1, 2. Ṋeani tsumbo dza vhaṅwe vhathu vhe Yehova a vha dzhia vhe khonani dzawe khulwane.

NDI muthu-ḓe ane na ṱoḓa uri a vhe khonani yaṋu? Zwi vhonala uri ni ḓo ṱoḓa muthu ane a vha na mavhonele, madzangalelo, na matshilele a fanaho na aṋu. Nahone ni ḓo kungwa nga muthu ane a vha na pfaneleo dzavhuḓi, dzi ngaho u fulufhedzea na vhulenda.

² Kha ḓivhazwakale yoṱhe, Mudzimu o khetha vhaṅwe vhathu uri vha vhe khonani dzawe khulwane. Sa tsumbo, Yehova o vhidza Abrahamu uri ndi khonani yawe. (Yesaya 41:8; Yakobo 2:23) Mudzimu o amba uri Davida ndi “munna ané mbilu yanga ya mu takalela” nga ṅwambo wa uri o vha e muthu ane Yehova a mu funa. (Mishumo 13:22) Nahone Yehova o amba uri muporofita Daniele ndi “mufuniwa.”—Daniele 9:23.

3. Ndi ngani Yehova a tshi khetha vhaṅwe vhathu uri vha vhe khonani dzawe?

³ Ndi ngani Yehova o dzhia Abrahamu, Davida, na Daniele vhe khonani dzawe? O vhudza Abrahamu a ri: ‘Wo pfa ipfi ḽanga.’ (Genesi 22:18) Nga zwenezwo, Yehova u sendela tsini na vhane vha ita zwine a zwi funa nga u ḓiṱukufhadza. O vhudza Vhaisiraele a ri: “Thetshelesani zwine nda ni vhudza, ndi hone ndi tshi ḓo vha Mudzimu waṋu, inwi na vha vhathu vhanga.”  (Yeremia 7:23) Arali na thetshelesa Yehova, na inwi-vho ni nga vha khonani yawe!

4, 5. Yehova u vhonadza hani maanḓa awe a tshi itela vhathu vhawe?

⁴ U vha na vhukonani na Mudzimu zwi a vhuyedza vhukuma. Bivhili i amba uri Yehova u khou ṱoḓa ‘u vhonadza maanḓa awe kha ane a mu nambatela nga mbilu yoṱhe.’ (2 Koronika 16:9) Yehova a nga vhonadza hani maanḓa awe a tshi itela inwi? Iṅwe nḓila yo sumbedzwa kha Psalme ya 32:8, hune ra vhala uri: “Ndi ḓo U funza nda U sumbedza nḓila iné wa pfi U i fare; ndi ḓo U dededza nga maṱo anga.”

⁵ Ndi maipfi avhuḓi lungafhani a kwamaho mbilu a sumbedzaho ṱhogomelo ya Yehova! U ḓo ni ṋea vhulivhisi vhu ṱoḓeaho nahone a ni tsireledza musi ni tshi khou vhu shumisa. Mudzimu u ṱoḓa u ni thusa uri ni konḓelele milingo yaṋu. (Psalme ya 55:22) Nga zwenezwo, arali na shumela Yehova nga mbilu yoṱhe, ni nga vha na fulufhelo u fana na mupsalme we a ri: “Ndo dzula ndó lavhelesa Yehova; u ima na nṋe uri ndi si dzinginyee.” (Psalme ya 16:8; 63:8) Ee, Yehova a nga ni thusa uri ni tshile nga nḓila ine ya mu takadza. Fhedzi samusi ni tshi zwi ḓivha, huna swina ḽa Mudzimu ḽine ḽa ḓo ṱoḓa u ni thivhela uri ni sa kone u ita zwenezwi.

6. Sathane o amba mini nga ha vhathu?

⁶ Ndima ya 11 ya yeneyi bugu yo ṱalutshedza nḓila ye Sathane Diabolo a itela ngayo khaedu vhuvhusahoṱhe ha Mudzimu. Sathane o pomoka Mudzimu nga mazwifhi nahone a amba uri o vha o khakha nga u sa tendela Adamu na Eva vha tshi ḓiphethela zwo lugaho na zwo khakheaho. Musi Adamu na Eva vho no ita tshivhi nahone ḽifhasi ḽi tshi thoma u ḓala nga vhana vhavho, Sathane o timatima tshiṱuṱuwedzi tsha vhathu vhoṱhe. Sathane o ri: “Vhathu a vha shumeli Mudzimu nga ṅwambo wa uri vha a mu funa. Nṋeeni tshibuli, nahone ndi nga ita uri muṅwe na muṅwe wavho a shandukele Mudzimu.”  Mafhungo a munna ane a pfi Yobo a sumbedza uri zwenezwi ndi zwe Sathane a vha a tshi zwi tenda. Yobo o vha e nnyi, nahone o katelwa hani kha khaedu ya Sathane?

7, 8. (a) Ndi mini zwe zwa ita uri Yobo a swayee kha vhathu vhoṱhe vha misini yawe? (b) Sathane o timatima hani tshiṱuṱuwedzi tsha Yobo?

⁷ Yobo o tshila miṅwahani ya 3 600 yo fhiraho. O vha e munna muvhuya, ngauri Yehova o ri: “A huna ane a nga ene kha shango ḽoṱhe, muthu muvhuya, wa u luga na wa u ofha Mudzimu, a sá pfani na zwivhi.” (Yobo 1:8) Yobo o vha a tshi takadza Mudzimu.

⁸ Sathane o timatima tshiṱuṱuwedzi tsha Yobo tsha u shumela Mudzimu. Diabolo o vhudza Yehova a ri: “Naa a si Iwe we [Yobo] wa mu fhaṱela khura dza u tanga ene, na muṱa wawe, na zwoṱhe zwi re zwawe? Mishumo ya zwanḓa zwawe i fhaṱutshedzwa nga Iwe; masambi awe a ḓi anda a tshi ya, ó ḓala shango ḽoṱhe. Hone, edzou isa tshanḓa tshau U dzhie zwoṱhe zwine a vha nazwo’, U vhone a tshi ḓo U ṱala.”—Yobo 1:10, 11.

9. Yehova o aravha hani khaedu ya Sathane, nahone ndi ngani?

⁹ Nga zwenezwo, Sathane o amba uri Yobo u shumela Mudzimu u itela u ḓivhuyedza. Diabolo o dovha a amba uri arali Yobo a lingwa, o vha a tshi ḓo shandukela Mudzimu. Yehova o aravha hani khaedu ya Sathane? Samusi khani yo vha i tshi kwama tshiṱuṱuwedzi tsha Yobo, Yehova o tendela Sathane a tshi linga Yobo. Zwenezwi zwo vha zwi tshi ḓo sumbedza zwavhuḓi arali Yobo o vha a tshi funa Mudzimu kana a sa mu funi.

10. Yobo o welwa nga milingo ifhio, nahone o aravha hani?

¹⁰ Sathane o mbo ḓi linga Yobo nga nḓila dzo vhalaho. Zwiṅwe zwa zwifuwo zwa Yobo zwo tswiwa, nahone zwiṅwe zwa vhulahwa. Ha vhulahwa vhunzhi ha vhalanda vhawe. Hezwi zwa sia Yobo e mushai. Maṅwe makhaulambilu o vha u vhulahwa ha vhana vha Yobo vha fumi nga ḓumbu. Naho zwo ralo, hu sa londwi zwenezwi zwiitea zwi ofhisaho “Yobo ha ngo tshinya, ha ngo halalela Mudzimu.”—Yobo 1:22.

11. (a) Ndi u pomoka hufhio ha vhuvhili he Sathane a hu shata Yobo, nahone Yehova o aravha hani? (b) Yobo o aravha hani musi o farwa nga vhulwadze hawe vhu vhavhaho?

 ¹¹ Sathane ho ngo ṅala. U fanela u vha o humbula uri naho Yobo a tshi nga kona u konḓelela u xelelwa nga thundu dzawe, vhalanda vhawe, na vhana vhawe, a nga shandukela Mudzimu arali a lwala. Nga zwenezwo Yehova a tendela Sathane a tshi rwa Yobo nga vhulwadze vhu nengisaho, vhu vhavhaho. Fhedzi na zwenezwi a zwo ngo ita uri Yobo a fhelelwe nga lutendo lwawe kha Mudzimu. Nṱhani hazwo, o amba o khwaṱha a ri: “Ndi fa na ḽeneḽo ḽa u ri: A thi na tshe nda tshinya.”—Yobo 27:5.

12. U fulufhedzea ha Yobo ho sumbedza hani uri khaedu ya Diabolo yo vha i mazwifhi?

¹² Yobo o vha a sa zwi ḓivhi uri khakhathi dze dza mu wela dzo bveledzwa nga Sathane. Nga ṅwambo wa uri Yobo o vha a sa ḓivhi zwidodombedzwa zwa khaedu ye Diabolo a i itela vhuvhusahoṱhe ha Yehova, o humbula u nga vhuleme hawe vhu bva ha Mudzimu. (Yobo 6:4; 16:11-14) Naho zwo ralo, o bvela phanḓa a tshi fulufhedzea kha Yehova. Nahone u fulufhedzea ha Yobo ho sumbedza uri zwo ambiwaho nga Sathane uri Yobo u shumela Mudzimu nga zwiitisi zwa tseḓa, o vha e mazwifhi!

13. U fulufhedzea ha Yobo kha Mudzimu ho vha na mvelelo dzifhio?

¹³ U fulufhedzea ha Yobo ho ita uri Yehova a kone u fhindula nga ho khwaṱhaho khaedu ya Sathane ya lunyadzo. I ngoho, Yobo o vha e khonani ya Yehova, nahone Mudzimu o mu lambedza nge a fulufhedzea.—Yobo 42:12-17.

14, 15. Ndi ngani ri tshi nga amba uri khaedu ya Sathane ine ya kwama Yobo i shuma kha vhathu vhoṱhe?

¹⁴ Khani ya u fulufhedzea kha Mudzimu ye ya takuswa nga Sathane yo vha i songo livhiselwa kha Yobo fhedzi. Na inwi ni a kwamea. Hezwi zwi sumbedzwa zwavhuḓi kha Mirero 27:11, hune Ipfi ḽa Yehova ḽa ri: “Ṅwana’nga, ṱalifha, U takadze mbilu yanga; ndi kone u hanedza vha u nnyadza.” Enea maipfi, e a ṅwalwa maḓanani a miṅwaha Yobo o no fa, a sumbedza  uri Sathane o vha a tshi kha ḓi nyadza Mudzimu na u pomoka vhashumeli Vhawe. Arali ra tshila nga nḓila ine ya takadza Yehova, zwi re zwone ndi uri ri mu thusa u fhindula mazwifhi a Sathane, nahone nga yeneyo nḓila ri takadza mbilu ya Mudzimu. Ni ḓipfa hani nga zwenezwo? Naa zwi nga si takadze u vha na mukovhe kha u fhindula mazwifhi a Diabolo, naho arali zwi tshi amba u ita dziṅwe tshanduko vhutshiloni haṋu?

¹⁵ Ṱhogomelani uri Sathane o ri: “Zwoṱhe zwine muthu a vha nazwo’, a nga zwi bvisa a tshi lamulela vhutshilo hawe.” (Yobo 2:4, maḽeḓeretsendama ndi ashu.) Musi Sathane a tshi amba uri “muthu,” o zwi bvisela khagala uri o vha a tshi khou pomoka vhathu vhoṱhe, hu si Yobo fhedzi. Yeneyo ndi mbuno ya ndeme vhukuma. Sathane u timatima u fulufhedzea haṋu kha Mudzimu. Diabolo u ṱoḓa uri ni sa thetshelese Mudzimu nahone ni ṱutshele buḓo ḽo lugaho musi hu tshi vha na vhuleme. Sathane u lingedza hani u ita zwenezwi?

16. (a) Sathane u shumisa maitele afhio u itela u lingedza u pambusa vhathu uri vha sa shumele Mudzimu? (b) Diabolo a nga shumisa hani enea maitele kha inwi?

¹⁶ Samusi zwo haseledzwa kha Ndima ya 10, Sathane u shumisa nḓila dzo fhamba-fhambanaho u lingedza u pambusa vhathu uri vha sa shumele Mudzimu. Kha ḽiṅwe sia, u vutshela “vhunga ndau i vhombaho, iné ya ṱoḓa ané ya mu mila.” (1 Petro 5:8) Nga zwenezwo, ṱhuṱhuwedzo ya Sathane i nga vhonala musi dzikhonani, mashaka, kana vhaṅwe vha tshi ni pikisa musi ni tshi ita vhuḓidini ha u guda Bivhili na u shumisa zwine na zwi guda. * (Yohane 15:19, 20) Kha ḽiṅwe sia, Sathane u “ḓi-kanganyedza a ḓi-ita muruṅwa wa tshedza.” (2 Vha-Korinta 11:14) Diabolo a nga shumisa nḓila dzi sa vhonali u itela u ni fhura na u ni kunga uri ni sa tshile nga nḓila ine ya takadza Mudzimu. A nga dovha a ni kula nungo, khamusi a ni ita uri ni vhone u nga ni nga si kone u tshila nga  nḓila ine ya takadza Mudzimu. (Mirero 24:10) Hu sa londwi uri Sathane u ḓiita “ndau i vhombaho” kana “muruṅwa wa tshedza,” ho ngo shandula khaedu yawe: Ú amba uri musi no sedzana na milingo, ni ḓo litsha u shumela Mudzimu. Ni nga fhindula hani khaedu yawe na dzula ni tshi fulufhedzea kha Mudzimu, u fana na Yobo?

17. Ndi tshifhio tshiitisi tshihulwane tsha u thetshelesa milayo ya Yehova?

¹⁷ Ni nga fhindula khaedu dza Sathane nga u tshila nga nḓila ine ya takadza Mudzimu. Zwenezwi zwi katela na mini? Bivhili i a fhindula: “Yehova Mudzimu wau U mu fune nga mbilu yau yoṱhe, na nga muya wau woṱhe; na nga maanḓa au oṱhe.” (Doiteronomio 6:5) Musi ni tshi khou ḓi bvela phanḓa u funa Mudzimu, ni ḓo tama u ita zwine a zwi lavhelela kha inwi. Muapostola Yohane o ṅwala a ri: “U funa Mudzimu ndi u ita zwe a ri laya.” Arali ni tshi funa Yehova nga mbilu yaṋu yoṱhe ni ḓo zwi ṱhogomela uri “milayo yawe a i konḓi.”—1 Yohane 5:3.

18, 19. (a) Ndi ifhio miṅwe milayo ya Yehova? (Sedzani bogisi ḽi re kha siaṱari 122.) (b) Ri zwi ḓivha hani uri Mudzimu ha lavheleli zwinzhi vhukuma kha riṋe?

¹⁸ Milayo ya Yehova ndi ifhio? Miṅwe yayo i katela mikhwa ine ra fanela u i iledza. Sa tsumbo, ṱhogomelani  bogisi ḽine ḽa tshimbidzana na yeneyi thero kha siaṱari 122, ḽi re na tshiṱoho tshine tsha ri “Iledzani Zwine Yehova A Zwi Vhenga.” Henefho ni ḓo wana ho tevhekanyiswa mikhwa ine Bivhili ya i sasaladza nga ho livhaho. Miṅwe ya yeneyo mikhwa i nga kha ḓi vhonala i si mivhi arali ni songo i ṱolisisa zwavhuḓi. Fhedzi musi no no elekanya nga maṅwalo o sumbedzwaho henefho, ni nga kha ḓi vhona zwi vhuṱali u shumisa milayo ya Yehova. Zwi nga kha ḓi ni konḓela vhukuma u ita tshanduko kha nḓila ine na tshila ngayo. Fhedzi u tshila nga nḓila ine ya takadza Mudzimu zwi a fusha na u takadza vhukuma. (Yesaya 48:17, 18) Nahone ni nga zwi kona. Ri zwi ḓivha hani zwenezwo?

¹⁹ Yehova a nga si vhuye a lavhelela uri ri ite zwithu zwine  zwa nga ri konḓela. (Doiteronomio 30:11-14) U a ḓivha vhukoni hashu na zwine ra si kone u zwi swikelela u ri fhira. (Psalme ya 103:14) Zwiṅwe hafhu, Yehova a nga ri ṋea nungo uri ri kone u mu thetshelesa. Muapostola Paulo o ṅwala a ri: “Mudzimu hone u a fulufhedzea; ha nga tendi ní tshi lingiwa luné ni sa ḓo lu kona! Tshawe ndi u ri a tshi vhea mulingo, a vhea na tshivhana tshiné na kona u sera ngatsho’.” (1 Vha-Korinta 10:13) Yehova a nga ni thusa uri ni konḓelele nga u ni ṋea ‘maanḓa mahulwane.’ (2 Vha-Korinta 4:7) Nga murahu ha u konḓelela milingo minzhi, Paulo o ri: “Zwoṱhe ndi zwi kona nga a nkonisaho.”—Vha-Filipi 4:13.

20. Ndi pfaneleo dzifhio dzi takalelwaho nga Mudzimu dzine na fanela u dzi ṱahulela, nahone ndi ngani dzi dza ndeme?

²⁰ Vhukuma, u funa Yehova a zwi kateli u sokou iledza zwine a zwi vhenga fhedzi. Ni fanela u dovha na funa zwine a zwi funa. (Vha-Roma 12:9) Naa a ni funi vhathu vhane vha vha na mavhonele, madzangalelo, na matshilele a fanaho na aṋu? Na Yehova u a vha funa. Nga zwenezwo gudani u funa zwithu zwine Yehova a zwi funa. Zwiṅwe zwa zwenezwo zwo ṱaluswa kha Psalme ya 15:1-5, hune ra vhala nga ha vhane Mudzimu a vha dzhia vhe khonani dzawe. Khonani dza Yehova dzi sumbedza  zwine Bivhili ya zwi vhidza “zwiaṋwiwa zwa muya.” Zwi katela pfaneleo dzi ngaho “lufuno, dakalo, mulalo, u sa fhela mbilu, vhulenda, vhuthu, lutendo, U vuḓa, u konḓelela.”—Vha-Galata 5:22, 23.

21. Ndi mini zwine zwa ḓo ni thusa uri ni ṱahulele pfaneleo dzi funwaho nga Mudzimu?

²¹ U vhala na u guda Bivhili misi yoṱhe zwi ḓo ni thusa uri ni ṱahulele pfaneleo dzi funwaho nga Mudzimu. Nahone u guda zwine Mudzimu a zwi ṱoḓa zwi ḓo ni thusa u ita uri nḓila ine na humbula ngayo i tendelane na ya Mudzimu. (Yesaya 30:20, 21) Musi ni tshi funa Yehova nga nḓila yo engedzeaho, ni ḓo tama vhukuma u tshila nga nḓila ine ya mu takadza.

22. Ni ḓo khunyeledza mini arali na tshila nga nḓila ine ya takadza Mudzimu?

²² Hu ṱoḓea vhuḓidini u itela u tshila nga nḓila ine ya takadza Yehova. Bivhili i fanyisa u shandula matshilele aṋu na u bvula muthu mulala na ambara muthu muswa. (Vha-Kolosa 3:9, 10) Fhedzi malugana na ndaela dza Yehova, mupsalme o ṅwala a ri: “Mu-tevhedza-dzone u wana lupfumo luhulu.” (Psalme ya 19:11) Na inwi ni ḓo zwi vhona uri u tshila nga nḓila ine ya takadza Mudzimu zwi a vhuyedza vhukuma. Nga u ita zwenezwo, ni ḓo fhindula khaedu ya Sathane na takadza mbilu ya Yehova!