NGUDO 22

Ni Nga Vhudza Hani Vhaṅwe Mafhungo Maḓifha?

TAMBANI

Musi ni tshi khou guda ngoho i re Bivhilini, ni nga humbula uri, ‘Muṅwe na muṅwe u tea u ḓivha haya mafhungo!’ Ndi ngoho uri muṅwe na muṅwe u tea u a ḓivha! Fhedzi ni nga pfa ni tshi ofha u vhudza vhaṅwe zwe na zwi guda. Kha ri haseledze zwine zwa nga ni thusa uri ni kunde nyofho na uri ni thome u vhudza vhaṅwe mafhungo maḓifha a bvaho Bivhilini no takala.

1. Ni nga vhudza hani vhathu vhane na vha ḓivha zwe na zwi guda?

Vhafunziwa vha Yesu vho ri: “Ri nga si litshe u amba nga ha zwe ra zwi vhona na u zwi pfa.” (Mishumo 4:20) Vho vha vha tshi funa zwe vha zwi guda kha Yesu lwe vha ṱoḓa u vhudza muṅwe na muṅwe nga hazwo. Naa ni ḓipfa nga nḓila i fanaho? Arali zwo ralo, wanani nḓila dzine na nga vhudza ngadzo vha muṱani wa haṋu na khonani dzaṋu nga ṱhonifho zwe na zwi guda.—Vhalani Vhakolosa 4:6.

Ni nga thoma nga u ita zwi tevhelaho:

Musi ni tshi khou amba na mashaka aṋu, ni nga vha vhudza mafhungo a re Bivhilini. Ni nga thoma nga uri: “Ndo guda zwithu zwi takadzaho ino vhege.”
Arali ni na khonani ine ya khou lwala kana ine ya khou vhilaela, mu vhaleleni vese ine ya ḓo mu khuthadza.
Musi vhane na shuma navho vha tshi ni lumelisa, ni nga vha vhudza zwe na zwi guda kha ngudo yaṋu ya Bivhili kana tshivhidzoni.
Sumbedzani khonani dzaṋu website ya jw.org.
Ni nga humbela vhaṅwe uri vha ḓe musi ni tshi khou guda Bivhili kana ni nga vha sumbedza nḓila ya u humbela pfunzo ya Bivhili kha jw.org.

2. Ndi ngani ni tshi tea u ḓivhetshela tshipikwa tsha u ḓivhadza mafhungo maḓifha na vhaṅwe tshivhidzoni?

Vhafunziwa vha Yesu a vho ngo ḓivhadza mafhungo maḓifha fhedzi kha vhathu vhane vha vha ḓivha. Yesu o “vha ruma nga vhavhili nga vhavhili uri vha mu range phanḓa vha ye miḓini” u ḓivhadza mafhungo maḓifha. (Luka 10:1) Wonoyo mushumo wo dzudzanywaho wa u ḓivhadza mafhungo maḓifha wo ita uri vhathu vhanzhi vha pfe mafhungo maḓifha. U ḓivhadza mafhungo maḓifha na vhaṅwe zwo ita uri vhafunziwa vha takale. (Luke 10:17) Naa na inwi ni nga ḓivhetshela tshipikwa tsha u ḓivhadza mafhungo maḓifha na vhaṅwe tshivhidzoni?

GUDANI ZWO ENGEDZEAHO

Gudani nga ha zwine zwa nga ni thusa uri ni si ofhe na uri ni ḓiphiṋe nga u vhudza vhaṅwe mafhungo maḓifha.

3. Yehova u ḓo ni thusa

Vhaṅwe vhane vha ṱoḓa u ḓivhadza mafhungo maḓifha vha nga pfa vha tshi ofha uri vhathu vha ḓo ri mini.

Naa ni a ofha u vhudza vhaṅwe zwe na zwi guda? Ndi ngani?

Ṱalelani VIDIO, ni kone u fhindula mbudziso i tevhelaho.

VIDIO: Ndo Rabela Kha Yehova Uri A Mphe Tshivhindi (4:05)

Vhenevha vhaswa vha Dziṱhanzi vho kunda hani nyofho?

Vhalani Yesaya 41:10, ni kone u fhindula mbudziso i tevhelaho:

Ndi ngani ni tshi fanela u rabela musi ni tshi pfa ni tshi khou ofha u ḓivhadza mafhungo maḓifha?

Naa no vha ni tshi zwi ḓivha?

Vhunzhi ha Ṱhanzi dza Yehova vho vhuya vha humbula uri vha nga si vhuye vha kona u vhudza vhaṅwe mafhungo maḓifha. Sa tsumbo, Sergey o vha a sa ḓifhulufheli nahone zwo vha zwi tshi mu konḓela u amba na vhaṅwe vhathu. Fhedzi o mbo ḓi thoma u guda Bivhili. O ri: “Naho ndo vha ndi tshi ofha, ndo mbo ḓi thoma u vhudza vhaṅwe zwe nda vha ndi tshi khou zwi guda. Zwo mmangadzaho ndi uri musi ndi tshi thoma u vhudza vhaṅwe zwe nda zwi guda Bivhilini, zwo ita uri ndi thome u ḓifhulufhela. U vhudza vhaṅwe zwine nda zwi tenda zwo khwaṱhisa lutendo lwanga.”

4. Ṱhonifhani vhaṅwe

Musi ni sa athu ḓivhadza mafhungo maḓifha, ni fanela u humbula nga ha zwine na ṱoḓa u zwi amba. Fhedzi zwi dovha zwa vha zwa ndeme uri ni humbule nga ha nḓila ine na nga amba ngayo navho nga ṱhonifho. Vhalani 2 Timotheo 2:24 na 1 Petro 3:15, ni kone u fhindula mbudziso dzi tevhelaho:

Ni nga shumisa hani idzi vese musi ni tshi amba na vhaṅwe nga ha mafhungo a re Bivhilini?
Vhaṅwe vha muṱani wahaṋu kana khonani dzaṋu vha nga kha ḓi sa tendelana na inwi. Ni nga ita mini? A no ngo fanela u ita mini?
Ndi ngani zwi zwa ndeme u vhudzisa vhathu mbudziso nga nḓila yavhuḓi nṱhani ha u vha vhudza zwine vha fanela u zwi tenda?

5. U ḓivhadza mafhungo maḓifha zwi ita uri ri takale

Yehova o ṋea Yesu mushumo wa u ḓivhadza mafhungo maḓifha. Yesu o dzhia hani wonoyo mushumo? Vhalani Yohane 4:34, ni kone u fhindula mbudziso dzi tevhelaho:

U ḽa zwiḽiwa zwavhuḓi zwi ita uri ri vhe na mutakalo wavhuḓi nahone zwi ita uri ri takale. Ndi ngani Yesu o amba uri u ita zwine Mudzimu a ṱoḓa ri tshi zwi ita, sa tsumbo u ḓivhadza mafhungo maḓifha, zwi fana na u ḽa zwiḽiwa?
Ni vhona u nga u ḓivhadza mafhungo maḓifha zwi nga ita hani uri ni takale?

Zwine na nga zwi ita

Musi ni tshivhidzoni muṱanganoni wa vhukati ha vhege, lingedzani u wana nḓila dzine na nga thoma ngadzo nyambedzano.
Vhudzisani mugudisi waṋu uri ni nga ḓiṅwalisa hani u itela u vha na tshipiḓa kha muṱangano wa vhukati ha vhege. U vha na tshipiḓa kha miṱangano ya vhukati ha vhege zwi nga ni thusa uri ni kone u vhudza vhaṅwe zwine na khou zwi guda.
Shumisani mafhungo a re kha ino bugu kha tshipiḓa tshine tsha ri, “Vhaṅwe Vhathu Vha Amba uri” kana “Muṅwe Muthu A Nga Vhudzisa Uri,” u itela u ḓigudisa nḓila ine na nga fhindula ngayo musi vhathu vha tshi vhudzisa mbudziso kana vha tshi hanedza.

MUṄWE MUTHU A NGA VHUDZISA URI: “Zwi khou tshimbila hani?”

Ni nga shumisa hani tshenetshi tshibuli u itela u vhudza onoyo muthu zwe na zwi guda Bivhilini?

NO GUDA MINI?

U ḓivhadza vhaṅwe mafhungo maḓifha zwi ḓo ita uri ni takale nahone a zwi konḓi u fana na nḓila ine na humbula ngayo.

Ni Kha Ḓi Zwi Humbula?

Ndi ngani ri tshi fanela u ḓivhadza vhaṅwe mafhungo maḓifha?
Ni nga zwi ita hani nga ṱhonifho?
Ni nga ita mini uri ni si tsha ofha u ḓivhadza mafhungo maḓifha?

Ṅwalani ḓuvha ḽe na fhedza u guda ngaḽo heyi ngudo:

Lingedzani Hezwi

Humbulani nga ha muthu ane na nga mu vhudza mafhungo maḓifha. Humbulani nga ha zwine na ḓo zwi amba, nḓila ine na ḓo zwi amba ngayo na uri ni ḓo zwi amba lini.

Zwiṅwe:

Your other goal