Vhonani Yesu u khou vhulawa! Vho mu fhahea kha danda. Zwibigiri zwo ombelwa zwanḓani zwawe na milenzheni. Ndi ngani muthu a tshi nga ṱoḓa u ita izwi kha Yesu?

Ndi ngauri vhaṅwe vhathu vho vha vha tshi vhenga Yesu. Ni a ḓivha uri vho vha vhe vhonnyi? Muṅwe wavho o vha e Sathane Diabolo. Ndi ene we a kona u ita uri Adamu na Eva vha si thetshelese Yehova. Sathane ndi ene we a ita uri maswina a Yesu a ite vhuvemu uvhu vhu ofhisaho.

Yesu a sa athu u ombelwa afha kha danda, maswina awe o mu itela zwithu zwivhi. Naa ni a humbula uri vho ḓa hani tsimuni ya Getsemane vha mu dzhia? Ayo maswina o vha e vhonnyi? Vho vha vhe vharangaphanḓa vha vhutendi. Kha ri vhone uri ho itea mini.

Musi Yesu a tshi dzhiiwa nga vharangaphanḓa vha vhutendi, vhafunziwa vhawe vha ofha vha shavha vha mu sia na maswina awe. Fhedzi Petro na Yohane vha si yese kule. Vha tevhela uri vha vhone uri ho vha hu tshi ḓo itea mini kha Yesu.

Vhotshifhe vha isa Yesu kha mukalaha Hanna, we a vhuya a vha tshifhe muhulu. Gogo afha ḽi si dzulese. Zwi tevhelaho vha isa Yesu nḓuni ya Kayafa, we a vha a tshifhe muhulu. vharangaphanḓa vha vhutendi vhanzhi vho vha vho kuvhangana nḓuni yawe.

Afha nḓuni ya Kayafa ha sengwa. Vhathu vha ḓiswa uri vha zwifhele Yesu. Vharangaphanḓa vha vhutendi vhoṱhe vha ri: ‘Yesu u fanela u vhulawa.’ Zwenezwo vha mu pfela mare khofheni, vha mu rwa nga mavili avho.

Musi izwi zwoṱhe zwi tshi khou itea, Petro o vha e nnḓa muṱani. Ho vha hu vhusiku vhu rotholaho, ngauralo vhathu vha vhasa mulilo. Musi vha tshi khou ḓidudedza muliloni, musidzana wa mushumi a sedza Petro, a ri: ‘Uyu munna o vha e na Yesu.’

Petro a fhindula: ‘Hai, ndo vha ndi si nae!’

Vhathu vha vhudza Petro luraru uri o vha e na Yesu. Fhedzi tshifhinga nga tshithihi Petro a hanedza. Lwa vhuraru musi Petro a tshi hanedza, Yesu a rembuluwa a mu sedza. Petro a ḓisola zwihulu nge a amba mazwifhi, a ṱuwa a lila.

Musi ḓuvha ḽi tshi thoma u bva nga matsheloni a Ḽavhuṱanu, vhotshifhe vha isa Yesu fhethuni havho huhulwane ha u ṱangana, nḓuni ya Khaṱhulo. Henefho vha amba zwe vha vha vha tshi ḓo ita ngae. Vha mu isa kha Pontio Pilato, muvhusi wa Yudea.

Vhotshifhe vha vhudza Pilato: ‘Uyu ndi munna muvhi. U fanela u vhulawa.’ O no vhudzisa Yesu dzimbudziso, Pilato a ri: ‘Thi koni u zwi vhona uri o khakha.’ Pilato a rumela Yesu ha Herode Antipa. Herode o vha e muvhusi wa Galilea, fhedzi a tshi khou dzula Yerusalema. Herode na ene a si kone u vhona uri Yesu o khakha, ngauralo a mu rumela murahu ha Pilato.

Pilato a ṱoḓa u vhofholola Yesu. Fhedzi maswina a Yesu a ṱoḓa uri hu vhofhololwe ḽiṅwe ḽivemu ḽi no pfi Baraba. Ho vha hu tshi ṱoḓou vha masiari musi Pilato a tshi bvisela Yesu nnḓa. A ri kha vhathu: ‘Vhonani! Khosi yaṋu!’ Fhedzi vhotshifhe vhahulu vha tzhema: ‘Mu ṱuse! Mu vhulahe! Mu vhulahe!’ Ngauralo Pilato a vhofholola Baraba, vha ṱuwisa Yesu uri a vhulawe.

Nga u ṱavhanya nga masiari a Ḽavhuṱanu Yesu o vha o ombelwa kha danda. A ni koni u vha vhona tshifanyisoni, fhedzi kha thungo dzoṱhe dza Yesu ho vha hu tshi khou vhulawa mutshinyi kha danda. Yesu a sa athu u fa, muṅwe wa vhatshinyi a ri khae: ‘U nkhumbule musi u tshi dzhena muvhusoni wau.’ Yesu a fhindula: ‘Ndi a u fulufhedzisa uri u ḓo vha na nṋe Paradisoni.’

Naa iḽo ḽo vha ḽi si fulufhedziso ḽavhuḓi? Ni a ḓivha uri Yesu o vha a tshi khou amba nga ha ifhio paradiso? Ee, paradiso ye Yehova a i ita u thomani yo vha i kha ḽifhasi. Musi Yesu a tshi vhusa ṱaḓulu, u ḓo humisela uyo munna vhutshiloni uri a takalele Paradiso ntswa kha ḽifhasi. Naa zwi nga si ri takadze?

Mateo 26:57-75; 27:1-50; Luka 22:54-71; 23:1-49; Yohane 18:12-40; 19:1-30.