Ho vha ho itea tshithu tshi ofhisaho. Yohane Mulovhedzi o vha a kha ḓi bva u vhulawa. Herodia, musadzi wa khosi, o vha a sa mu funi. O ita uri khosi i ite uri ṱhoho ya Yohane i tumulwe.

Musi Yesu a tshi zwi pfa, a ṱungufhala zwihulu. A ya fhethu hu si na muthu a eṱhe. Fhedzi vhathu vha mu tevhela. Musi Yesu a tshi vhona magogo, a a pfela vhuṱungu. Ngauralo a amba nao nga ha muvhuso wa Mudzimu, a fhodza vhalwadze.

Madekwana eneo vhafunziwa vhawe vha ḓa khae vha ri: ‘Ḽo no kovhela, nahone afha ndi nnḓa. Vhudza vhathu vha ṱuwe uri vha ḓirengele zwiḽiwa miḓini ya tsini.’

Yesu a fhindula: À vho ngo fanela u ṱuwa. Vha fheni zwa u ḽa.’ A tshi rembulutshela kha Filipo, Yesu a vhudzisa: ‘Ri nga rengafhi zwiḽiwa zwo linganaho zwa u fusha avha vhathu?’

Filipo a ri: ‘Zwi ḓo ḓura tshelede nnzhi u renga zwo linganaho uri vhoṱhe vho kone u vha na zwiṱuku-ṱuku fhedzi.’ Andrea a ri: ‘Hoyu mutukana, o faraho zwiḽiwa zwashu, u na ḽofo ṱhanu dza vhurotho na khovhe mbili. Fhedzi a zwi nga lingani avha vhathu.’

Yesu a ri: ‘Vhudzani vhathu vha dzule fhasi.’ A livhuha zwiḽiwa kha Yehova, a thoma u zwi ṅwatekanya. Zwi tevhelaho, vhafunziwa vha fha vhathu vhoṱhe vhurotho na khovhe. Ho vha hu na vhanna vha 5 000, na zwigidi zwinzhi zwa vhasadzi na vhana. Vhoṱhe vha ḽa u swika vha tshi fura. Musi vhafunziwa vha tshi kuvhanganya zwo salaho, ha vha na zwirundu zwa 12 zwo ḓalaho!

Yesu a ri vhafunziwa vhawe vha dzhene gungwani uri vha wele Lwanzhe lwa Galilea. Vhusiku ha vuwa maḓumbu mahulu, magabelo a dzungulusela gungwa ngei na ngei. Vhafunziwa vha ofha. Zwino, vhukati ha vhusiku, vha vhona muthu a tshi khou ḓa khavho a tshi tshimbila kha maḓi. Vha ṱavha mukosi nga nyofho, ngauri vho vha vha sa ḓivhi uri vho vha vha tshi khou vhona mini.

Yesu a ri: ‘Ni songo ofha. Ndi nṋe!’ Vha si kholwe. Ngauralo Petro a ri: ‘Arali e iwe, Murena, mmbudze ndi tshimbile kha maḓi ndi ḓe ha iwe.’ Yesu a fhindula: ‘Iḓa!’ Petro a bva a tshimbila kha maḓi! Zwenezwo a mbo ḓi ofha a thoma u mbwandamela, fhedzi Yesu a mu tshidza.

Nga murahu, Yesu a dovha a fusha zwigidi zwa vhathu. Nga itshi tshifhinga o zwi ita nga ḽofo dza sumbe dza vhurotho na khovhe ṱhukhu. Ha dovha ha vha na zwinzhi zwa vhoṱhe. Naa nḓila ye Yesu a vha a tshi londa vhathu ngayo a i mangadzi? Musi a tshi vhusa sa khosi a ri nga vhuyi ra vhilaela tshithu!

Mateo 14:1-32; 15:29-38; Yohane 6:1-21.