NGUDO 13
Vhurereli Ha Mazwifhi Vhu Tshinya Hani Dzina Ḽa Mudzimu?
Arali Mudzimu e lufuno, ndi ngani kereke nnzhi dzine dza amba uri dzi a mu imelela dzo no ita zwivhi zwinzhi? Zwi tou vha khagala uri dzenedzi kereke ndi dza mazwifhi. Zwine vha zwi amba na u zwi ita zwi ita uri vhathu vha tende mazwifhi nga ha Mudzimu. Vho tshinya hani dzina ḽa Mudzimu? Mudzimu u ḓipfa hani nga ha zwenezwo? Naa u ḓo sokou zwi litsha zwo ralo?
1. Pfunzo dza vhurereli ha mazwifhi dzi tshinya hani dzina ḽa Mudzimu?
Vhurereli ha mazwifhi ho “nanga u tenda mazwifhi nṱhani ha u tenda ngoho nga ha Mudzimu.” (Vharoma 1:25) Sa tsumbo, kereke nnzhi a dzo ngo gudisa vhatevheli vhadzo dzina ḽa Mudzimu. Fhedzi Bivhili i amba uri vhathu vha tea u shumisa dzina ḽa Mudzimu. (Vharoma 10:13, 14) Musi hu tshi itea zwithu zwi si zwavhuḓi, vhaṅwe vharangaphanḓa vha vhurereli vha amba uri ndi lufuno lwa Mudzimu. Fhedzi hayo ndi mazwifhi madaladala. A si Mudzimu ane a ita uri hu vhe na zwithu zwivhi. (Vhalani Yakobo 1:13.) Zwi ṱungufhadzaho ndi uri mazwifhi ane a funzwa nga vhurereli, a ita uri zwi konḓele vhathu u funa Mudzimu.
2. Zwine zwa itwa nga vhurereli ha mazwifhi zwi tshinya hani dzina ḽa Mudzimu?
Vhurereli ha mazwifhi a vhu fari vhathu nga nḓila ine Yehova a vha fara ngayo. Bivhili i amba uri zwivhi zwa vhurereli ha mazwifhi “ndi zwinzhi, a zwi vhalei.” (Nzumbululo 18:5) Ho no fhela miṅwaha minzhi kereke dzi tshi tikedza zwine zwa itwa nga mivhuso. Dzo tikedza dzinndwa na u ita uri hu vhulawe vhathu vhanzhi-vhanzhi. Vhaṅwe vharangaphanḓa vha vhurereli vha ṱoḓa u pfuma, nga zwenezwo, vha ṱoḓa uri vhatevheli vhavho vha vha ṋee tshelede. Zwine vha zwi ita zwi sumbedza uri a vha ḓivhi Mudzimu. Nga zwenezwo, a vha na ndugelo ya u mu imelela.—Vhalani 1 Yohane 4:8.
3. Mudzimu u ḓipfa hani nga vhurereli ha mazwifhi?
Arali ni tshi sinyuswa nga zwine zwa itwa nga vhurereli ha mazwifhi, ni vhona u nga Yehova ene u ḓipfa hani? Yehova u funa vhathu, fhedzi u sinyuswa nga vharangaphanḓa vha vhurereli vhane vha tshinya dzina ḽawe na vhane vha fara vhatevheli vhavho nga nḓila i si yavhuḓi. U fhulufhedzisa uri vhurereli ha mazwifhi vhu ḓo fheliswa nahone a vhu tsha “ḓo dovha [ha] wanala.” (Nzumbululo 18:21) Hu si kale, Mudzimu u ḓo fhelisa vhurereli hoṱhe ha mazwifhi.—Nzumbululo 18:8.
GUDANI ZWO ENGEDZEAHO
Gudani zwo engedzeaho nga ha uri Mudzimu u ḓipfa hani nga vhurereli ha mazwifhi. Gudani nga ha zwe vhurereli ha mazwifhi ha zwi ita. Ni gude na uri ndi ngani zwenezwi zwi songo tea u ni thivhela u ḓivha Yehova.
4. Naa Mudzimu u ṱanganedza vhurereli hoṱhe?
Vhathu vhanzhi vha tenda uri vhurereli vhu tou nga nḓila dzi sa fani nahone dzoṱhe dzi ri isa kha Mudzimu. Fhedzi naa zwenezwo ndi ngoho? Vhalani Mateo 7:13, 14, ni kone u fhindula mbudziso i tevhelaho:
-
Bivhili i ri mini nga ha nḓila i yaho vhutshiloni?
Ṱalelani VIDIO, ni kone u fhindula mbudziso i tevhelaho.
-
Naa Bivhili i amba uri hu na kereke nnzhi dzine dza ita zwine zwa takadza Mudzimu?
5. Vhurereli ha mazwifhi a vhu sumbedzi lufuno lune Mudzimu a vha nalwo
Vhurereli ha mazwifhi ho tshinya dzina ḽa Mudzimu nga nḓila nnzhi. Nga mannḓa-mannḓa ho ḽi tshinya nga u shela mulenzhe kha dzinndwa.U itela u vhona tsumbo ya zwenezwo, ṱalelani VIDIO. Ni kone u fhindula mbudziso dzi tevhelaho.
-
Kereke nnzhi dzo ita mini nga tshifhinga tsha Nndwa ya Shango ya Vhuvhili?
-
Ni ḓipfa hani nga zwe dzenedzo kereke dza zwi ita?
Vhalani Yohane 13:34, 35 na 17:16. Ni kone u fhindula mbudziso dzi tevhelaho:
-
Ni vhona u nga Yehova u ḓipfa hani musi vhurereli vhu tshi shela mulenzhe kha nndwa?
-
Vhurereli ha mazwifhi ho no ita zwithu zwinzhi zwi si zwavhuḓi. No no vhona vhurereli vhu tshi kundelwa hani u sumbedza lufuno lune Mudzimu a vha nalwo?
6. Mudzimu u ṱoḓa u thusa vhathu uri vha bve kha vhurereli ha mazwifhi
Vhalani Nzumbululo 18:4, a ni kone u fhindula mbudziso i tevhelaho:
-
Ni ḓipfa hani nga u ḓivha uri Mudzimu u ṱoḓa u vhofholola vhathu vho xedzwaho nga vhurereli ha mazwifhi?
7. Bvelani phanḓa ni tshi guda nga ha Mudzimu wa ngoho
Naa vhurereli ha mazwifhi vhu tea u kwama nḓila ine na dzhia ngayo Mudzimu? Humbulani nga ha muṱhannga ane a hana u thetshelesa khotsi awe, a ṱuwa hayani nahone a ita zwithu zwivhi. Khotsi awe a vha takaleli zwiito zwawe. Ndi ngani zwi tshi ḓo vha zwo khakhea u vhona vhenevho khotsi mulandu nga nṱhani ha zwiito zwa ṅwana wavho wa ḽishandukwa?
-
Naa zwi ḓo vha zwi tshi pfala u vhona Yehova mulandu na u litsha u mu shumela nga nṱhani ha zwiito zwa vhurereli ha mazwifhi?
VHAṄWE VHATHU VHA AMBA URI: “A thi ṱoḓi u ḓivha nga ha Mudzimu ngauri vhurereli vhu vhanga thaidzo nnzhi.”
-
Naa ni ḓipfa nga nḓila i fanaho?
-
Ndi ngani zwiito zwa vhurereli ha mazwifhi zwi songo fanela u kwama nḓila ine ra dzhia ngayo Yehova?
NO GUDA MINI?
Vhurereli ha mazwifhi ho tshinya dzina ḽa Mudzimu nga u funza mazwifhi na nga u ḓifara nga nḓila i ṋengisaho. Mudzimu u ḓo fhelisa vhurereli ha mazwifhi.
Ni Kha Ḓi Zwi Humbula?
-
Ni ḓipfa hani nga zwe zwa funzwa nga vhurereli ha mazwifhi na zwiito zwaho?
-
Yehova u ḓipfa hani nga vhurereli ha mazwifhi?
-
Mudzimu u ḓo ita mini vhurereli ha mazwifhi?
WANANI ZWO ENGEDZEAHO
Gudani uri vhurereli vhunzhi vhu sinyusa Mudzimu nga nḓila dzifhio mbili.
“Naa Vhurabeli Hoṱhe Vhu A Fana? Naa Hoṱhe Vhu A Takadza Mudzimu?” (Thero i re kha jw.org)
Ndi ngani Yehova a tshi ṱoḓa uri ri mu gwadamele ri na vhaṅwe?
“Naa Zwo Tea U Vha Muraḓo Wa Vhurereli?” (Thero i re kha jw.org)
Muṅwe mufunzi o vha a tshi dinwa nga kereke yawe. Fhedzi zwenezwo a zwo ngo mu thivhela uri a gude ngoho nga ha Mudzimu.
“Zwo Itaho Uri Muṅwe Mufunzi A Litshe Kereke Yawe” (Thereo i re kha Fhaṱuwani!, February 2015)
Ho no fhela miṅwaha minzhi kereke dzi tshi funza mazwifhi nga ha Mudzimu. Eneo mazwifhi o ita uri vhathu vha tende uri Mudzimu ha na ndavha na riṋe na uri u na tshiṱuhu. Gudani ngoho nga ha zwenezwo zwithu zwiraru zwe kereke dza amba mazwifhi nga hazwo.
“Mazwifhi Ane A Ita Uri Zwi Ri Konḓele U Funa Mudzimu” (Tshiingamo, 1 November 2013)
a U itela u ḓivha uri ndi ngani bugu ya Nzumbululo i tshi amba uri vhurereli ha mazwifhi vhu imela mufumakadzi ane a vhidzwa Babele Ḽihulu, vhalani Mafhungo O Engedzeaho 1.