Vhonani muruṅwa afha o vula muṋango wa dzhele. Vhanna vhane a khou vha vhofholola ndi vhaapostola vha Yesu. Kha ri wane uri ndi mini tsho itisaho uri vha dzheniswe dzhele.

Ho vha ho no vha tshifhinganyana tshee muya mukhethwa wa shululelwa kha vhafunziwa vha Yesu. Ha itea hezwi: Petro na Yohane vho vha vha tshi khou dzhena thembeleni Yerusalema nga maṅwe masiari. Tsini ha muṋango ho vha hu na munna we a vha a tshihole vhutshilo hawe hoṱhe. O vha a tshi humbela tshelede kha vha dzhenaho thembeleni. A tshi vhona Petro na Yohane, a vha humbela uri vha mu fhe tshiṅwe tshithu. Vha ita mini?

Vha ima vha sedza munna wa tshishai, Petro a ri: ‘Thi na tshelede, fhedzi ndi ḓo u fha zwine nda vha nazwo. Dzinani ḽa Yesu, takuwa u tshimbile!’ Petro a fara munna nga tshanḓa,nahone nga u ṱavhanya a fhufha a thoma u tshimbila. Musi vhathu vha tshi zwi vhona, vha mangala na u takala zwihulu.

Petro a ri: ‘Uvhu vhuṱolo ro vhu ita nga maanḓa a Mudzimu, we a vusa Yesu vhafuni.’ Musi ene na Yohane vha tshi khou amba, ha ḓa vhaṅwe vharangaphanḓa vha vhutendi. Vho vha vho sinyuwa ngauri Petro na Yohane vho vha vha tshi khou vhudza vhathu nga u vuswa ha Yesu vhafuni. Vha vha fara vha vha dzhenisa dzhele.

Nga ḽi tevhelaho vharangaphanḓa vha vhutendi vha ita muṱangano. Petro na Yohane, na munna we vha mu fhodza vha dzheniswa, vha vhudziswa: Ùvhu vhuṱolo no vhu ita nga afhio maanḓa?’

Petro a vha vhudza uri ndi nga maanḓa a Mudzimu, we a vusa Yesu vhafuni. Vhotshifhe vha si kone u hanedza uri vhuṱolo uho ho vha ho itea. Ngauralo vha vhudza vhaapostola uri vha songo tsha dovha vha amba nga ha Yesu, vha kona u vha ṱuwisa.

Maḓuvha a tshi ḓi ya vhaapostola vha ḓi ṱanziela nga ha Yesu na u fhodza vhalwadze. Mafhungo nga ha uvhu vhuṱolo a phaḓalala. Ngauralo na magogo a miḓini yo monaho Yerusalema a ḓisa vhalwadze uri vhaapostola vha vha fhodze. Izwi zwa ita uri vharangaphanḓa vha vhutendi vha vhe na vivho, ngauralo vha fara vhaapostola vha vha dzhenisa dzhele. Fhedzi vha si dzulese.

Vhukati ha vhusiku muruṅwa wa Mudzimu a vula muṋango wa dzhele, samusi ni tshi nga zwi vhona afha. Muruṅwa a ri: ‘Tshimbilani ni yo ima thembeleni, ni ḓi amba na vhathu.’ Nga matsheloni a tevhelaho, musi vharangaphanḓa vha vhutendi vha tshi ruma vhanna dzhele u dzhia vhaapostola, vho vha vha si tsheeho. Nga murahu vha vha wana vha tshi khou funza thembeleni vha vha ḓisa nḓuni ya Khaṱulo.

vharangaphanḓa vha vhutendi vha ri: ‘Ro ni laya uri ni sa tsha funza nga ha Yesu. Fhedzi no ḓadza Yerusalema nga pfunzo yaṋu.’ Vhaapostola vha fhindula: ‘Ri fanela u thetshelesa Mudzimu sa muvhusi nṱhani ha vhathu.’ Vha ḓi funza “mafhungo maḓifha.” Naa iyo a si tsumbedzo yavhuḓi ya uri ri i tevhele?

Mishumo dzindima 3 u ya kha 5.