Vhonani! gungwa ḽi khomboni! Ḽi khou pwashekana! Ni a vha vhona vhathu vho fhufhelaho maḓini? Vhaṅwe vha vho swika kha shango ḽo omaho. Ndi Paulo a re fhaḽa? Kha ri wane uri ho vha hu tshi khou itea mini khae.

Humbulani, miṅwaha mivhili Paulo o vha e tshivhotshwa Kesarea. Zwenezwo ene na zwiṅwe zwivhotshwa vha dzheniswa gungwani, vha thoma u ya Roma. Musi vha tshi fhira tsini na tshiṱangadzime tsha Kereta, vha rwiwa nga ḓumbu ḽihulu. Muya wa vhudzulesa lwe vhanna vha si kone u tshimbidza gungwa. Vha si vhone ḓuvha masiari kana dziṋaledzi vhusiku. Nga murahu ha maḓuvha manzhi, vho ṋamelaho vha sa tsha fulufhela u tshidzwa.

Zwenezwo Paulo a ima a ri: ‘A hu na na muthihi ane a ḓo xelelwa nga vhutshilo hawe; hu ḓo xela gungwa fhedzi. Ngauri madekwe muruṅwa wa Mudzimu o ḓa kha nṋe a ri, “U songo ofha, Paulo! U fanela u ima phanḓa ha muvhusi wa Roma Kesare. Mudzimu u ḓo tshidza vhoṱhe vhane vha khou tshimbila na iwe.”’

Vhukati ha vhusiku nga ḓuvha ḽa vhu-14 maḓumbu o no thoma, vhatshimbidzi vha vhona uri maḓi ho ngo tsha tsesa! Nga u ofha u kuḓana na matombo swiswini, vha posa maḓini tsimbi dza u imisa gungwa. Nga matsheloni a tevhelaho vha vhona khuda i re na muṱavha. Vha humbula u isa gungwa henengei.

Zwino, musi vha tshi sendela kha ḽo omaho, gungwa ḽa rwa philiphili ḽi si tsha tshimbila. Magabelo a thoma u ḽi pwasha, ḽa thoma u vha zwipiḓa. Mulangammbi we a vha e muhulwane a ri: ‘Vhoṱhe vha konaho u tala fhufhelani lwanzheni u thoma ni wetshele kha ḽo omaho. Vhaṅwe noṱhe ni fhufhe nga murahu havho, ni farelele zwiṅwe zwipiḓa zwa gungwa.’ Vha ita ngauralo. Nga yeneyi nḓila vhathu vha 276 vhe vha vha vhe gungwani vha swika kha ḽo omaho vho vhulungea, samusi muruṅwa o fulufhedzisa.

Tshiṱangadzime tsho vha tshi tshi vhidzwa Melite. Vhathu vha hone vha londa vho bvaho gungwani. Musi matshele a tshi vha khwine, Paulo a dzheniswa kha ḽiṅwe gungwa a iswa Roma.

Mishumo 27:1-44; 28:1-14.