BIVHILI a i ri vhudzi uri Yesu o bebwa lini. Naho zwo ralo, i ri ṋea tshiitisi tshi pfalaho tsha u phetha nga ḽa uri ho ngo bebwa nga December.

Kha ri ṱolisise vhuimo ha mutsho nga tshenetsho tshifhinga tsha ṅwaha ngei Betlehema, he Yesu a bebelwa hone. Ṅwedzi wa Tshiyuda wa Chislev (u tshimbidzanaho na November na December) wo vha u ṅwedzi wa mutsho u rotholaho na wa mvula. Ṅwedzi u tevhela wonoyo wo vha u wa Tebeth (December na January). Wo vha u ṅwedzi u rotholaho u fhira yoṱhe kha ṅwaha, nga tshiṅwe tshifhinga hu tshi vha na mahaḓa dzithavhani. Kha ri vhone zwine Bivhili ya ri vhudza zwone nga ha mutsho wa ḽeneḽo dzingu.

Esera, muṅwali wa Bivhili u sumbedza uri Chislev wo vha u ṅwedzi u ḓivhelwaho u vha na mutsho u rotholaho na mvula. Nga murahu ha u amba uri mavhuthu o vha o kuvhangana Yerusalema nga “ḓuvha ḽa mahumi mavhili ḽa ṅwedzi wa vhuṱanu-na-vhuṋa [Chislev],” Esera o vhiga uri vhathu vho vha vha tshi khou “tetemela . . . nga mvula ye ya vha i tshi na.” Malugana na  vhuimo ha mutsho ha tshenetsho tshifhinga tsha ṅwaha, vhathu vhe vha vha vho kuvhangana vho ri: “Ndi tshifhinga tsha mibvumbi a huna na ane a ima nnḓa.” (Esera 10:9, 13; Yeremia 36:22) Ndi ngazwo vhalisa vhane vha dzula kha tshenetsho tshipiḓa tsha shango vho ita vhungoho ha uri vha sa vhe nnḓa na miṱambi yavho vhusiku nga ṅwedzi wa December!

Naho zwo ralo, Bivhili i vhiga uri vhalisa vho vha vhe mathaga vha tshi khou lisa miṱambi yavho vhusikuni he Yesu a bebwa ngaho. Zwi re zwone ndi uri Luka muṅwali wa Bivhili u sumbedza uri nga tshenetsho tshifhinga vhalisa vho vha “vho bva mathaga, vha tshi khou lisa miṱambi yavho vhusiku” tsini na Betlehema. (Luka 2:8-12) Ṱhogomelani uri vhalisa vho vha vha tshi khou dzula nnḓa, hu si u sokou tshimbila-tshimbila nnḓa nga masiari. Fhedzi vho vha vhe na miṱambi yavho mathaga vhusiku. Naa vhathu vho vha vha tshi nga dzula nnḓa ngei Betlehema nga December hu tshi khou rothola nahone hu tshi khou na mvula? Hai! Nga zwenezwo zwiimo zwe zwa vha zwi hone tshifhingani tsha u bebwa ha Yesu zwi sumbedza uri ho ngo bebwa nga December. *

Ipfi ḽa Mudzimu ḽi ri vhudza nga ho livhaho uri Yesu o fa lini, fhedzi a ḽi sumbedzi nga ho livhaho uri o bebwa lini. Hezwi zwi ri humbudza maipfi a Khosi Salomo ane a ri: “Dzina ḽavhuḓi ḽi fhira tshiḓolo tshavhuḓi, ḓuvha ḽa u fa hawe ḽi fhira ḽa u bebwa hawe.” (Muhuweleli 7:1) Nga zwenezwo, a zwi mangadzi uri Bivhili i ṋea zwidodombedzwa zwinzhi nga ha vhuḓinḓa ha Yesu na lufu lwawe, fhedzi i ṋea zwidodombedzwa zwi si gathi nga ha tshifhinga tsha u bebwa hawe.