Yesu o ima uri a awele tshisimani Samaria. Vhafunziwa vhawe vho ya muḓini u renga zwiḽiwa. Musadzi ane a khou amba nae o ḓa u ka maḓi. A ri khae: ‘Mphe ndi nwe.’

Izwi zwa mangadza musadzi zwihulu. Ni a ḓivha uri ndi ngani? Ndi ngauri Yesu o vha e Muyuda, musadzi e Musamaria. Vhayuda vhanzhi vho vha vha sa funi Vhasamaria. Vho vha vha sa ambi navho! Fhedzi Yesu o vha a tshi funa vhathu vhoṱhe. A ri: ‘Arali wo vha u tshi zwi ḓivha uri u khou humbelwa nga nnyi maḓi, wo vha u tshi ḓo mu humbela a u fha maḓi a ṋeaho vhutshilo.’

Musadzi a ri: ‘Murena, tshisima tsho ita dindi, nahone a u na na tsha u ka. Maḓi a ṋeaho vhutshilo u ḓo a wanafhi?’

Yesu a ṱalutshedza: ‘Arali wa nwa maḓi a bvaho tshisimani itshi u ḓo dovha wa pfa ḓora. Fhedzi maḓi ane nda ḓo a ṋea muthu a nga ita uri a tshile nga hu sa fheli.’

Musadzi a ri: ‘Murena, mphe eneo maḓi! Uri ndi sa tsha dovha nda pfa ḓora. Nahone a thi tsha ḓo dovha nda ḓa fhano u ka maḓi.’

Musadzi o humbula uri Yesu o vha a tshi khou amba nga maḓi a vhukuma. Fhedzi o vha a tshi khou amba nga ha ngoho nga ha Yehova na muvhuso wawe. Ngoho iyi i nga maḓi a ṋeaho vhutshilo. I nga ṋea muthu vhutshilo vhu sa fheli.

Yesu a vhudza musadzi: ‘Tshimbila u yo vhidza munna wau ni vhuye.’

Musadzi a fhindula: ‘Thi na munna.’

Yesu a ri: ‘Wo fhindula zwone. Fhedzi wo vha u na vhanna vhaṱanu, munna ane wa khou dzula nae zwino a si munna wau.’

Musadzi a mangala, ngauri zwoṱhe zwo vha zwi ngoho. Yesu o zwi ḓivha ngauri o vha e Ene o Fulufhedziswaho o ruṅwaho nga Mudzimu, nahone Mudzimu o mu fha mafhungo aya. Nga itshi tshifhinga vhafunziwa vha Yesu vha vhuya, vha mangadzwa nga uri o vha a tshi khou amba na musadzi wa Musamaria.

Ri guda uri Yesu u na vhulenda kha vhathu vha tshaka dzoṱhe. Na rine ri fanela u ralo. A ro ngo fanela u humbula uri vhaṅwe vhathu ndi vhavhi ngauri ndi vha luṅwe lushaka. Yesu u ṱoḓa uri vhoṱhe vha ḓivhe ngoho i isaho vhutshiloni vhu sa fheli. Na riṋe-vho ri fanela u ṱoḓa u thusa vhathu u guda ngoho.

Yohane 4:5-43; 17:3.