Nganea 91: Yesu u Funza e kha Thavha
Vhonani Yesu a tshi khou funza avha vhathu vhoṱhe kha thavha Galilea. Vho dzulaho tsini-tsini nae ndi vhaapostola vhawe vha 12. Vhaapostola vho vha vhe vhafunziwa vha Yesu vho khetheaho. Madzina avho ni a a ḓivha?
Ho vha hu na Simoni Petro na murathu wawe Andrea. Ho vha hu na Yakobo na Yohane, vhe vha vha vhe murathu na mukomana. Muṅwe muapostola o vha a tshi dovha a vhidzwa Yakobo, na muṅwe na ene a tshi pfi Simoni. Vhaapostola vhavhili vho vha vha tshi vhidzwa Yudasi. Muṅwe o vha e Yudasi Iskariote, muṅwe Yudasi a tshi dovha a vhidzwa Thadeo. Ho vha hu na Filipo na Nathanaele (o dovhaho a vhidzwa Baratholomeo), na Mateo na Thoma.
O no vhuya Samaria, Yesu a thoma u huwelela lwa u thoma: ‘Muvhuso wa ṱaḓulu u tsini.’ Ni a ḓivha uri uyo muvhuso ndi mini? Ndi hulumeni wa vhukuma wa Mudzimu. Yesu ndi khosi yawo. U ḓo vhusa e ṱaḓulu a ḓisa mulalo kha ḽifhasi. Ḽifhasi ḽoṱhe ḽi ḓo itwa paradiso ya u naka nga muvhuso wa Mudzimu.
Afha Yesu o vha a tshi khou funza vhathu nga ha muvhuso. A tshi khou ṱalutshedza: ‘Ni fanela u rabela ngaurali: Khotsi ashu wa ṱaḓulu, dzina ḽau ḽi ṱhonifhiwe. Muvhuso wau u ḓe. Lufuno lwau lu itee kha ḽifhasi, sa ngei ṱaḓulu.’ Vhathu vhanzhi vha zwi vhidza ‘Thabelo ya Murena.’ Vhaṅwe vha i vhidza ‘Khotsi ashu.’ Naa ni nga i amba thabelo yoṱhe?
Yesu u khou funza vhathu hafhu uri vha fanela u farana hani. O ri: ‘Itelani vhaṅwe zwine na ṱoḓa uri vha ni itele zwone.’ Naa a ni zwi funi musi vhaṅwe vha tshi ni fara nga vhulenda? Yesu o vha a tshi khou ri, ri fanela u fara vhaṅwe nga vhulenda. Naa a zwi nga tamisi paradisoni musi vhoṱhe vha tshi ḓo ita izwi?
Mateo dzindima 5 u ya kha 7; 10:1-4.
Mbudziso
- Kha tshifanyiso, Yesu u khou funza e ngafhi, nahone vho dzulaho tsini-tsini nae ndi vhonnyi?
- Vhaapostola vhawe vha 12 ndi vhonnyi?
- Muvhuso une Yesu a khou amba nga hawo ndi ufhio?
- Yesu u funza vhathu uri vha rabelele mini?
- Yesu uri vhathu vha fanela u fara hani vhaṅwe?
Mbudziso dzo engedzeaho
- Vhalani Mateo 5:1-12.
Ri nga sumbedza nga nḓila-ḓe uri ri a dzhiela nṱha ṱhoḓea dzashu dza muya? (Mat. 5:3; Vha-Roma 10:13-15; 1 Tim. 4:13, 15, 16)
- Vhalani Mateo 5:21-26.
Mateo 5:23, 24 i ombedzela hani uri vhushaka hashu na vhahashu vhu kwama vhushaka hashu na Yehova? (Mat. 6:14, 15; Ps. 133:1; Vha-Kol. 3:13; 1 Yoh. 4:20)
- Vhalani Mateo 6:1-8.
Ndi afhio maṅwe maitele a u ḓiita wo lugaho ane Vhakriste vha fanela u a iledza? (Luka 18:11, 12; 1 Vha-Kor. 4:6, 7; 2 Vha-Kor. 9:7)
- Vhalani Mateo 6:25-34.
Yesu o funza mini malugana na ṱhoḓea ya u fulufhela kha Yehova u itela u wana ndugiselelo dzashu dza zwithu zwi vhonalaho? (Ek. 16:4; Ps. 37:25; Vha-Fil. 4:6)
- Vhalani Mateo 7:1-11.
Tshifanyiso tshi pfalaho tshi wanalaho kha Mateo 7:5 tshi ri funza mini? (Mir. 26:12; Vha-Roma 2:1; 14:10; Yak. 4:11, 12)