NGUDO 19
Naa Ṱhanzi Dza Yehova Ndi Vhakriste Vha Vhukuma?
Riṋe sa Ṱhanzi dza Yehova ri a tenda uri ri Vhakriste vha vhukuma. Ndi ngani? Ṱhogomelani uri zwine ra zwi tenda zwi bva ngafhi, na dzina ḽine ḽa ita uri ri sa fane na vhaṅwe na nḓila ine ra funana ngayo.
1. Zwine Ṱhanzi dza Yehova vha zwi tenda zwi bva ngafhi?
Yesu o amba zwi tevhelaho nga ha Ipfi ḽa Mudzimu, o ri: “Mafhungo au ndi a ngoho.” (Yohane 17:17) U fana na Yesu, zwine Ṱhanzi dza Yehova vha zwi tenda zwi bva Ipfini ḽa Mudzimu. Sa tsumbo, ṱhogomelani uri zwenezwi ro zwi ita hani u bva mathomoni. Hu ṱoḓaho u vha nga ṅwaha wa 1870, tshigwada tsha vhathu vha mbilu dzavhuḓi, tsho thoma u guda Bivhili nga vhuronwane u itela u ḓivha zwine Bivhili ya zwi funza zwa vhukuma. Zwe vha vha vha tshi zwi tenda zwo vha zwi tshi bva Bivhilini naho zwo vha zwo fhambana na pfunzo dza dziṅwe kereke. Vho thoma u vhudza vhaṅwe zwe vha zwi guda Bivhilini. a
2. Ndi ngani ri tshi ḓivhidza Ṱhanzi dza Yehova?
Yehova u vhidza vhagwadameli vhawe uri ndi Ṱhanzi dzawe ngauri vha amba ngoho nga hae. (Vhahevheru 11:4–12:1) Sa tsumbo, tshifhingani tsha kale Mudzimu o vhudza vhathu vhawe uri: “Inwi ni ṱhanzi dzanga.” (Vhalani Yesaya 43:10.) Yesu u vhidzwa “Ṱhanzi i Fhulufhedzeaho.” (Nzumbululo 1:5) Nga zwenezwo, nga 1931 ro thoma u ḓivhidza Ṱhanzi dza Yehova. Ri a ḓirwa khana nga u vha na ḽeneḽi dzina.
3. Ṱhanzi dza Yehova vha edzisa hani lufuno lune Yesu a vha nalwo?
Yesu o vha a tshi funa vhafunziwa vhawe nga mannḓa lwe zwa tou nga ndi vha muṱani wawe. (Vhalani Marko 3:35.) Nga hu fanaho, Ṱhanzi dza Yehova ndi muṱa u re na vhuthihi u mona na shango ḽoṱhe. Ndi ngazwo ri tshi vhidzana uri vhahashu. (Filemoni 1, 2) Ri dovha ra tevhedza mulayo une wa ri: “Ni fune vhatendi vhoṱhe.” (1 Petro 2:17) Ṱhanzi dza Yehova vha sumbedza uri vha a funana nga nḓila nnzhi. Vha a thusa vhahavho u mona na shango ḽoṱhe musi vha tshi ṱoḓa thuso.
GUDANI ZWO ENGEDZEAHO
Gudani zwo engedzeaho nga ha ḓivhazwakale ya Ṱhanzi dza Yehova, ni vhone vhuṱanzi ho engedzeaho vhu sumbedzaho uri ri Vhakriste vha vhukuma.
Zwine Vhakriste vha vhukuma vha zwi tenda zwi bva Bivhili nahone vha zwi vhudza vhaṅwe
4. Zwine ra zwi tenda zwi bva Bivhilini
Yehova o dzula o amba uri ri ḓo pfesesa khwine zwine Bivhili ya zwi funza. Vhalani Daniele 12:4 na ṱhaluso i re magumoni a siaṱari, ni kone u fhindula mbudziso i tevhelaho:
-
Ho vha hu tshi ḓo “ḓala” mini musi vhathu vha Mudzimu vha tshi bvela phanḓa vha tshi guda Bivhili nga vhuronwane?
Ṱhogomelani uri tshigwada tsha vhagudi vha Bivhili u katela na Vho-Charles Russell, vho guda hani Ipfi ḽa Mudzimu. Ṱalelani VIDIO, ni kone u fhindula mbudziso i tevhelaho.
-
Kha vidio, Vho-Charles Russell na vhaṅwe vhagudi vha Bivhili vho guda hani Bivhili?
Naa no vha ni tshi zwi ḓivha?
Nga zwiṅwe zwifhinga, ro khwinisa nḓila ine ra pfesesa ngayo zwiṅwe zwa zwithu zwine ra zwi tenda. Ndi ngani? Samusi tshedza tsha ḓuvha tshi tshi ḓi penya tshi tshi ya nga zwiṱuku nga zwiṱuku, Mudzimu u thusa vhathu vhawe uri vha pfesese Ipfi ḽawe nga zwiṱuku nga zwiṱuku. (Vhalani Mirero 4:18.) Bivhili a i shanduki, fhedzi musi ri tshi i pfesesa khwine, ri a khwinisa zwine ra zwi funza.
5. Ri tshila u tendelana na dzina ḽashu
Ndi ngani ri tshi ḓivhidza Ṱhanzi dza Yehova? Ṱalelani VIDIO, ni kone u fhindula mbudziso i tevhelaho.
-
Ndi ngani dzina ḽa uri Ṱhanzi dza Yehova ḽo tea?
Ndi ngani Yehova o khetha vhathu uri vha vhe ṱhanzi dzawe? Ndi nga nṱhani ha uri vho vha vha tshi ḓo ita uri a ḓivhiwe sa Mudzimu wa ngoho, samusi ho no phaḓaladzwa mazwifhi manzhi nga hae. Ṱhogomelani maṅwe a eneo mazwifhi.
Vhuṅwe vhurereli vhu funza vhathu uri Mudzimu u ṱoḓa uri vha shumise zwifanyiso musi vha tshi mu gwadamela. Fhedzi vhalani Levitiko 26:1, ni kone u fhindula mbudziso dzi tevhelaho:
-
Ngoho ndi ifhio? Yehova u ḓipfa hani nga ha u gwadamela midzimu ya zwifanyiso?
Vhaṅwe vharangaphanḓa vha vhurereli vha funza uri Yesu ndi Mudzimu. Fhedzi vhalani Yohane 20:17, ni kone u fhindula mbudziso dzi tevhelaho:
-
Ngoho ndi ifhio? Naa Mudzimu na Yesu ndi muthu muthihi?
-
Ni ḓipfa hani nga u ḓivha uri Yehova o rumela Ṱhanzi dzawe uri dzi funze ngoho nga ha ene na Murwa wawe?
6. Ri a funana
Bivhili i amba uri Vhakriste vha fanela u vha na vhuthihi u fana na miraḓo ya muvhili. Vhalani 1 Vhakorinta 12:25, 26, ni kone u fhindula mbudziso dzi tevhelaho:
-
Vhakriste vha vhukuma vha fanela u ita mini musi vhaṅwe Vhakriste vha tshi tambula?
-
Ndi mini zwe na zwi ṱhogomela kha nḓila ine Ṱhanzi dza Yehova vha funana ngayo?
Musi Ṱhanzi dza Yehova vhane vha dzula kha ḽiṅwe shango vha tshi tambula, dziṅwe Ṱhanzi u mona na shango ḽoṱhe vha a ṱavhanya vha thusa. U itela u vhona tsumbo ya zwenezwo, ṱalelani VIDIO. Ni kone u fhindula mbudziso i tevhelaho.
-
Musi Ṱhanzi dza Yehova vha tshi thusana, zwi sumbedza hani uri vha a funana?
Vhakriste vha vhukuma vha a sumbedza uri vha a funa vhathu vhane vha shaya
VHAṄWE VHATHU VHA AMBA URI: “Ṱhanzi dza Yehova vha sokou vha vhurereli vhuswa.”
-
Yehova o thoma lini u vhidza vhagwadameli vhawe uri ndi ṱhanzi dzawe?
NO GUDA MINI?
Ṱhanzi dza Yehova ndi Vhakriste vha vhukuma. Ri muṱa muthihi wa vhagwadameli vha Yehova u mona na shango ḽoṱhe. Zwine ra zwi tenda zwi bva Bivhilini nahone ri funza vhathu ngoho nga ha Yehova.
Ni Kha Ḓi Zwi Humbula?
-
Ndi ngani ro thoma u ḓivhidza Ṱhanzi dza Yehova?
-
Ri sumbedza hani uri ri a funana?
-
Naa ni vhona u nga Ṱhanzi dza Yehova ndi Vhakriste vha vhukuma?
WANANI ZWO ENGEDZEAHO
Gudani zwo engedzeaho nga ha ḓivhazwakale yashu.
Ṱhanzi Dza Yehova Vho Ṱuṱuwedzwa Nga Lutendo, Tshipiḓa 1: U Bva Swiswini (1:00:53)
Vhonani tsumbo ya nḓila ye Ṱhanzi dza Yehova vha bvukulula ngayo pfunzo dza mazwifhi.
Wanani phindulo dza mbudziso dzine na nga vha ni nadzo nga ha Ṱhanzi dza Yehova.
“Mbudziso Dzine Dza Anzela U Vhudziswa Nga Ha Ṱhanzi Dza Yehova” (siaṱari ḽi re kha jw.org)
Vho-Stephen vho vha vha tshi vhenga vhathu vha dziṅwe tshaka nahone vha tshi lwa navho. Vhonani uri ndi mini zwe vha zwi vhona kha Ṱhanzi dza Yehova zwe zwa ita uri vha shanduke.
“Vhutshilo hanga ho vha vhu tshi khou ṋaṋa u vha vhuvhi” (Tshiingamo, 1 September 2015)
a U bva nga ṅwaha wa 1879, vhathu vha Yehova vho gandisa magazini wa Tshiingamo u itela u ṱalutshedza zwine Bivhili ya zwi amba.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
