NGUDO 38
Dzhielani Nṱha Tshifhiwa Tsha Vhutshilo
Hu na zwithu zwinzhi zwine ra nga zwi ita na zwine ra nga ḓiphiṋa ngazwo nga nṱhani ha uri ri khou tshila. Naho ri tshi vha na thaidzo, ri nga ḓiphiṋa nga zwiṅwe zwithu vhutshiloni. Ri nga sumbedza hani uri ri dzhiela nṱha tshifhiwa tsha vhutshilo? Ndi tshifhio tshiitisi tsha ndeme tsha u ita zwenezwo?
1. Ndi ngani ri tshi tea u dzhiela nṱha vhutshilo?
Ri fanela u dzhiela nṱha vhutshilo ngauri ndi tshifhiwa tshi bvaho kha Yehova ane a vha Khotsi ashu a re na lufuno. Ndi ene “tshisima tsha vhutshilo.” Ndi ene o sikaho zwithu zwoṱhe zwi tshilaho. (Phisalema 36:9) Bivhili i ri: “Ndi ene ane a ṋea vhathu vhoṱhe vhutshilo, muya wa u fema na zwithu zwoṱhe.” (Mishumo 17:25, 28) Yehova u ri ṋea zwine ra zwi ṱoḓa uri ri bvele phanḓa ri tshi khou tshila. U dovha a ita uri zwi konadzee uri ri ḓiphiṋe nga vhutshilo.—Vhalani Mishumo 14:17.
2. Ri nga sumbedza hani Yehova uri ri dzhiela nṱha tshifhiwa tsha vhutshilo?
Yehova o ni ṱhogomela u bva ni tshi tou thoma u vhumbea mbumbeloni ya mubebi waṋu. Kha thabelo yo ṅwalwaho Bivhilini, muṅwe mushumeli wa Mudzimu o amba zwi tevhelaho musi a tshi rabela, o ri: “Wo mmbona ndi tshi kha ḓi vhumbea.” (Phisalema 139:16) Yehova u dzhiela nṱha vhutshilo haṋu. (Vhalani Mateo 10:29-31.) Yehova a nga pfa vhuṱungu nga maanḓa arali muthu a ḓivhulaya nga khole kana a vhulaya muṅwe muthu. a (Ekisoda 20:13) Zwi nga dovha zwa vhaisa Yehova arali ra vhea vhutshilo hashu khomboni nga khole kana ri songo dzhia vhukando u itela u tsireledza vhaṅwe. Musi ri tshi ḓiṱhogomela na u ṱhonifha vhutshilo ha vhaṅwe, ri vha ri tshi khou sumbedza uri ri dzhiela nṱha tshenetshi tshifhiwa tsho khetheaho tsha vhutshilo.
GUDANI ZWO ENGEDZEAHO
Gudani nga ha dziṅwe nḓila dzine na nga sumbedza ngadzo uri ni a dzhiela nṱha tshifhiwa tsha vhutshilo.
3. Ṱhogomelani mutakalo waṋu
Nga nṱhani ha uri ro fhulufhedzisa Yehova uri ri ḓo dzula ri tshi ita zwine a zwi ṱoḓa, ri shumisa vhutshilo hashu u itela u mu shumela. Zwi vha zwi tshi tou nga ri khou ṋekedza mivhili yashu sa tshiṱhavhelo kha Mudzimu. Vhalani Vharoma 12:1, 2, ni kone u fhindula mbudziso dzi tevhelaho:
-
Ndi mini zwine zwa fanela u ni ṱuṱuwedza uri ni ṱhogomele mutakalo waṋu?
-
Ndi dzifhio dziṅwe nḓila dzine na nga zwi ita ngadzo?
4. Ivhani na vhulondi kha zwoṱhe zwine na zwi ita uri hu si vhe na muthu ane a huvhala kana ane a lovha
Bivhili i ri ṱuṱuwedza uri ri iledze u ita zwithu zwine zwa vha na khombo. Ṱalelani VIDIO u itela u guda nga ha zwiṅwe zwithu zwine na nga zwi ita uri ni tsireledzee.
Vhalani Mirero 22:3, ni haseledze nga ha uri inwi na vhaṅwe ni nga tsireledzea hani . . .
-
musi ni hayani.
-
musi ni mushumoni.
-
musi ni tshi khou tamba mitambo.
-
musi ni kha zwiendedzi kana ni tshi khou reila.
5. Ṱhonifhani vhutshilo ha ṅwana a sa athu bebwaho
Davida o ṱalutshedza uri Yehova u na ndavha na zwoṱhe zwine zwa itea musi ṅwana a tshi khou aluwa e mbumbeloni ya mme awe. Vhalani Phisalema 139:13-17, ni kone u fhindula mbudziso i tevhelaho:
-
Yehova u dzhia vhutshilo ha muthu vhu tshi thoma gai? Musi a sa athu bebwa kana musi o no bebwa?
Mulayo we Yehova a u ṋea Vhaisiraele wo vha u tshi tsireledza vhomme na vhana vhavho vha sa athu bebwaho. Vhalani Ekisoda 21:22, 23, ni kone u fhindula mbudziso dzi tevhelaho:
-
Yehova o vha a tshi dzhia hani muthu we a vhulaya a songo ḓiimisela ṅwana a sa athu bebwaho?
-
A nga ḓipfa hani arali muthu a vhulaya nga khole ṅwana a sa athu bebwaho? b
-
Ni ḓipfa hani nga ha nḓila ine Mudzimu a dzhia ngayo vhutshilo?
Na mufumakadzi ane a dzhiela nṱha vhutshilo, a nga vhona u nga u bvisa thumbu ndi zwone fhedzi zwine a nga zwi ita. Vhalani Yesaya 41:10, ni kone u fhindula mbudziso dzi tevhelaho:
-
Arali mufumakadzi a tshi khou vhetshelwa mutsiko wa uri a bvise thumbu, u tea u humbela thuso kha nnyi? Ndi ngani ni tshi ralo?
VHAṄWE VHATHU VHA AMBA URI: “Mufumakadzi u na ndugelo ya u khetha arali a tshi ṱoḓa u bvisa thumbu ngauri ndi muvhili wawe.”
-
Ndi mini zwine zwa ita uri ni vhe na vhungoho ha uri Yehova u dzhiela nṱha vhutshilo ha mme na ṅwana wawe a sa athu bebwaho?
NO GUDA MINI?
Bivhili i ri gudisa uri ri fune, ri ṱhonifhe na u tsireledza tshifhiwa tsha vhutshilo tshi bvaho kha Yehova. Zwenezwi zwi katela vhutshilo hashu na ha vhaṅwe.
Ni Kha Ḓi Zwi Humbula?
-
Ndi ngani vhutshilo ha muthu vhu ha ndeme kha Yehova?
-
Yehova u ḓipfa hani arali muthu a vhulaya muṅwe muthu nga khole?
-
Ndi ngani ni tshi dzhiela nṱha tshifhiwa tsha vhutshilo?
WANANI ZWO ENGEDZEAHO
Ri nga livhuwa hani Yehova nge a ri ṋea tshifhiwa tsha vhutshilo?
Wanani phindulo ya mbudziso ine ya ri, Naa Mudzimu u ḓo hangwela mufumakadzi we a bvisa thumbu?
“Bivhili I Ri Mini Nga Ha U Bvisa Thumbu?” (Thero i re kha jw.org)
Gudani uri nḓila ine Mudzimu a dzhia ngayo vhutshilo i fanela u ri thusa hani u khetha vhuḓimvumvusi vhune ha sa ḓo vhea vhutshilo hashu khomboni.
Hu pfi mini arali muthu a tshi khou humbula u ḓivhulaya? Vhonani uri Bivhili i nga thusa hani.
“Naa Bivhili I Nga Nthusa Musi Ndi Tshi Khou Humbula U Ḓivhulaya?” (Thero i re kha jw.org)
a Yehova u na ndavha na vhathu vho ṱungufhalaho. (Phisalema 34:18) U a pfesesa zwine zwa ita uri vhathu vha ṱoḓe u ḓivhulaya nahone u ṱoḓa u vha thusa. U itela u vhona uri a nga thusa hani muthu ane a khou ṱoḓa u ḓivhulaya uri a si tsha ḓivhulaya, vhalani thero ine ya ri “Naa Bivhili I Nga Nthusa Musi Ndi Tshi Khou Humbula U Ḓivhulaya?” i re kha tshipiḓa tshine tsha ri Wanani Zwo Engedzeaho, tshi re kha ino ngudo.
b Vhathu vhe vha bvisa thumbu a vho ngo tea u ḓivhona mulandu nga ho kalulaho ngauri Yehova a nga vha hangwela. U itela u guda zwo engedzeaho, vhalani thero ine ya ri “Bivhili I Ri Mini Nga Ha U Bvisa Thumbu?” i re kha tshipiḓa tshine tsha ri Wanani Zwo Engedzeaho, tshi re kha ino ngudo.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
