MUSI ni tshi vhala gurannḓa iṅwe na iṅwe. Ni tshi sedza thelevishini, kana ni tshi thetshelesa radio. Huna mafhungo manzhi a ambaho nga ha vhuvemu, nndwa, na vhutherorisi! Humbulani nga ha vhuleme vhune na vha naho. Khamusi ni khou tsikeledzwa vhukuma nga vhulwadze kana nga u felwa nga muthu ane na mu funa. Ni nga kha ḓi ḓipfa nga nḓila i fanaho na ya munna o lugaho ane a pfi Yobo, we a amba uri o welwa nga “tsiku.”—Yobo 10:15.

Ḓivhudziseni mbudziso dzi tevhelaho:

• Naa yeneyi ndi ndivho ya Mudzimu nga nṋe na nga vhaṅwe vhathu vhoṱhe?

• Ndi ngafhi hune nda nga wana hone thuso u itela uri ndi kone u konḓelela vhuleme hanga?

• Naa hu na fulufhelo ḽa uri ri ḓo tshila nga mulalo fhano kha ḽifhasi?

Bivhili i ṋekedza phindulo dzi fushaho dza dzenedzi mbudziso.

• “U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone.”—Ndzumbululo 21:4

• “Ndi hone wa tshihole a tshi ḓo fhufha vhunga phala.”—Yesaya 35:6

• “Ndi hone hu tshi ḓo bonyolowa maṱo a mabofu.”—Yesaya 35:5

•  “Vhoṱhe vha re zwaloni vha ḓo . . . bvelela.”—Yohane 5:28, 29

• “Kha vho dzulaho fhano a huna ane a ḓo ri: Ndi a lwala.”—Yesaya 33:24

• “Shangoni hu ḓo vha na muḓalo wa mavhele.”—Psalme ya 72:16

Ni songo ṱavhanya na dzhia zwi re kha masiaṱari o fhiraho sa zwithu zwine zwa khou sokou humbulelwa-vho. Mudzimu o fulufhedzisa uri u ḓo ḓisa zwenezwo zwithu, nahone Bivhili i ṱalutshedza nḓila ine a ḓo zwi ita ngayo zwenezwo.

Fhedzi Bivhili i vhuyedza na nga dziṅwe nḓila nnzhi. I sumbedza nḓila ine na nga ḓiphina ngayo nga vhutshilo zwa zwino. Humbulani nga ha mbilaelo dzaṋu na vhuleme vhune na vha naho. Zwi nga kha ḓi katela mafhungo a tshelede, vhuleme ha muṱani, u lwala, kana u felwa nga muthu ane na mu funa. Bivhili i nga ni thusa uri ni kone u konḓelela vhuleme ṋamusi, nahone i nga ni ṋea mbofholowo nga u fhindula mbudziso dzi ngaho:

• Ndi ngani ri tshi shengela?

• Ri nga sedzana hani na mbilaelo dza vhutshilo?

• Ri nga ita hani uri vhutshilo ha muṱa washu vhu takadze?

• Hu itea mini kha riṋe musi ri tshi fa?

• Naa ri ḓo dovha ra vhona vhane ra vha funa vho faho?

• Ri nga vha hani na vhuṱanzi ha uri Mudzimu u ḓo ḓadzisa mafulufhedziso awe a tshifhingani tshi ḓaho?

 U vhala haṋu ino bugu zwi sumbedza uri ni ṱoḓa u ḓivha zwine Bivhili ya zwi funza. Heyi bugu i ḓo ni thusa. Ṱhogomelani uri phara iṅwe na iṅwe i na mbudziso dzine dza tshimbidzana nayo magumoni a siaṱari. Vhathu vha dzimilioni vho ḓiphina nga u shumisa dzimbudziso na dziphindulo musi vha tshi khou haseledza Bivhili na Ṱhanzi dza Yehova. Ri fulufhela uri na inwi ni ḓo ḓiphina-vho. U nga ri Mudzimu a nga ni fhaṱutshedza musi ni tshi khou ḓiphina nga tshenzhelo dzi nyanyulaho na dzi fushaho dza u guda zwine Bivhili ya zwi funza zwa vhukuma!