Nganea 115: Paradiso Ntswa kha Ḽifhasi
Vhonani iyo miri milapfu, maluvha a u naka na dzithavha ndapfu. Naa a ho ngo naka afha? Vhonani uri ntsa i khou ḽa hani tshanḓani tsha mutukana muṱuku. Ni vhone dzindau na dzibere dzo imaho fhaḽa hatsini havhuḓi. Naa ni nga si tame u dzula nḓuni i re fhethuni ho tou raliho?
Yehova u ṱoḓa uri ni tshile nga hu sa fheli kha ḽifhasi paradisoni. Ha ṱoḓi uri ni vhe na zwiṱhavhi zwine vhathu vha ṱhuphea ngazwo ṋamusi. Kheḽi fulufhedziso ḽa kha vhane vha ḓo dzula paradisoni: ‘Mudzimu u ḓo vha navho. Lufu a lu tsha ḓo vha hone kana u lila kana tshiṱhavhi. Zwa kale zwo fhira.’
Yesu u ḓo vhona uri tshanduko i mangadzaho i a itea. Ni a ḓivha uri lini? Ee, o no ṱanzwa ḽifhasi vhuvhi na vhathu vhavhi. Humbulani, musi Yesu a kha ḽifhasi o fhodza vhathu vha malwadze oṱhe, a ita na u vusa vhafu. Yesu o ita izwi a sumbedza zwine a ḓo ita ḽifhasi ḽoṱhe musi o no vha Khosi ya muvhuso wa Mudzimu.
Edzanu humbula uri zwi ḓo naka hani paradisoni ntswa kha ḽifhasi! Yesu, na vhaṅwe vha vhane a vha khetha, u ḓo vha a tshi khou vhusa ṱaḓulu. Vhavhusi avha vha ḓo londa vhoṱhe kha ḽifhasi na u vhona uri vho takala. Kha ri vhone uri ri fanela u ita mini uri Yehova a ri fhe vhutshilo vhu sa fheli paradisoni yawe ntswa.
Ndzumbululo 21:3, 4; 5:9, 10; 14:1-3.
Mbudziso
- Ndi zwiimo zwifhio zwine Bivhili ya sumbedza uri ri ḓo ḓiphina ngazwo Paradisoni kha ḽifhasi?
- Bivhili yo fulufhedzisa mini vhane vha ḓo tshila Paradisoni?
- Yesu u ḓo ita lini uri heyi tshanduko yavhuḓi i itee?
- Musi Yesu e kha ḽifhasi, o ita mini zwine zwa sumbedza zwine a ḓo zwi ita musi e Khosi ya Muvhuso wa Mudzimu?
- Yesu khathihi na vhane a ḓo vhusa navho ṱaḓulu vha ḓo ita vhungoho vhufhio musi vha tshi vhusa ḽifhasi vhe ṱaḓulu?
Mbudziso dzo engedzeaho
- Vhalani Ndzumbululo 5:9, 10.
Ndi ngani ri tshi vha na fulufhelo uri vhane vha ḓo vhusa ḽifhasi Miṅwahani ya Tshigidi vha ḓo vha mahosi na vhotshifhe vha pfelaho vhuṱungu na vha re na khathutshelo? (Vha-Ef. 4:20-24; 1 Pet. 1:7; 3:8; 5:6-10)
- Vhalani Ndzumbululo 14:1-3.
Ndi mini zwi sumbedzwaho nga mbuno ya uri madzina a Khotsi na a Ngwana o vha o ṅwaliwa kha phanḓa dza vha 144 000? (1 Vha-Kor. 3:23; 2 Tim. 2:19; Ndzumb. 3:12)
