Vhonani ḽiivha ḽi tshi khou tsela kha ṱhoho ya munna. Munna ndi Yesu. U na miṅwaha ya 30 zwino. Munna ane a vha nae ndi Yohane. Ro no ḓi guda zwiṅwe nga hae. Ni a humbula musi Maria a tshi ya u dalela shaka ḽawe Elisabetha, ṅwana a re ngomu ha Elisabetha a tshi tamba nga dakalo? Ṅwana uyo we a vha a sa athu u bebwa o vha e Yohane. Yohane na Yesu vha khou itani zwino?

Yohane o vha a kha ḓi bva u mbwandamedza Yesu maḓini a Mulamboni wa Yorodane. Muthu u lovhedzwa ngauralo. Muthu u thoma u mbwandamedzwa maḓini, a kona u bviswa. Ngauri izwi ndi zwe Yohane a vha a tshi ita vhathu, o vha a tshi vhidzwa Yohane Mulovhedzi. Fhedzi ndi ngani Yohane o lovhedza Yesu?

Ee, Yohane o zwi ita ngauri Yesu o ḓa a mu humbela uri a mu lovhedze. Yohane o vha a tshi lovhedza vhathu vha ṱoḓaho u sumbedza uri vha a ḓisola nga zwithu zwivhi zwe vha ita. Fhedzi Yesu ho ngo vhuya a ita tshithu tshivhi tsha u ḓisola ngatsho, ngauri o vha e Murwa wa Mudzimu. O humbela Yohane uri a mu lovhedzele tshiitisi tsho fhambanaho.

Yesu a sa athu u ḓa afha kha Yohane, o vha e muvhaḓi. Muvhaḓi ndi muthu a itaho zwithu nga thanda, zwi ngaho dziṱafula na zwidulo na dzibannga. Munna wa Maria, Yosefa o vha e muvhaḓi, a funza Yesu u vha muvhaḓi-vho. Fhedzi Yehova o vha o vhetshela Yesu mushumo wo khetheaho uri a u ite, nahone tshifhinga tsho vha tsho swika tsha uri Yesu a thome u u ita. U sumbedza uri o vha o ḓela u ita lufuno lwa Khotsi awe, Yesu a humbela Yohane uri a mu lovhedze. Naa Mudzimu o takadzwa nga izwo?

Ee, zwo mu takadza, ngauri, Yesu o no bva maḓini, ipfi ḽi bvaho ṱaḓulu ḽo ri: ‘Hoyu ndi Murwa wanga, ane nda mu takalela.’ Hafhu, zwa nga maṱaḓulu a a vulea na iḽi ḽiivha ḽa tsela kha Yesu. Fhedzi ḽo vha ḽi si ḽiivha ḽa. vhukuma. Vhukuma wo vha u muya mukhethwa wa Mudzimu.

Zwino Yesu o vha e na zwinzhi zwa u humbula nga hazwo, ngauralo a ya fhethu hu si na muthu maḓuvha a 40. Henengei Sathane a ḓa khae. Luraru a lingedza u ita uri Yesu a ite tshithu tshi lwaho na milayo ya Yehova. Fhedzi Yesu a si zwi ite.

Nga murahu, Yesu a huma a ṱangana na vhaṅwe vhanna vhe vha vha vhafunziwa vhawe vha u thoma. Maṅwe a madzina avho ndi Andrea, Petro (o dovhaho a vhidzwa Simoni), Filipo na Nathanaele (o dovhaho a vhidzwa Baratholomeo). Yesu na avha vhafunziwa vha ya Galilea he vha ima muḓini wa Kana he Nathanaele a vha a tshi dzula hone. Henefho Yesu a ya munyanyani muhulu, a ita vhuṱolo hawe ha u thoma ha u shandukisa maḓi a vha veine.

Mateo 3:13-17; 4:1-11; 13:55; Marko 6:3; Yohane 1:29-51; 2:1-12.