Nganea 108: Nḓilani ya u ya Damaseko
Ni a ḓivha uri uḽa o lalaho fhasi ndi nnyi? Ndi Saulo. Humbulani, ndi ene we a linda madzhasi a vhanna vho kanḓaho Stefano nga matombo. Vhonani tshiḽa tshedza! Hu khou itea mini?
Stefano o no vhulawa, Saulo a ranga phanḓa kha u zwima vhatevheli vha Yesu uri a vha vhaise. A dzhena nḓuni dzoṱhe a vha kokodzela nnḓa a vha dzhenisa dzhele. Vhunzhi ha vhafunziwa vha shavhela kha miṅwe miḓi vha thoma u huwelela “mafhungo maḓifha” henengei. Fhedzi Saulo a ya kha miṅwe miḓi uri a wane vhatevheli vha Yesu. Zwino o vha e nḓilani ya u ya Damaseko. Fhedzi, nḓilani, ha itea hezwi:
Nga u ṱavhanya tshedza tshi bvaho lutomboni tsha penyela Saulo. A wela fhasi, samusi ri tshi zwi vhona afha. Zwenezwo ipfi ḽa ri: ‘Saulo, Saulo! U mmbaiselani?’ Vhanna vhe vha vha vhe na Saulo vha vhona tshedza na u pfa ipfi, fhedzi vha si pfesese zwe zwa vha zwi tshi khou ambiwa.
Saulo a vhudzisa: ‘U nnyi, Murena?’
Ipfi ḽa ri: ‘Ndi nṋe Yesu, ane wa khou mu vhaisa.’ Yesu o amba izwi ngauri musi Saulo a tshi vhaisa vhatevheli vha Yesu, Yesu o vha a tshi ḓipfa a tshi nga o vha a tshi khou vhaiswa.
Saulo a vhudzisa: ‘Ndi ḓo ita mini, Murena?’
Yesu a ri: ‘Vuwa u dzhene Damaseko. Henengei u ḓo vhudzwa zwine wa fanela u ita.’ Musi Saulo a tshi vula maṱo awe, a si kone u vhona tshithu. O vha e bofu! Vhanna vhe vha vha vhe nae vha mu fara nga tshanḓa vha mu dzhenisa Damaseko.
Zwenezwo Yesu a amba na muṅwe wa vhafunziwa vhawe Damaseko, a ri: ‘Takuwa, Anania. Iya tshiṱaraṱani tshi vhidzwaho tsho Lugaho. Nḓuni ya Yuda u vhudzise hu re na munna a no pfi Saulo. Ndo mu nanga uri a vhe muḓinḓa wanga o khetheaho.’
Anania a ya. Musi a tshi ṱangana na Saulo, a vhea zwanḓa zwawe khae a ri: ‘Murena o nthuma uri u dovhe u vhone u ḓadzwe nga muya mukhethwa.’ Nga u ṱavhanya ha wa zwithu zwi ngaho zwikwati maṱoni a Saulo, nahone a dovha a kona u vhona.
Saulo o shumiswa nga nḓila ya maanḓa u ṱanziela kha vhathu vha tshaka nnzhi. A ḓivhiwa sa muapostola Paulo, ane ra ḓo guda zwinzhi zwo engedzeaho nga hae. Fhedzi tsha u thoma, kha ri vhone zwe Mudzimu a rumela Petro uri a zwi ite.
Mishumo 8:1-4; 9:1-20; 22:6-16; 26:8-20.
Mbudziso
- Saulo o ita mini nga murahu ha musi Stefano o no vhulahwa?
- Musi Saulo a tshi khou ya Damaseko, ndi tshithu tshifhio tshi mangadzaho tsho iteaho?
- Yesu o vhudza Saulo uri a ite mini?
- Ndi ndaela dzifhio dze Yesu a dzi ṋea Anania, nahone Saulo o dovha a kona hani u vhona?
- Saulo o vho ḓo ḓivhiwa nga dzina ḽifhio, nahone o shumiswa hani?
Mbudziso dzo engedzeaho
- Vhalani Mishumo 8:1-4.
U tovholwa huhulwane he ha thoma tshivhidzoni tshiswa tsha Vhukriste ho shuma hani u itela uri lutendo lwa Vhukriste lu phaḓalale, nahone ndi tshithu tshifhio tshi fanaho tshe tsha itea misini yashu? (Mish. 8:4; Yes. 54:17)
- Vhalani Mishumo 9:1-20.
Ndi mishumo ifhio miraru ye Yesu a i dzumbulula uri u ḓo i ṋea Saulo? (Mish. 9:15; 13:5; 26:1; 27:24; Vha-Roma 11:13)
- Vhalani Mishumo 22:6-16.
Ri nga fana hani na Anania, nahone ndi ngani zwenezwo zwi zwa ndeme? (Mish. 22:12; 1 Tim. 3:7; 1 Pet. 1:14-16; 2:12)
- Vhalani Mishumo 26:8-20.
U rembulutshela ha Saulo kha Vhukriste hu ṱuṱuwedza hani vha re na vhafarisi vha si vhatendi ṋamusi? (Mish. 26:11; 1 Tim. 1:14-16; 2 Tim. 4:2; 1 Pet. 3:1-3)
