Nga ḓuvha ḽa vhuraru nga murahu ha lufu lwawe, Yesu a vuswa. Nga ḽeneḽo ḓuvha a bvelela kha vhatevheli vhawe zwifhinga zwiṱanu.Yesu a bvela phanḓa a bvelela khavho nga maḓuvha a 40. Musi vhaṅwe vha vhafunziwa vhawe vho sedza, Yesu a gonyela ṱaḓulu. Maḓuvha a fumi nga murahu Mudzimu a shululela muya mukhethwa kha vhatevheli vha Yesu vho lindela Yerusalema.

Nga murahu, maswina a Mudzimu a ita uri vhaapostola vha dzheniswe dzhele, fhedzi muruṅwa a vha vhofholola. Mufunziwa Stefano a vhulawa nga matombo nga vhahanedzi. Fhedzi ri guda uri Yesu o nanga hani muṅwe wa avha vhahanedzi uri a Me muḓinḓa wawe, a vha muapostola Paulo. Miṅwaha miraru na hafu nga murahu ha lufu lwa Yesu, Mudzimu a ruma muapostola Petro uri a ṱanziele kha Koronelio we a vha a si Muyuda na muṱa wawe.

Hu ngaho miṅwaha ya 13 nga murahu Paulo a thoma lwendo lwawe lwa u thoma lwa u ṱanziela. Kha lwendo lwawe lwa vhuvhili Timotheo a ṱuwa na Paulo. Ri guda uri Paulo na khonani dzawe dze a vha a tshi tshimbila nadzo vho vha hani na zwifhinga zwi takadzaho kha u shumela Yehova. Mafheleloni, Paulo a dzheniswa dzhele Roma. Miṅwaha mivhili nga murahu a vhofhololwa, fhedzi a dovha a dzheniswa dzhele a vhulawa. Zwiitea zwa tshipiḓa tsha 7 zwo bvelela nga tshifhinga tsha miṅwaha i ṱoḓaho u vha 32.