BUGU ya Ndzumbululo i na mibulo ine ya sa fanele u dzhiiwa nga ho livhaho. (Ndzumbululo 1:1) Sa tsumbo, i amba nga ha musadzi o ṅwaliwaho dzina ḽa uri “Babele Ḽihulu” kha phanḓa yawe. I dovha ya amba uri onoyu musadzi o dzula kha “dzitshakha na mavhuthu.” (Ndzumbululo 17:1, 5, 15) Samusi hu si na musadzi wa vhukuma ane a nga ita zwenezwi, Babele Ḽihulu ḽi fanela u vha ḽi  ḽa pfanyisedzo. Ngauralo, yeneyi phombwe ya pfanyisedzo i imela mini?

Kha Ndzumbululo 17:18, onoyo musadzi wa pfanyisedzo u ṱaluswa sa “muḓi muhulu u re na vhuhosi ha mahosi oṱhe.” Ipfi “muḓi” ḽi sumbedza uri ndi tshigwada tsho dzudzanywaho tsha vhathu. Samusi “muḓi muhulu” u tshi vhusa “mahosi oṱhe,” musadzi ane a pfi Babele Ḽihulu hu fanela u vha hu dzangano ḽi re na ṱhuṱhuwedzo kha mashango oṱhe. Zwo tea uri ḽi vhidzwe muvhuso wa shango. Ndi muvhuso-ḓe? Wa vhurereli. Ṱhogomelani nḓila ine dziṅwe ndimana dza bugu ya Ndzumbululo dza ita ngayo uri ri swikelele kha yeneyi phetho.

Muvhuso u nga vha wa politiki, wa zwa vhubindudzi, kana wa vhurereli. Musadzi ane a pfi Babele Ḽihulu a si muvhuso wa politiki ngauri Ipfi ḽa Mudzimu ḽi amba uri “mahosi a shango,” kana miraḓo ya politiki ya ḽino shango, i ita “vhupombwe” nae. Vhupombwe hawe zwi amba u konana hawe na vhavhusi vha ḽino ḽifhasi nahone ndi ngazwo a tshi vhidzwa “phombwe khulu.”—Ndzumbululo 17:1, 2; Yakobo 4:4.

Babele Ḽihulu a si muvhuso wa zwa vhubindudzi nga uri “vhadzia-u-rengisa,” vhane vha imela vhoramabindu, vha ḓo lilela u fheliswa haḽo. Zwi re zwone ndi uri mahosi na vhadzia-u-rengisa vha ṱaluswa sa vhane vha sedza Babele Ḽihulu vho imela “kule.” (Ndzumbululo 18:3, 9, 10, 15-17) Nga zwenezwo, zwi a pfala u phetha nga ḽa uri Babele Ḽihulu a si muvhuso wa zwa politiki kana zwa vhubindudzi, fhedzi ndi muvhuso wa zwa vhurereli.

Zwine zwa sumbedza uri Babele Ḽihulu ndi muvhuso wa zwa vhurereli zwi dovha zwa khwaṱhisedzwa nga mafhungo a uri ḽi fhura dzitshakha nga “vhuṅanga” haḽo. (Ndzumbululo 18:23) Samusi mifuda yoṱhe ine ya tshimbidzana na zwa vhuṅanga i ya vhurereli nahone i tshi bva kha vhudimoni, ndi ngazwo Bivhili i tshi vhidza Babele Ḽihulu uri ndi “vhudzulo ha zwirunzi zwivhi.” (Ndzumbululo 18:2; Doiteronomio 18:10-12) Wonoyu muvhuso u dovha wa ṱaluswa sa une wa lwisana na vhurereli ha ngoho nga ho khwaṱhaho, u tovhola “vhaporofita” na “vhakhethwa.” (Ndzumbululo 18:24) Zwi re zwone ndi uri Babele Ḽihulu ḽi vhenga vhukuma vhurereli ha ngoho lune ḽi tovhola nga tshiṱuhu na u vhulaha “ṱhanzi dza Yesu.” (Ndzumbululo 17:6) Nga zwenezwo, onoyu musadzi ane a pfi Babele Ḽihulu u imela muvhuso wa shango wa vhurereli ha mazwifhi, zwine zwa katela vhurereli hoṱhe vhune ha lwisana na Yehova Mudzimu.