NGUDO 28

Sumbedzani Uri Ni A Livhuwa Zwe Yehova Na Yesu Vha Ni Itela Zwone

TAMBANI

Ni ḓipfa hani musi khonani yaṋu i tshi ni ṋea tshifhiwa tshavhuḓi? Zwi tou pfala uri zwi a ni takadza nga maanḓa nahone ni ṱoḓa u sumbedza khonani yaṋu uri ni a livhuwa tshenetsho tshifhiwa. Yehova na Yesu vho ri ṋea tshifhiwa tshavhuḓisa u fhira zwoṱhe. Ndi tshifhio tshenetsho tshifhiwa nahone ri nga sumbedza hani uri ri a livhuwa?

1. Ri nga sumbedza hani uri ri livhuwa zwe Mudzimu na Kristo vha ri itela zwone?

Bivhili i fhulufhedzisa uri “ane a tenda [Yesu]” a nga tshila tshoṱhe. (Yohane 3:16) Ri nga zwi itisa hani zwenezwo? Ri fanela u sumbedza uri ri na lutendo nga phetho dzine ra dzi dzhia na zwine ra zwi ita. (Yakobo 2:17) Musi ri tshi sumbedza uri ri na lutendo nga zwine ra zwi ita na zwine ra zwi amba, ri vha ri tshi khou khwaṱhisa vhukonani vhune ra vha naho na Yesu na Yehova ane a vha Khotsi awe.—Vhalani Yohane 14:21.

2. Ndi tshiitea tshifhio tsho khetheaho tshine tsha ri thusa uri ri sumbedze u livhuwa zwe Yehova na Yesu vha ri itela zwone?

Nga vhusiku hawe ha u fhedza musi a sa athu fa, Yesu o vhudza vhatevheli vhawe iṅwe nḓila ine vha nga sumbedza ngayo uri vha a livhuwa tshiṱhavhelo tshawe. O vha vhudza uri vha tea u kuvhangana u itela tshiitea tsho khetheaho tshine Bivhili ya tshi vhidza “Tshilalelo tsha Murena.” Tshenetsho tshiitea tshi dovha tsha vhidzwa, Tshihumbudzo tsha lufu lwa Kristo. (1 Vhakorinta 11:20) Yesu o vha a tshi ṱoḓa uri vhaapostola vhawe na Vhakriste vhoṱhe vha vhukuma, vha dzule vha tshi humbula uri o ṋekedza vhutshilo hawe a tshi itela riṋe. Nga zwenezwo, o vha vhudza uri: “Dzulani ni tshi ita zwenezwi u itela u nkhumbula.” (Luka 22:19) Musi ni tshi vha hone Tshihumbudzoni, ni vha ni tshi khou sumbedza uri ni a livhuwa nḓila khulwane ine Yehova na Yesu vha ri funa ngayo.

GUDANI ZWO ENGEDZEAHO

Gudani nga ha dziṅwe nḓila dzine na nga sumbedza ngadzo uri ni a livhuwa nḓila khulwane ine Yehova na Yesu vha ni funa ngayo. Gudani uri ndi ngani Tshihumbudzo tsha lufu lwa Kristo tshi tsha ndeme nga maanḓa.

3. Ri nga sumbedza hani uri ri a livhuwa?

Kha ri ri muṅwe muthu o ni thusa ni tshi khou nwela khothe. Naa ni nga sokou hangwa zwe onoyo muthu a ni itela zwone? Kana naa ni ḓo ṱoḓa nḓila dza u mu sumbedza uri ni a livhuwa zwe a ni itela zwone?

Ri nga wana vhutshilo vhu sa fheli ngauri Yehova o ri sumbedza vhuthu. Vhalani 1 Yohane 4:8-10, ni kone u fhindula mbudziso dzi tevhelaho:

Ndi ngani tshiṱhavhelo tsha Yesu tshi tshifhiwa tsho khetheaho?
Ni ḓipfa hani nga zwe Yehova na Yesu vha ni itela zwone?

Ri nga sumbedza hani uri ri livhuwa zwe Yehova na Yesu vha ri itela zwone? Vhalani 2 Vhakorinta 5:15 na 1 Yohane 4:11; 5:3. Musi no no vhala vese dzoṱhe, ni fhindule mbudziso i tevhelaho:

U ya nga vese dze na dzi vhala, ri nga sumbedza hani uri ri a livhuwa?

4. Edzisani Yesu

Iṅwe nḓila ine ra nga sumbedza ngayo uri ri a livhuwa, ndi nga u edzisa Yesu. Vhalani 1 Petro 2:21, ni kone u fhindula mbudziso i tevhelaho:

Ni nga tevhela hani tsumbo ya Yesu nga vhuronwane?

Yesu o vha a tshi funa Ipfi ḽa Mudzimu, o ḓivhadza mafhungo maḓifha nahone o thusa vhaṅwe

5. Ivhani hone Tshihumbudzoni tsha lufu lwa Kristo

U itela u ḓivha zwe zwa itea nga Tshilalelo tsha u thoma tsha Murena, vhalani Luka 22:14, 19, 20. Ni kone u fhindula mbudziso dzi tevhelaho:

Ho itea mini nga Tshilalelo tsha Murena?
Vhurotho na waini zwi imela mini?—Vhalani vese 19 na 20.

Yesu o vha a tshi ṱoḓa uri vhafunziwa vhawe, vha humbule lufu lwawe luthihi nga ṅwaha nga ḓuvha ḽe a fa ngaḽo. Ndi ngazwo Ṱhanzi dza Yehova vha tshi kuvhangana ṅwaha muṅwe na muṅwe u itela u humbula lufu lwa Kristo. Vha zwi ita nga nḓila ye a laedza ngayo. U itela u guda nga ha tshenetsho tshiitea tsha ndeme, ṱalelani VIDIO. Ni kone u fhindula mbudziso i tevhelaho.

VIDIO: Humbulani Lufu Lwa Yesu (1:41)

Hu itea mini Tshihumbudzoni?

Hu na zwine vhurotho na waini zwa imela zwone. Vhurotho vhu imela muvhili wa Yesu we a u ṋekedza sa tshiṱhavhelo a tshi itela riṋe. Waini i imela malofha awe

VHAṄWE VHATHU VHA AMBA URI: “Uri ni tshidzwe, hu ṱoḓea fhedzi uri ni tende kha Yesu.”

Ni nga shumisa hani Yohane 3:16 na Yakobo 2:17 u itela u sumbedza uri hu ṱoḓea zwo engedzeaho u fhira u sokou tenda kha Yesu?

NO GUDA MINI?

Ri nga sumbedza uri ri livhuwa zwe Yesu a ri itela zwone nga u vha na lutendo khae na nga u vha hone Tshihumbudzoni tsha lufu lwawe.

Ni Kha Ḓi Zwi Humbula?

Ri nga sumbedza hani uri ri na lutendo kha Yesu?
Ni nga ṱoḓa u sumbedza hani uri ni livhuwa zwe Yehova na Yesu vha ni itela zwone?
Ndi ngani zwi zwa ndeme u vha hone Tshihumbudzoni tsha lufu lwa Kristo?

Ṅwalani ḓuvha ḽe na fhedza u guda ngaḽo heyi ngudo:

Lingedzani Hezwi

Ivhani hone Tshihumbudzoni tshi tevhelaho tsha lufu lwa Kristo. Vhudzisani muthu ane a khou ni gudisa Bivhili uri Tshihumbudzo tshi ḓo vha hone lini, ni ṅwale fhasi uri ni si hangwe.

Zwiṅwe:

Your other goal