1, 2. Ri nga wana ngafhi fhethu ho tsireledzeaho hune ra nga khuda hone ṋamusi?

EDZANI u humbula ni tshi khou tshimbila badani musi wa ḓumbu ḽihulwane. Ha mbo ḓi nzwinzwimala. Ha penya, ha thathaba, nga murahu ha zwenezwo ha thoma u na mvula ya tshirulu. Na gidima ni tshi khou ṱoḓa fhethu hune na nga khuda hone. Nga thungo ha bada ni vhona tshifhaṱo tshine na nga khuda khatsho. Ndi tshifhaṱo tsho khwaṱhaho, tshi sa dzheni mvula, tsho kunaho. Henefho fhethu ni ḓo hu dzhia hu ha ndeme vhukuma!

² Ri khou tshila zwifhingani zwa khakhathi. Vhuimo ha shango vhu khou ṋaṋa u vhifha. Fhedzi hu na vhukhudo, fhethu hune ra nga shavhela hone uri ri tsireledzee. Ri nga khuda ngafhi? Ṱhogomelani zwine Bivhili ya zwi amba: ‘U vhukhudo hanga, Thavha yanga, Mudzimu wanga we nda mu fulufhedza!’—Psalme ya 91:2.

3. Ri nga ita mini uri Yehova a vhe vhukhudo hashu?

³ Edzani u humbula nga ha zwenezwo! Yehova, Musiki na Muvhusahoṱhe a nga vha  vhukhudo hashu. A nga ri tsireledza, ngauri u na maanḓa mahulwane u fhira naho e nnyi kana naho tshi tshini tshine tsha nga ri vhaisa. Naho arali ra vhaiswa, Yehova a nga fhelisa honoho vhuṱungu hoṱhe. Ri nga ita mini uri Yehova a vhe vhukhudo hashu? Ri tea u mu fulufhela. Zwiṅwe hafhu, Ipfi ḽa Mudzimu ḽi ri: “Ni ḓi-vhulungele ngomu lufunoni lwa Mudzimu.” (Yuda 21) Ee, ri fanela u dzula lufunoni lwa Mudzimu, nga u bvela phanḓa ri tshi funa Khotsi ashu wa ṱaḓulu. Ra ita zwenezwo ri ḓo khwaṱhisedzwa uri ndi vhukhudo hashu. Fhedzi ri nga dzula hani ri tshi mu funa?

4, 5. Ndi dzifhio dziṅwe nḓila dze Yehova a sumbedza ngadzo uri u a ri funa?

⁴ U itela uri ri dzule ri kha lufuno lwa Mudzimu, ri fanela u ṱhogomela nḓila ye Yehova a ri sumbedza ngayo uri u a ri funa. Humbulani nga ha dziṅwe pfunzo dza Bivhili dze na dzi guda kha yeneyi bugu. Samusi Yehova e Musiki, o ri ṋea ḽifhasi uri ḽi vhe haya hashu hu takadzaho. O ḽi ḓadza nga zwiḽiwa na maḓi, zwibveledzwa zwa mupo, zwipuka zwi takadzaho, na mupo wo nakaho. Samusi Mudzimu e Muṅwali wa Bivhili, o ri vhudza dzina ḽawe na pfaneleo dzawe. Zwiṅwe hafhu, Ipfi ḽawe ḽi dzumbulula uri o rumela Yesu, Murwa wawe ane a mu funa kha ḽifhasi, uri a shengele na u ri fela. (Yohane 3:16) Tshenetsho tshifhiwa tshi ri vhuyedza hani? Tshi ri ṋea fulufhelo ḽa vhumatshelo vhu mangadzaho.

⁵ Fulufhelo ḽashu ḽa vhumatshelo ḽi dovha ḽa ḓisendeka nga tshiṅwe tshithu tshe Mudzimu a tshi ita. Yehova o tika hulumeni wa ṱaḓulu, Muvhuso wa Vhumessia. Hu si kale u ḓo fhelisa tshengelo yoṱhe nahone wa ita uri ḽifhasi ḽi vhe paradiso. Edzani u humbula nga ha zwenezwo! Ri nga tshila kha ḽifhasi nga hu sa fheli nga mulalo na dakalo. (Psalme ya 37:29) Zwa zwino, Mudzimu o ri ṋea vhulivhisi ha nḓila ya khwine ine ra nga tshila ngayo ṋamusi. O dovha a ri ṋea tshifhiwa tsha thabelo, ine ya vha nḓila ine ra nga kona u amba nae ngayo tshifhinga tshiṅwe na tshiṅwe ro vhofholowa. Dzenedzi ndi nḓila dzi si gathi dze Yehova  a sumbedza ngadzo vhathu nga u tou angaredza uri u a vha funa u katela na inwi.

6. Ni nga sumbedza hani uri ni ṱanganedza lufuno lwe Yehova a ni sumbedza lwone?

⁶ Mbudziso ya ndeme ine na tea u i ṱhogomela ndi i tevhelaho: Ndi ḓo sumbedza hani uri ndi ṱanganedza lufuno lwa Yehova? Vhanzhi vha ḓo ri: “Na nṋe ndi tea u funa Yehova.” Naa ni ḓipfa nga yeneyo nḓila? Yesu o amba uri ndaela i tevhelaho ndi yone khulwanesa u fhira dzoṱhe: “Funa Murena Mudzimu wau nga mbilu yau yoṱhe na nga muya wau woṱhe na nga u ṱalukanya hau hoṱhe!” (Mateo 22:37) Vhukuma ni na zwiitisi zwinzhi zwa u funa Yehova Mudzimu. Fhedzi naa u ḓipfa ni na lwonolwo lufuno ndi zwone fhedzi zwine zwa katelwa kha u funa Yehova nga mbilu yaṋu yoṱhe, muya waṋu woṱhe, na u ṱalukanya haṋu hoṱhe?

7. Naa u funa Mudzimu ndi u sokou ḓipfa ri tshi mu funa fhedzi? Ṱalutshedzani.

⁷ Samusi zwo sumbedzwa Bivhilini, u funa Mudzimu a si u sokou ḓipfa u tshi mu funa fhedzi. Zwi re zwone ndi uri naho zwi zwa ndeme u ḓipfa ri tshi funa Yehova, eneo maḓipfele ndi mathomo zwao a u mu funa nga nḓila ya vhukuma. Hu ṱoḓea uri ni ṱavhe mbeu ya muapula u itela uri hu mele muapula u aṋwaho mitshelo. Naho zwo ralo, arali ni tshi ṱoḓa apula naa ni nga takala arali muthu a ni ṋea mbeu ya muapula? Na kathihi! Nga hu fanaho, u ḓipfa ni tshi funa Yehova Mudzimu ndi mathomo zwao. Bivhili i funza uri: “U funa Mudzimu ndi u ita zwe a ri laya nahone milayo yawe a i konḓi.” (1 Yohane 5:3) U itela uri zwi vhonale uri zwa vhukuma ri funa Mudzimu, ri fanela u aṋwa mitshelo yavhuḓi. Ri fanela u zwi sumbedza nga mishumo.—Mateo 7:16-20.

8, 9. Ri nga sumbedza hani uri ri funa Mudzimu nahone ri a mu livhuha?

⁸ Ri sumbedza u funa Mudzimu musi ri tshi tevhela ndaela dzawe na u shumisa maitele awe. A zwi tou konḓa-vho lini u ita nga u ralo. A si muhwalo ngauri milayo ya Yehova yo itelwa u ri  thusa uri ri tshile vhutshilo havhuḓi, vhu takadzaho, vhu fushaho. (Yesaya 48:17, 18) Arali ra tshila u tendelana na vhulivhisi ha Yehova, ri sumbedza Khotsi ashu wa ṱaḓulu uri ngangoho ri a livhuha zwoṱhe zwe a ri itela zwone. Zwi ṱungufhadzaho ndi uri ndi vha si gathi ṋamusi shangoni vhane vha sumbedza ndivhuho yo raloho. A ri ṱoḓi u sa livhuha, u fana na vhaṅwe vhathu vha tshifhingani tsha musi Yesu a tshee kha ḽifhasi. Yesu o fhodza vhathu vha fumi vha mapele, fhedzi ha vhuya muthihi fhedzi a mu livhuha. (Luka 17:12-17) Vhukuma, ri ṱoḓa u fana na houḽa we a livhuha, hu si havhaḽa vha ṱahe vhe vha sa livhuhe!

⁹ Nga zwenezwo-ha, ndi dzifhio ndaela dza Mudzimu dzine ra tea u dzi tevhela? Ro haseledza dzo vhalaho kha ino bugu, fhedzi kha ri vusuluse dzi si gathi. U tevhela ndaela dza Mudzimu zwi ḓo ri thusa uri ri dzule ri kha lufuno lwa Mudzimu.

10. Ṱalutshedzani uri ndi ngani zwi zwa ndeme u bvela phanḓa ri tshi dzhenisa nḓivho nga ha Yehova Mudzimu.

¹⁰ U guda nga ha Yehova ndi vhukando ha ndeme ha u sendela  tsini-tsini nae. Ndi maitele ane a tea u bvela phanḓa. Arali ni tshi khou ora mulilo nnḓa hu tshi khou rothola vhukuma, naa ni nga sokou litsha wonoyo mulilo u tshi dzima? Hai. Ni ḓo dzula ni tshi khou khuṱhedza uri u sa dzime. Vhutshilo haṋu vhu nga vha khomboni arali na sa ita nga u ralo! Samusi khuni dzi tshi ita uri mulilo u dzule u tshi khou duga, nga zwenezwo “u ḓivha Mudzimu” zwi ita uri lufuno lwashu kha Yehova lu dzule lwo khwaṱha.—Mirero 2:1-5.

11. Vhatevheli vha Yesu vho kwamea hani nga pfunzo yawe?

¹¹ Yesu u ṱoḓa uri vhatevheli vhawe vha dzule vha tshi funa nga ho khwaṱhaho Yehova na Ipfi ḽawe ḽa ndeme ḽa mafhungo-ngoho. Nga murahu ha mvuwo yawe, Yesu o funza vhafunziwa vhawe vhavhili vhuṅwe vhuporofita vhu re kha Maṅwalo a Luheberu he a vhu ḓadzisa. Ho vha na mvelelo ifhio? Nga murahu vho ri: “Nandi, mbilu dzashu dzo vha dzi si khou swa naa ngomu hashu, musi a tshi amba na riṋe rí nḓilani, musi a tshi ri vulela maṅwalo?”—Luka 24:32.

12, 13. (a) Ho itea mini kha lufuno lwe vhathu vhanzhi ṋamusi vha vha vhe nalwo nga ha Mudzimu na Bivhili? (b) Ri nga ita mini uri lufuno lwashu lu sa fhungudzee?

¹² Musi ni tshi pfa lwa u tou thoma zwine vhukuma Bivhili ya zwi funza, naa mbilu yaṋu a yo ngo fhufhuma dakalo, u fhisea na u funa Mudzimu? A zwi timatimisi uri zwo ralo. Vhanzhi vho ḓipfa nga yeneyo nḓila. Khaedu ndi u ita uri lwonolwo lufuno lu bvele phanḓa lu tshi fhufhuma na u lu ṱahulela uri lu aluwe. A ri ṱoḓi u tevhela mikhwa ya shango ḽa musalauno. Yesu o dzula o amba a ri: “Lufuno lwa vhanzhi lu ḓo fhungudzea.” (Mateo 24:12) Ni nga ita mini u itela uri nḓila ine na funa ngayo Yehova na mafhungo-ngoho a Bivhili i sa fhungudzee?

¹³ Bvelani phanḓa ni tshi dzhenisa nḓivho ya Yehova Mudzimu na Yesu Kristo. (Yohane 17:3) Elekanyani, kana ni humbule nga ho dzikaho nga zwine na zwi guda kha Ipfi ḽa Mudzimu, ni ḓivhudzise uri ‘Zwenezwi zwi mpfunza mini nga ha Yehova Mudzimu? Zwi nṋea tshifhio tshiṅwe tshiitisi tsha u mu funa nga mbilu yanga yoṱhe, u ṱalukanya hanga hoṱhe, na muya-tshivhili wanga woṱhe?’ (1 Timotheo 4:15) U elekanya ho raloho hu ḓo ita uri ni bvele phanḓa ni tshi funa Yehova nga ho khwaṱhaho.

14. Thabelo i nga ri thusa hani uri ri dzule ri tshi funa Yehova?

 ¹⁴ Iṅwe nḓila ine ra nga bvela ngayo phanḓa ri tshi funa Yehova nga ho khwaṱhaho ndi nga u rabela misi yoṱhe. (1 Vha-Thesalonika 5:17) Kha Ndima ya 17 ya yeneyi bugu, ro guda uri thabelo ndi tshifhiwa tsho khetheaho tshi bvaho ha Mudzimu. Samusi vhushaka ha vhathu vhu tshi khwaṱhiswa nga vhudavhidzano ha misi yoṱhe, vhu bvaho mbiluni, na vhushaka hashu na Yehova vhu ḓo dzula ho khwaṱha musi ri tshi mu rabela misi yoṱhe. Ndi zwa ndeme uri ri sa vhuye ra ita uri thabelo dzashu dzi vhe nyelelwa—u sokou dovholola maipfi a si na maḓipfele kana a sa ambi tshithu. Ri fanela u amba na Yehova u fana na ṅwana a tshi amba na khotsi awe ane a vha funa. Ri fanela u amba nae nga ṱhonifho, fhedzi ro vhofholowa, nga u fulufhedzea nahone zwi tshi bva mbiluni. (Psalme ya 62:8) Ee, u ḓigudisa Bivhili na thabelo i bvaho mbiluni ndi zwithu zwa ndeme kha vhurabeli hashu, nahone zwi ri thusa uri ri dzule ri kha lufuno lwa Mudzimu.

15, 16. Ndi ngani zwo tea uri ri dzhie mushumo wa u huwelela nga ha Muvhuso u ndugelo na dzanga?

¹⁵ U ḓigudisa Bivhili na u rabela ndi mishumo ya vhurabeli ine ra nga kha ḓi i ita tshiphirini. Naho zwo ralo, zwino kha ri ṱolisise sia ḽa vhurabeli ḽine ra ḽi ita khagala: u vhudza vhaṅwe zwine ra zwi tenda. Naa no no vhudza vhaṅwe mafhungo-ngoho a Bivhili? Arali zwo ralo, no ḓiphina nga ndugelo yo khetheaho. (Luka 1:74) Musi ri tshi vhudza vhaṅwe mafhungo-ngoho e ra a guda nga ha Yehova Mudzimu, ri khou ita mushumo wa ndeme vhukuma we wa ṋewa Vhakriste vhoṱhe—wa u huwelela mafhungo maḓifha a Muvhuso wa Mudzimu.—Mateo 24:14; 28:19, 20.

¹⁶ Muapostola Paulo o dzhia vhuḓinḓa hawe vhu ha ndeme, o vhu vhidza dzanga. (2 Vha-Korinta 4:7) U amba na vhathu nga ha Yehova Mudzimu na ndivho dzawe ndi mushumo wa khwine vhukuma u fhira yoṱhe ine na nga i ita. Ndi u shumela Muṋe wa khwine u fhira vhoṱhe, nahone wonoyu mushumo u a vhuyedza vhukuma. Nga u ṱanganela kha wonoyu mushumo, ni khou thusa vhathu vha fulufhedzeaho uri vha sendele tsini na Khotsi ashu  wa ṱaḓulu nahone vha dzhene nḓilani i isaho vhutshiloni vhu sa fheli! Ndi ufhio mushumo une wa nga fusha u fhira wonoyu? Zwiṅwe hafhu, u ṱanziela nga ha Yehova na Ipfi ḽawe zwi engedza lutendo lwashu na u khwaṱhisa nḓila ine ra mu funa ngayo. Nahone Yehova u dzhiela nṱha vhuḓidini haṋu. (Vha-Heberu 6:10)  U dzula no farakanea kha mushumo wo raloho zwi ni thusa uri ni dzule ni kha lufuno lwa Mudzimu.—1 Vha-Korinta 15:58.

17. Ndi ngani vhuḓinḓa ha Vhukriste ho ṱavhanyiswa ṋamusi?

¹⁷ Ndi zwa ndeme u humbula uri mushumo wa u huwelela nga ha Muvhuso wo ṱavhanyiswa. Bivhili i ri: “Huwelela fhungo, ima U khaḽo’ [nga ho ṱavhanyiswaho, NW].” (2 Timotheo 4:2) Ndi ngani u ita zwenezwi zwo ṱavhanyiswa ṋamusi? Ipfi ḽa Mudzimu ḽi a ri vhudza: “Ḽi tsini ḽeneḽo ḓuvha ḽihulu ḽa Yehova; ḽi tsini, ḽi khou tou vhilula ḽi tshi ḓa.” (Tsefanya 1:14) Ee, tshi khou ḓa nga u ṱavhanya tshifhinga tshine Yehova a ḓo fhelisa ngatsho ano maitele a zwithu. Vhathu vha tea u sevhiwa! Vha tea u ḓivha uri zwino ndi tshifhinga tsha u khetha Yehova uri a vhe Muvhusahoṱhe wavho. Vhufhelo a vhu ‘nga lengi.’—Habakuku 2:3.

18. Ndi ngani ri tshi tea u gwadamela Yehova khagala kathihi na Vhakriste vha ngoho?

¹⁸ Yehova u ṱoḓa uri ri mu gwadamele khagala kathihi na Vhakriste vha ngoho. Ndi ngazwo Ipfi ḽawe ḽi tshi ri: “Kha ri sedzane nga tshashu, ri ṱuṱuwedzane lufunoni na kha mishumo mivhuya. Ri songo bvafha u ya huné ra kuvhangana; ndi zwiné vhaṅwe vha ita. Ri fhembeledzane; zwihulwane, ri ralo ngauri na inwi ni a zwi vhona zwauri ḓuvha ḽi vho tsha.” (Vha-Heberu 10:24, 25) Musi ri tshi kuvhangana na vhatendi nga riṋe miṱanganoni ya Vhukriste, ri na tshibuli tshavhuḓi tsha u renda na u gwadamela Mudzimu washu ane ra mu funa. Ri a fhaṱana na u ṱuṱuwedzana.

19. Ri nga lwela hani u khwaṱhisa mbofho dza lufuno tshivhidzoni tsha Vhukriste?

¹⁹ Musi ri tshi kuvhangana na vhaṅwe vhagwadameli vha Yehova, ri khwaṱhisa mbofho dza lufuno na vhukonani tshivhidzoni. Ndi zwa ndeme uri ri sedze zwivhuya kha vhaṅwe, samusi Yehova a tshi sedza zwivhuya kha riṋe. Ni songo lavhelela u fhelela kha vhatendi nga inwi. Humbulani uri vhoṱhe vha kha vhuimo ho fhamba-fhambanaho siani ḽa nyaluwo ya muya, na u ri roṱhe ri a khakha. (Vha-Kolosa 3:13) Fhaṱani vhushaka vhuhulwane na vhane vha funa Yehova zwi tshi bva mbiluni, nahone zwenezwo zwi ḓo ita uri ni aluwe nga lwa muya. Ee, u gwadamela Yehova na vhahaṋu vha tshinnani na vha tshisadzini zwi ḓo ni thusa uri ni dzule ni kha lufuno lwa Mudzimu. Yehova u  lambedza hani vhane vha mu gwadamela nga u fulufhedzea nahone vha dzula vhe kha lufuno lwawe?

20, 21. “Vhutshilo vhu re vhutshilo nangoho,” ndi mini nahone ndi ngani vhu fulufhelo ḽavhuḓi?

²⁰ Yehova u lambedza vhashumeli vhawe vha fulufhedzeaho nga vhutshilo, fhedzi vhutshilo ha mufuda-ḓe? Naa zwa vhukuma ni khou tshila zwino? Vhunzhi hashu ri ḓo fhindula ra ri ee. Nga nṱhani ha uri ri a fema, ri a ḽa, nahone ri a nwa. Vhukuma zwenezwo zwi sumbedza uri ri khou tshila. Nahone musi ro takala vhukuma, ri nga kha ḓi ri, “Ngangoho ri khou ḓiphina nga vhutshilo zwino!” Naho zwo ralo, Bivhili i sumbedza uri vhukuma a huna muthu ane ngangoho ha nga ambiwa uri u khou tshila.

²¹ Ipfi ḽa Mudzimu ḽi ri ṱuṱuwedza uri ri “wane vhutshilo vhu re vhutshilo nangoho.” (1 Timotheo 6:19) Eneo maipfi a sumbedza uri “vhutshilo vhu re vhutshilo nangoho,” ndi tshithu tshine ra fulufhela u tshi wana tshifhingani tshi ḓaho. Ee, musi ro no fhelela, ri ḓo ḓiphina nga vhutshilo nga vhuḓalo, ngauri ri ḓo tshila nga nḓila ye Mudzimu a vha o livha uri ri tshile ngayo u thomani. Musi ri tshi ḓo vha ri tshi khou tshila paradisoni kha ḽifhasi ri na mutakalo wo fhelelaho, mulalo, na dakalo, ri ḓo ḓiphina nga “vhutshilo vhu re vhutshilo nangoho”—vhutshilo vhu sa fheli. (1 Timotheo 6:12) Naa ḽeneḽo a si fulufhelo ḽavhuḓi?

22. Ni nga ‘wana hani vhutshilo vhu re vhutshilo nangoho’?

²² Ri nga ‘wana hani vhutshilo vhu re vhutshilo nangoho’? Kha eneo mafhungo, Paulo o ṱuṱuwedza Vhakriste uri vha “ite zwivhuya” nahone “vha pfume u ita zwo nakaho.” (1 Timotheo 6:18) Nga zwenezwo-ha, zwi khagala uri zwi ḓisendeka nga maanḓa nga nḓila ine ra shumisa ngayo mafhungo-ngoho e ra a guda Bivhilini. Fhedzi naa Paulo o vha a tshi khou amba uri ri wana “vhutshilo vhu re vhutshilo nangoho” nga u ita zwivhuya? Hai, ngauri zwenezwo zwilavhelelwa zwi mangadzaho zwi ḓisendeka tshoṱhe nga u wana “tshilidzi tshi songo ri fanelaho” tshi bvaho ha Mudzimu. (Vha-Roma 5:15, vhambedzani NW.) Naho zwo ralo, Yehova u takalela u lambedza vhane vha mu shumela  nga u fulufhedzea. U ṱoḓa u ni vhona ni tshi tshila “vhutshilo vhu re vhutshilo nangoho.” Vhutshilo ho raloho vhu sa fheli vhu takadzaho, ha mulalo, vhu ḓo waniwa nga vhane vha dzula vhe kha lufuno lwa Mudzimu.

23. Ndi ngani zwi zwa ndeme u dzula ri kha lufuno lwa Mudzimu?

²³ Muṅwe na muṅwe washu u tea u ḓivhudzisa uri, ‘Naa ndi khou gwadamela Mudzimu nga nḓila ye a i ṱalutshedza Bivhilini?’ Arali ra ita vhungoho ha uri ḓuvha ḽiṅwe na ḽiṅwe ri tendelana na yeneyo mbudziso, zwi ḓo amba uri ro fara nḓila yone. Ri nga vha na fulufhelo ḽa uri Yehova ndi vhukhudo hashu. U ḓo tsireledza vhathu vhawe vha fulufhedzeaho kha maḓuvha a vhufhelo a re na khakhathi a ano maitele a kale a zwithu. Yehova u ḓo dovha a ri dzhenisa kha maitele maswa a zwithu a re tsini zwino. Zwi ḓo takadza lungafhani u vhona tshenetsho tshifhinga! Nahone ri ḓo takalela lungafhani u ḓivha uri ro ita khetho dzavhuḓi kha ano maḓuvha a vhufhelo! Arali na ita khetho dzo raloho zwino, ni ḓo ḓiphina nga “vhutshilo vhu re vhutshilo nangoho,” u tshila nga nḓila ye Yehova Mudzimu a vha o i livha, lini na lini!