Avha vhathu vha re afha ndi vhatevheli vha Yesu. Vho mu thetshelesa vha dzula Yerusalema. Musi vhoṱhe vho lindela vho kuvhangana, phosho khulu ya ḓadza nnḓu yoṱhe. Yo vha i tshi pfala sa muya u re na maanḓa. Zwenezwo ndimi dza mulilo dza thoma u bvelela kha ṱhoho dza vhafunziwa. Ni a u vhona mulilo nṱha ha muṅwe na muṅwe wavho? Zwo vha zwi tshi amba mini?

Ho vha vhu vhuṱolo! Yesu o vha e ṱaḓulu na Khotsi awe, nahone o vha a tshi khou shululela muya mukhethwa wa Mudzimu kha vhatevheli vhawe. Ni a ḓivha uri uyo muya wo vha ita uri vha iteni? Vhoṱhe vha thoma u amba nga ndimi dzo fhambanaho.

Vhathu vhanzhi Yerusalema vha pfa phosho ye ya pfala sa muya u re na maanḓa, nahone vha ḓa u vhona zwe zwa vha zwi tshi khou itea. Vhaṅwe vha vhathu vho vha vha tshi bva kha dziṅwe tshaka vhe vha vha vho ḓela tshimima tsha Vhaisiraele tsha Pentekoste. Vhaeni avha vha pfa vhafunziwa vha tshi amba nga ndimi dzavho nga ha zwithu zwi mangadzaho zwe Mudzimu a zwi ita.

Vhaeni vha ri: ‘Avha vhathu vhoṱhe ndi vha Galilea. Zwi ḓa hani-ha, uri vha kone u amba nga idzi ndimi dzo fhambanaho dza mashango ane ra bva khao?’

Petro a takuwa uri a vha ṱalutshedze. A takusa ipfi ḽawe a vhudza vhathu uri Yesu o vhulawa hani na uri Yehova o mu vusa hani vhafuni. Petro a ri: ‘Zwino Yesu u ṱaḓulu kha tshanḓa tsha u ḽa tsha Mudzimu, nahone o shulula muya mukhethwa we a fulufhedzisa. Ndi nga hone no vhona na pfa uvhu vhuṱolo.’

Zwino, musi Petro a tshi amba izwi zwithu, vhanzhi vha ḓisola zwihulu nga ha zwe zwa itwa kha Yesu. Vha vhudzisa: ‘Ri fanela u ita mini?’ Petro a vha vhudza: ‘Hu ṱoḓea uri ni shanduke ni lovhedzwe.’ Ngauralo nga ḽeneḽo ḓuvha vhathu vha ṱoḓaho u vha 3 000 vha lovhedzwa vha vha vhatevheli vha Yesu.

Mishumo 2:1-47.