Vho no ṱuwa nḓuni ya nṱha, Yesu na vhaapostola vhawe vha ya tsimuni ya Getsemane. Zwenezwo Yesu a vha vhudza uri vha dzule vho vuwa na uri vha rabele. A ya kulenyana, a vhea tshifhaṱuwo fhasi uri a rabele.

Nga murahu Yesu a vhuya he vhaapostola vhawe vha vha vhe hone. Ni humbula uri vho vha vha tshi khou itani? Luraru Yesu a vha vhudza uri vha dzule vho vuwa, fhedzi tshifhinga nga tshithihi a tshi huma a wana vho eḓela. Yesu a tshi vhuya lwa u fhedza a ri: ‘Ni nga eḓela hani nga tshifhinga tsho tou raliho? Tshifhinga tsho swika tsha uri ndi ṋekedzwe maswina anga.’

Nga tshenetsho tshifhinga phosho ya gogo ḽihulu yo vha i tshi nga pfiwa. Vhonani! Vhanna vho vha vha tshi khou ḓa vhe na mabanga na dzithonga! Nahone vho vha vho fara dzimbone dza u vha vhonetshela. Musi vha tshi sendela tsini, muṅwe a bva gogoni a ḓa kha Yesu. A mu khisa, samusi ni tshi nga zwi vhona afha. Munna o vha e Yudasi Iskariote! Ndi ngani o khisa Yesu?

Yesu a vhudzisa: ‘Yudasi, u mpheṱa nga u nkhisa?’ Ee, u khisa ho vha hu tshiga. Ho ita uri vhanna vhe vha vha vhe na Yudasi vha ḓivhe uri o vha e Yesu, munna we vha vha vha tshi khou mu ṱoḓa. Maswina a Yesu a sendela uri a mu fare. Fhedzi Petro a bvisa banga ḽawe a tumula nḓevhe ya tshauḽa ya munna we a vha a tsini hawe. Fhedzi Yesu a kwama nḓevhe ya munna a i fhodza.

Yesu a vhudza Petro: ‘Vhuedzedza banga ḽau vhudzuloni haḽo. Naa a u humbuli uri ndi nga humbela khotsi anga uri a ḓise zwigidi zwa vharuṅwa uri vha ntshidze?’ Ee, o vha a tshi nga zwi ita! Fhedzi Yesu a si humbele Mudzimu uri a rumele vharuṅwa, ngauri o vha a tshi zwi ḓivha uri tshifhinga tsho vha tsho swika tsha uri maswina awe a mu dzhie. Ngauralo a a tendela uri a mu ṱuwise. Kha ri vhone uri ho itea mini kha Yesu.

Mateo 26:36-56; Luka 22:39-53; Yohane 18:1-12.