Musi maḓuvha a tshi ḓi ya, Yesu a ḓisumbedza kha vhafunziwa vhawe lunzhi. Luthihi vhafunziwa vha ṱoḓaho u vha 500 vha mu vhona. Musi Yesu a tshi bvelela khavho, ni a ḓivha uri Yesu o amba navho nga ha mini? Muvhuso wa Mudzimu. Yehova o vha o rumela Yesu kha ḽifhasi uri a funze nga ha Muvhuso. Nahone o ḓi zwi ita nga murahu o no vuswa vhafuni.

Ni a humbula uri muvhuso wa Mudzimu ndi mini? Ee, Muvhuso ndi hulumeni wa vhukuma wa Mudzimu u re ṱaḓulu, nahone Yesu ndi Ene we Mudzimu a mu nanga uri a vhe khosi. Samusi ro guda, Yesu o sumbedza uri u ḓo vha hani khosi yavhuḓi nga u fusha vha re na nḓala, nga u fhodza vhalwadze, na nga u vusa vhafu.

Ngauralo musi Yesu a tshi vhusa sa khosi ṱaḓulu nga miṅwaha ya gidi, hu ḓo itwa paradiso ya u naka. A hu tsha ḓo vha na dzinndwa, kana vhuvemu, kana vhulwadze, kana lufu. Ri a ḓivha uri izwi ndi ngoho ngauri Mudzimu o ita ḽifhasi uri ḽi vhe paradiso ya u takalelwa nga vhathu. Ndi nga hone o ita tsimu ya Edeni u thomani. Nahone Yesu u ḓo ita uri zwine Mudzimu a ṱoḓa uri zwi itwe zwi itee mafheleloni.

Ha ḓa tshifhinga tsha uri Yesu a vhuelele ṱaḓulu. Maḓuvha a 40 Yesu o vha a tshi khou ḓi ḓisumbedza kha vhafunziwa vhawe. Fhedzi a sa athu u vha sia a vha vhudza: ‘Ni dzule Yerusalema u swika ni tshi ṱanganedza muya mukhethwa.’ Muya mukhethwa ndi maanḓa a Mudzimu a shumaho, e a vha a tshi ḓo thusa vhatevheli vhawe u ita lufuno lwa Mudzimu. Mafheleloni, Yesu a ri: ‘Ni ṱanziele nga ha nṋe u swika migumoni ya ḽifhasi.’

Yesu o no amba izwi, ha itea tshithu tshi mangadzaho. A gonyela nṱha ṱaḓulu, samusi ni tshi nga zwi vhona afha. Gole ḽa mu dzumba, vhafunziwa vhawe vha sa tsha mu vhona. Yesu a ya ṱaḓulu, a thoma u vhusa vhatevheli vhawe kha ḽifhasi e henengei.

1 Vhakorinta 15:3-8; Ndzumbululo 21:3, 4; Mishumo 1:1-11.