Vhonani mutukana muṱuku a khou ambaho na avha vhanna vhahulwane. Ndi vhafunzi vha thembeleni ya Yerusalema. Mutukana ndi Yesu. O vha o no aluwanyana. Zwino o vha e na miṅwaha ya 12.

Vhafunzi vho vha vho mangadzwa nga uri Yesu o vha a tshi ḓivha zwinzhi nga ha Mudzimu na zwithu zwo ṅwalwaho Bivhilini. Fhedzi ndi ngani Yosefa na Maria vhe siho. Vho vha vhe ngafhi?

Ṅwaha muṅwe na muṅwe Yosefa o vha a tshi ḓisa muṱa wawe Yerusalema u itela tshimima tsha Paseka. Lwo vha lu lwendo lulapfu u bva Nazareta u ya Yerusalema. Ho vha hu si na mimoḓoro na zwidimela. Vhanzhi vho vha vha tshi tou tshimbila, nahone zwi tshi vha dzhiela maḓuvha mararu u swika Yerusalema.

Yosefa o vha o no vha na muṱa muhulu. Zwino, uyo ṅwaha Yosefa na Maria vho vha vho ṱuwa na vhana vhavho kha lwendo lulapfu lwa u vhuelela hayani Nazareta. Vho vha vha tshi humbula uri Yesu u khou tshimbila na vhaṅwe. Fhedzi musi vha tshi ima ḽi tshi kovhela, vha si wane Yesu. Vha mu ṱoḓa kha mashaka na dzikhonani, fhedzi o vha a si navho! Ngauralo vha vhuelela Yerusalema u mu ṱoḓa henengei.

Vha vhuya vha wana Yesu afha e na vhafunzi, a tshi khou vha thetshelesa a tshi vhudzisa. Vhoṱhe vha mangadzwa nga nḓila ye Yesu a vha o thanya ngayo. Fhedzi Maria a ri: ‘Ṅwana, wo ri itelani izwi? Khotsi au na nṋe ro vha ri tshi khou u ṱoḓa.’

Yesu a fhindula: ‘No nṱoḓelani? No vha ni sa zwi ḓivhi uri ndo vha ndo fanela u vha nḓuni ya Khotsi anga?’

Ee, Yesu o vha a tshi funa he a vha a tshi nga guda nga ha Yehova. Naa na rine a ro ngo fanela u ḓipfa ngauralo? Hayani Nazareta, Yesu o vha a tshi ya miṱanganoni ya vhurabeli dzivhege dzoṱhe. Ngauri o vha a tshi thetshelesa, o guda zwinzhi Bivhilini. Kha ri fane na Yesu ri tevhele tsumbedzo yawe.

Luka 2:41-52; Mateo 13:53-56.