NGUDO 41
Bivhili I Ri Mini Nga Ha Vhudzekani?
Vhathu vhanzhi vha pfa vha songo vhofholowa u amba nga ha vhudzekani. Fhedzi musi Bivhili i tshi amba nga ha vhudzekani, i amba nga nḓila yo livhaho na i ṱhonifheaho. Zwine ya zwi amba zwi a ri vhuyedza. Zwenezwo zwi a pfala ngauri Bivhili i bva kha Musiki washu ane a vha Yehova. U a ḓivha zwine zwa ri vhuyedza. U ri vhudza zwine ra tea u zwi ita u itela u mu takadza na zwine zwa ḓo ri thusa uri ri ḓiphiṋe nga vhutshilo lwa tshoṱhe.
1. Yehova u dzhia hani zwa vhudzekani?
Vhudzekani ndi tshifhiwa tshi bvaho kha Yehova. U ṱoḓa uri munna na mufumakadzi vho vhinganaho vha ḓiphiṋe nga vhudzekani. Tshenetshi tshifhiwa tshi ita uri zwi konadzee uri vhavhingani vha vhe na vhana na uri vha ḓiphiṋe nga u sumbedzana uri vha a funana. Ndi ngazwo Bivhili i tshi ri: “Ngavhe u tshi takala na mufumakadzi wa musi u tshee muswa.” (Mirero 5:18, 19) Yehova u lavhelela uri Vhakriste vho vhinganaho vha fhulufhedzee kha vhafarisi vhavho vha mbingano. Nga zwenezwo, vha nga si vhuye vha ḓifara luvhi nga zwa vhudzekani.—Vhalani Vhahevheru 13:4.
2. Zwi amba mini u ḓifara luvhi nga zwa vhudzekani?
Bivhili i ri vhudza uri “vhane vha ḓifara luvhi nga zwa vhudzekani . . . a vha nga ḽi ifa ḽa Muvhuso wa Mudzimu.” (1 Vhakorinta 6:9, 10) Musi vhaṅwali vha Bivhili vha tshi amba nga ha u ḓifara luvhi nga zwa vhudzekani, vho shumisa ipfi ḽa Tshigerika por·neiʹa. Ḽeneḽo ipfi ḽi ambela kha (1) u ḓifara luvhi nga zwa vhudzekani a ha vhathu vha songo vhinganaho, (2) u ita zwa vhudzekani na muthu wa mbeu i fanaho na yau na (3) u ita zwa vhudzekani na tshipuka. Musi ri tshi “iledza u ḓifara luvhi nga zwa vhudzekani,” ri takadza Yehova na u ḓivhuyedza riṋe vhaṋe.—1 Vhathesalonika 4:3.
GUDANI ZWO ENGEDZEAHO
Vhonani uri ni nga iledza hani u ḓifara luvhi nga zwa vhudzekani na nḓila ine na ḓo vhuyelwa ngayo nga u dzula ni tshi ḓifara nga nḓila yo kunaho.
3. Shavhani u ḓifara luvhi nga zwa vhudzekani
Yosefa o hana musi muṅwe mufumakadzi a tshi ṱoḓa uri a ite nae zwa vhudzekani. Vhalani Genesi 39:1-12, ni kone u fhindula mbudziso dzi tevhelaho:
-
Ndi mini zwo ṱuṱuwedzaho Yosefa uri a shavhe u ḓifara luvhi nga zwa vhudzekani?—Vhalani vese 9.
-
Naa ni vhona u nga Yosefa o ita phetho yavhuḓi? Ndi ngani ni tshi ralo?
Vhaswa vha nga edzisa hani tsumbo ya Yosefa, vha iledza u ḓifara luvhi nga zwa vhudzekani? Ṱalelani VIDIO.
Yehova u ṱoḓa uri roṱhe ri iledze u ḓifara luvhi. Vhalani 1 Vhakorinta 6:18, ni kone u fhindula mbudziso dzi tevhelaho:
-
Ndi zwiimo zwifhio zwine zwa nga ita uri muthu a ḓifare luvhi nga zwa vhudzekani?
-
Ni nga iledza hani u ḓifara luvhi?
4. Ni nga lwisana na milingo
Ndi mini zwine zwa nga ita uri zwi konḓe u lwisana na mulingo wa u ḓifara luvhi nga zwa vhudzekani? Ṱalelani VIDIO, ni kone u fhindula mbudziso i tevhelaho.
-
Munna a re kha vidio o ita mini musi a tshi ṱhogomela uri zwiṅwe zwa zwithu zwine a khou zwi humbula na u zwi ita zwi nga ita uri a fhedze a si tsha fhulufhedzea kha mufumakadzi wawe?
Na Vhakriste vha fhulufhedzeaho nga zwiṅwe zwifhinga vha a lwisana na u humbula zwithu zwi songo kunaho. Ni nga iledza hani u dzula ni tshi humbula nga ha zwithu zwi songo kunaho? Vhalani Vhafilipi 4:8, ni kone u fhindula mbudziso dzi tevhelaho:
-
Ndi zwithu zwifhio zwine ra tea u humbula nga hazwo?
-
U vhala Bivhili na u dzula ro farakanea kha mushumo wa Yehova zwi nga ri thusa hani uri ri lwisane na mulingo wa u ita tshivhi?
5. Milayo ya Yehova i a ri vhuyedza
Yehova u a ḓivha zwine zwa ri vhuyedza. U ri vhudza zwine ra tea u zwi ita uri ri dzule ro kuna na nḓila ine ra ḓo vhuyelwa ngayo musi ri tshi ita zwenezwo. Vhalani Mirero 7:7-27 kana ni ṱalele VIDIO, ni kone u fhindula mbudziso dzi tevhelaho.
-
Uyu muṱhannga o ḓidzhenisa hani mulingoni?—Vhalani Mirero 7:8, 9.
-
Mirero 7:23, 26 i sumbedza uri u ḓifara luvhi nga zwa vhudzekani zwi nga vha na masiandoitwa a si avhuḓi. Ri nga iledza thaidzo dzifhio arali ra dzula ri tshi ḓifara nga nḓila yo kunaho?
-
U ḓifara nga nḓila yo kunaho zwi nga ri thusa hani uri ri ḓiphiṋe nga vhutshilo lwa tshoṱhe?
Vhaṅwe vhathu vha amba uri zwine Bivhili ya zwi amba nga ha u funana ha vhathu vha mbeu nthihi, zwi sumbedza tshiṱuhu. Fhedzi Yehova ndi Mudzimu a re na lufuno nahone u ṱoḓa vhathu vhoṱhe vha tshi ḓiphiṋa nga vhutshilo lwa tshoṱhe. Arali ri tshi ṱoḓa u ḓiphiṋa nga vhutshilo lwa tshoṱhe, ri tea u tshila u tendelana na milayo ya Mudzimu. Vhalani 1 Vhakorinta 6:9-11, ni kone u fhindula mbudziso i tevhelaho:
-
Naa Mudzimu u dzhia u vha na lutamo lwa u funana na muthu wa mbeu i fanaho hu zwone fhedzi zwo khakheaho?
Roṱhe ri tea u ita tshanduko arali ri tshi ṱoḓa u takadza Mudzimu. Naa zwi a vhuyedza? Vhalani Phisalema 19:8, 11, ni kone u fhindula mbudziso dzi tevhelaho:
-
Naa ni vhona u nga milayo ya Yehova ya vhuḓifari i a pfala? Ndi ngani ni tshi ralo?
Yehova o thusa vhathu vhanzhi uri vha kone u tevhedza milayo yawe ya vhuḓifari. Na inwi a nga ni thusa
VHAṄWE VHATHU VHA AMBA URI: “A zwo ngo khakhea u ita zwa vhudzekani na muṅwe na muṅwe, tenda ni tshi funana.”
-
Inwi ni nga ri mini?
NO GUDA MINI?
Vhudzekani ndi tshifhiwa tshe Yehova a tshi ṋea munna na mufumakadzi vho vhinganaho uri vha ḓiphiṋe ngatsho.
Ni Kha Ḓi Zwi Humbula?
-
U ḓifara luvhi nga zwa vhudzekani zwi katela mini?
-
Ndi mini zwine zwa ḓo ri thusa u iledza u ḓifara luvhi nga zwa vhudzekani?
-
Ri vhuyelwa hani musi ri tshi tevhedza milayo ya Yehova ya vhuḓifari?
WANANI ZWO ENGEDZEAHO
Gudani uri ndi ngani Mudzimu a tshi ṱoḓa uri munna na mufumakadzi vhane vha ṱoḓa u dzula vhoṱhe vha vhingane nga lwa mulayo.
“Bivhili I Ri Mini Nga Ha U Dzula Noṱhe Ni Songo Vhingana?” (Thero i re kha jw.org)
Gudani uri ndi ngani zwine Bivhili ya zwi funza nga ha uri u funana ha vhathu vha mbeu i fanaho zwo khakhea, zwi sa ambi uri ri tea u vha vhenga.
“Naa Zwo Khakhea U Funana Nga Tsha Mbeu I Fanaho?” (Thero i re kha jw.org)
Gudani uri ndi ngani milayo yoṱhe ya Mudzimu i ambaho nga vhudzekani i tshi ri tsireledza.
“Naa U Ita Zwa Vhudzekani Nga Mulomo Ndi U Ita Zwa Vhudzekani Zwa Vhukuma?” (Thero i re kha jw.org)
Kha nganeavhutshilo i re na tshiṱoho tshine tsha ri “Vho Vha Vha Tshi Nṱhonifha,” vhonani uri ndi mini zwe zwa ita uri muṅwe munna we a vha a tshi ita zwa u pfana na vhaṅwe vhanna a shandule nḓila dzawe u itela u takadza Mudzimu.
a U ḓifara luvhi nga zwa vhudzekani zwi katela u ita zwithu zwo fhambanaho zwi ngaho u ita zwa vhudzekani, u dzhenisa tshiraḓo tsha mbeu mulomoni kana kha maraho, u fara-fara zwiraḓo zwa mbeu zwa muṅwe muthu u itela u takadzana nga lwa vhudzekani.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
