Nganea 111: Mutukana We a Eḓela
Tshukhwi! Hu khou iteani afha? Naa mutukana o lalaho fhasi o huvhalesa? Vhonani! muṅwe wa vhanna vha khou bvaho nḓuni ndi Paulo! Ni a mu vhona Timotheo a henefhovho? Naa mutukana o tou wa nga fasiṱere?
Ee, ho itea zwenezwo. Paulo o vha a tshi khou ṋea vhafunziwa nyambo afha Tiroasi. O zwi ḓivha uri ha nga ḓo dovha a vha vhona tshifhinga tshilapfu ngauri o vha o fanela u ṱuwa nga ḓuvha ḽi tevhelaho. Ngauralo a ḓi amba u swika vhusiku vhuhulu.
Zwino, mutukana uyu a no pfi Oitixo o vha o dzulela fasitereni, a eḓela. A wa, nga fasiṱere, kha nnḓu ya nṱha ya vhuraru! Ngauralo ni nga vhona uri ndi ngani vhathu vha tshi vhilaela ngaurali. Vha tshi doba mutukana, vha wana o fa!
Musi Paulo a tshi vhona uri mutukana o fa, a lala nṱha hawe a mu kuvhatedza. Zwenezwo a ri: ‘Ni songo vhilaela. U a tshila!’ A tshila nangoho! Ho vha vhu vhuṱolo! Paulo o vha o mu humisela vhutshiloni. Ha vha na dakalo ḽihulu kha gogo.
Vhoṱhe vha dovha vha vhuelela nḓuni ya nṱha vha ḽa. Paulo a ḓi amba u swika ḽi tshi tsha. Fhedzi ni nga khwaṱhisa uri Oitixo ho ngo dovha a eḓela! Zwenezwo Paulo, Timotheo na vhaṅwe vha dzhena gungwani. Vho vha vha tshi khou ya ngafhi?
Paulo o vha a tshi khou fhedzisa lwendo lwawe lwa vhuraru lwa u ṱanziela, a tshi khou ya hayani. Kha ulu lwendo Paulo o vha o dzula miṅwaha miraru muḓini wa Efeso fhedzi. Ngauralo ulu lwo vha lu lwendo lulapfu u fhira lwa vhuvhili.
Vho no ṱuwa Tiroasi, gungwa ḽa ima Mileto tshifhinganyana. Samusi Efeso ho vha hu si kulekule, Paulo a vhidza vhanna vhahulwane vha tshivhidzo uri vha ḓe Mileto uri a ambe navho lwa u fhedza. Nga murahu, musi tshi tshifhinga tsha uri gungwa ḽi ṱuwe, vha ṱungufhala hani u vhona Paulo a tshi ṱuwa!
Mafheleloni gungwa ḽa vhuya Kesarea. Musi Paulo a tshi khou dzula afha nḓuni ya mufunziwa Filipo, muporofita Agabo a vhudza Paulo uri o vha a tshi ḓo itwa tshivhotshwa musi a tshi ya Yerusalema. Zwa itea ngauralo. Paulo o no vha dzhele miṅwaha mivhili Kesarea, a rumelwa Roma u sengiswa nga Kesare muvhusi wa Roma. Kha ri vhone uri ho itea mini lwendoni lwa u ya Roma.
Mishumo dzindima 19 a ya kha 26.
Mbudziso
- Kha tshifanyiso, mutukana o lalaho fhasi ndi nnyi, nahone ho itea mini khae?
- Musi Paulo a tshi vhona uri mutukana o fa o ita mini?
- Paulo na Timotheo na vhane vha khou tshimbila navho vha khou ya ngafhi, nahone ho itea mini musi vha tshi ima Mileto?
- Ndi tsevho ifhio ye muporofita Agabo a i ṋea Paulo, nahone zwe muporofita a amba zwo itea hani?
Mbudziso dzo engedzeaho
- Vhalani Mishumo 20:7-38.
Ri nga dzula hani ‘ri si na mulandu kha malofha a vhoṱhe,’ u ya nga maipfi a Paulo a re kha Mishumo 20:26, 27? (Hesek. 33:8; Mish. 18:6, 7)
Ndi ngani vhahulwane vha tshi fanela u ‘farela fhungo ḽi fulufhedzeaho’ musi vha tshi funza? (Mish. 20:17, 29, 30; Tito 1:7-9; 2 Tim. 1:13)
- Vhalani Mishumo 26:24-32.
U vha mudzulapo wa Roma zwo thusa hani Paulo uri a ḓadzise mushumo wa u huwelela we a u ṋewa nga Yesu? (Mish. 9:15; 16:37, 38; 25:11, 12; 26:32; Luka 21:12, 13)