresia u vhona khosi ni songo rambiwa. Fhedzi Esitere a dzhena a songo rambiwa. Khosi ya mu sumba nga lubaḓa lwayo lwa musuku, zwe zwa amba uri o vha a sa nga vhulawi. Esitere a rambela khosi na Hamani zwiḽiwani zwihulu. Henengei khosi ya vhudzisa Esitere uri o vha a tshi ṱoḓa i tshi mu itela mini. Esitere a ri o vha a tshi ḓo mu vhudza arali ene na Hamani vha ḓa zwiḽiwani nga ḓuvha ḽi tevhelaho.

Zwiḽiwani zwenezwo Esitere a vhudza khosi: ‘Vhathu vhahashu na nṋe ri ḓo vhulawa.’ Khosi ya vhudzisa yo sinyuwa: ‘Ndi nnyi a ṱoḓaho u ita tshithu tsho raloho?’

Esitere a ri: ‘Swina, ndi hoyu munna muvhi Hamani!’

Khosi ya sinyuwa vhukuma. Ya laya uri Hamani a vhulawe. Nga murahu, ya ita uri Maradokai a vhe wa vhuvhili khayo nga maanḓa. Maradokai a ita uri hu itwe mulayo muswa we wa tendela Vhaisiraele u lwela vhutshilo havho nga ḓuvha ḽe ha pfi vho vha vha tshi ḓo vhulawa ngaḽo. Vhathu vhanzhi vha thusa Vhaisiraele,nahone vha tshidzwa kha maswina avho.

Bugu ya Bivhili ya Esitere.