Tshifhinga tshipfufhi o no fhodza vhahumbeli vhavhili vha mabofu, Yesu a ḓa muḓini muṱuku tsini ha Yerusalema. A vhudza vhafunziwa vhawe vhavhili: Ìyani muḓini ni ḓo wana mbongola ṱhukhu. Ni i vhofholole ni i ḓise kha nṋe.’

Musi mbongola yo ḓiswa kha Yesu, a dzula khayo a ya Yerusalema. Musi a tshi sendela tsini na muḓi, ha bva gogo ḽihulu ḽa vhathu uri ḽi mu ṱanganedze. Vhunzhi havho vha bvula madzhasi avho vha a adza nḓilani. Vhaṅwe vha tshea matavhi kha miri ya mitshevho, na one vha a vhea nḓilani vha huwelela: ‘Mudzimu a fhaṱutshedze khosi i ḓaho nga dzina ḽa Yehova.’

Kale Isiraele dzikhosi ntswa dzo vha dzi tshi dzhena Yerusalema dzo namela mbongola ṱhukhu uri dzi ḓisumbedze kha vhathu. Yesu o vha a tshi khou ita zwenezwo. Avha vhathu vho vha vha tshi khou sumbedza uri vha ṱoḓa uri Yesu a vhe khosi yavho. Fhedzi a si vhoṱhe vhe vha mu ṱoḓa. Ri nga zwi vhona nga zwe zwa itea musi a tshi ya thembeleni.

Thembeleni Yesu a fhodza mabofu na zwihole. Musi vhana vhaṱuku vha tshi zwi vhona, vha renda Yesu. Fhedzi izwi zwa ita uri vhotshifhe vha sinyuwe, nahone vha vhudza Yesu: ‘U khou zwi pfa zwine vhana vha khou amba?’

Yesu a fhindula: ‘Ee, ndi khou zwi pfa. Naa a no ngo vhala Bivhilini hune ya ri: “Mudzimu u ḓo bvisa thendo milomoni ya vhana?”’ Ngauralo vhana vha ḓi renda khosi ya Mudzimu.

Ri a zwi funa u fana na avho vhana, naa a ri zwi funi? Vhaṅwe vhathu vha nga lingedza u ri litshisa u amba nga ha muvhuso wa Mudzimu. Fhedzi ri ḓo ḓi vhudza vhaṅwe nga ha zwithu zwavhuḓi zwine Yesu a ḓo zwi itela vhathu.

Tsho vha tshi si tshifhinga tsha uri Yesu a thome u vhusa sa khosi musi e kha ḽifhasi. Tshi ḓo ḓa lini? Vhafunziwa vha Yesu vho ṱoḓa u ḓivha. Ri ḓo vhala nga hazwo kha a tevhelaho.

Mateo 21:1-17; Yohane 12:12-16.