Yesu o sinyuwa vhukuma hafha, a si zwone? Ni a ḓivha uri ndi ngani o sinyuwa ngaurali? Ndi ngauri avha vhanna vha re thembeleni ya Mudzimu Yerusalema ndi dzikhusha. Vha khou lingedza u ita tshelede nga vhathu vho ḓaho afha u rabela Mudzimu.

Ni a dzi vhona dziḽa mbohwana dzoṱhe na dzinngu na maivha? Ee, vhanna vho vha vha tshi khou zwi rengisa henefha thembeleni. Ni a ḓivha uri ndi ngani? Ndi ngauri Vhaisiraele vho vha vha tshi shaya zwipuka na zwiṋoni uri vha itele Yehova zwiṱhavhelo.

Mulayo wa Mudzimu wo ri musi Muisiraele o khakha, o vha o fanela u itela Yehova tshiṱhavhelo. Ho vha hu na zwiṅwe zwifhinga, musi Vhaisiraele vho fanela u ita zwiṱhavhelo. Fhedzi Muisiraele o vha a tshi nga wanafhi zwipuka zwa u ṋekedza Yehova?

Vhaṅwe Vhaisiraele vho vha vhe na zwipuka na zwiṋoni, zwe vha vha vha tshi nga zwi ṋekedza. Fhedzi Vhaisiraele vhanzhi vho vha vha si nazwo. Vhaṅwe vho vha vha tshi dzula kule na Yerusalema lwe vha vha vha si nga si ḓise tshipuka thembeleni. Ngauralo vhathu vho ḓa afha vha renga zwipuka na zwiṋoni zwe vha vha vha tshi zwi shaya. Fhedzi avha vhanna vho vha vha tshi khou vhidza tshelede nnzhisa. Vho vha vha tshi khou fhura vhathu. Nga nnḓa ha izwo, vho vha vho fanela u vha vha sa khou rengisa afha thembeleni.

Izwi ndi zwe zwa sinyusa Yesu. A thudza dziṱafula dza vhanna dza tshelede a balanganya tshelede. Hafhu, a ita tshimebi nga dzithambo a bvisa zwipuka zwoṱhe thembeleni. A laya vhanna vha khou rengisaho maivha: À bviseni hafha! Litshani u ita nnḓu ya Khotsi anga fhethu ha u ita tshelede nnzhi.’

Vhaṅwe vha vhatevheli vha Yesu vho vha vhe nae thembeleni Yerusalema. Vha mangadzwa nga zwe vha vhona a tshi ita. Zwenezwo vha humbula fhethu Bivhilini hune ya ri nga ha Murwa wa Mudzimu: ‘Lufuno lwa nnḓu ya Yehova lu ḓo duga khae sa mulilo.’

Musi Yesu e afha Yerusalema Pasekani, a ita vhuṱolo vhunzhi. Nga murahu, a ṱuwa Yudea a fara lwendo lwa u vhuelela Galilea. Fhedzi nḓilani, a fhira nga Samaria. Kha ri vhone uri ho itea mini henengei.

Yohane 2:13-25; 4:3, 4.