Muruṅwa Gabriele o ruṅwa kha musidzana wavhuḓi a no pfi Maria. A mu vhudza uri o vha a tshi ḓo vha na ṅwana ane a ḓo vhusa sa khosi nga hu sa fheli. Ṅwana, Yesu, o bebelwa dangani, he vhalisa vha mu dalela hone. Nga murahu, ṋaledzi ya tshimbidza vhanna vha bvaho Vhubvaḓuvha ya vha isa ṅwanani muṱuku. Ri guda uri ndi nnyi o vha itaho uri vha vhone iyo ṋaledzi, na uri Yesu o tshidzwa hani kha vhuḓidini ha u mu vhulaha.

Zwi tevhelaho, ri wana Yesu, musi e na miṅwaha ya 12, a tshi khou amba na vhafunzi thembeleni. Miṅwaha ya fumi malo nga murahu Yesu a lovhedzwa, nahone zwenezwo a thoma mushumo wa u ṱanziela nga Muvhuso na u funza we Yehova a mu rumela u u ita kha ḽifhasi. Yesu a nanga vhanna vha 12 uri vha mu thuse kha uyu mushumo, a vha ita vhaapostola vhawe.

Yesu o ita vhuṱolo vhunzhi. O fusha vha zwigidi nga khovhe ṱhuku dzi si nnzhi na ḽofo dzi si nnzhi dza vhurotho. O fhodza vha lwalaho a ita na u vusa vhafu. Mafheleloni, ri guda nga ha zwithu zwinzhi zwe zwa itea kha Yesu vhukatini ha ḓuvha ḽa u fhedza ḽa vhutshilo hawe, na uri o vhulawa hani. Yesu o ṱanziela miṅwaha i ṱoḓaho u vha miraru na hafu, ngauralo tshipiḓa tsha 6 tshi putela tshifhinga tsha miṅwaha i fhiraho 34 zwiṱukuṱuku.