NGUDO 44
Naa Zwithu Zwoṱhe Zwine Zwa Pembelelwa Zwi A Takadza Mudzimu?
Yehova u ṱoḓa ri tshi ḓiphiṋa nga vhutshilo na uri ri pembele nga zwiṅwe zwifhinga. Fhedzi naa zwithu zwoṱhe zwine zwa pembelelwa zwi a mu takadza? Ri nga sumbedza hani uri ri funa Yehova musi zwi tshi ḓa kha ḽeneḽi fhungo?
1. Ndi ngani zwithu zwinzhi zwine vhathu vha zwi pembelela zwi tshi sinyusa Yehova?
Zwi nga ni mangadza u ḓivha uri vhunzhi ha zwithu zwine vhathu vha zwi pembelela, a zwi tendelani na zwine Bivhili ya zwi funza kana zwi bva kha vhurabeli ha mazwifhi. Zwiṅwe zwa zwenezwo zwithu zwine zwa pembelelwa zwi tshimbidzana na vhudimoni kana na pfunzo ya uri musi muthu o lovha, muya wawe u a bvela phanḓa u tshi tshila. Zwiṅwe zwi tshimbidzana na zwithu zwine vhathu vha zwi tenda zwa uri vha ḓo wana mashudu. (Yesaya 65:11) Yehova o vhudza vhagwadameli vhawe uri: “Ni ḓifhambanye navho, ni litshe u fara zwithu zwi songo kunaho.”—2 Vhakorinta 6:17. a
2. Yehova u ḓipfa hani nga ha u pembelela zwithu zwine zwa hulisa vhathu zwi songo tea?
Yehova u ri tsivhudza uri ri songo “fhulufhela vhathu.” (Vhalani Yeremia 17:5.) Dziṅwe holodei ndi dza u hulisa vhavhusi kana maswole. Vhaṅwe vha pembelela zwiga zwa lushaka kana ḓuvha ḽa mbofholowo. (1 Yohane 5:21) Kha dziṅwe holodei, vhathu vha pembelela madzangano a politiki kana a u thusa tshitshavha. Yehova a nga ḓipfa hani arali ra hulisa vhathu kana madzangano zwi songo tea, zwihuluhulu ane a ṱuṱuwedza vhathu uri vha ite zwine Mudzimu a zwi vhenga?
3. Ndi vhuḓifari vhufhio vhune ha ita uri zwithu zwine zwa pembelelwa zwi si ṱanganedzee?
Bivhili i amba uri zwo khakhea u ‘nwesa, u ita zwimima zwi sa langei na u ṱaṱisana nga u nwa.’ (1 Petro 4:3) Musi vhathu vha tshi khou pembelela zwiṅwe zwithu, vha a swika hune vha balelwa u ḓifara na u ita zwithu zwivhi. U itela uri ri dzule ri khonani dza Yehova, ri fanela u iledza u ḓifara nga yeneyo nḓila i songo kunaho.
GUDANI ZWO ENGEDZEAHO
Vhonani uri ni nga takadza hani Yehova nga u ita phetho dza vhuṱali musi zwi tshi ḓa kha dziholodei na zwiṅwe zwithu zwine zwa pembelelwa.
4. Iledzani u pembelela zwithu zwine zwa sinyusa Yehova
Vhalani Vhaefesa 5:10, ni kone u fhindula mbudziso dzi tevhelaho:
-
Ndi mini zwine ra fanela u vha na vhuṱanzi nazwo musi ri tshi khetha uri ri ḓo pembelela holodei kana a ri nga pembeleli?
-
Ndi holodei dzifhio dzo ḓoweleaho hune na dzula hone?
-
Naa ni vhona u nga dzenedzo holodei dzi takadza Yehova?
Sa tsumbo, naa no no vhuya na ḓivhudzisa uri Mudzimu u dzhia hani u pembelela ḓuvha ḽa mabebo? Bivhili a i ambi na luthihi nga ha mugwadameli wa Yehova we a vhuya a pembelela ḓuvha ḽawe ḽa mabebo, fhedzi i amba nga ha vhathu vhavhili vha sa gwadameli Yehova vhe vha pembelela ḓuvha ḽavho ḽa mabebo. Vhalani Genesi 40:20-22 na Mateo 14:6-10. Ni kone u fhindula mbudziso dzi tevhelaho:
-
Ndi mini zwine zwa fana nga honoho vhuṱambo vhuvhili ha u pembelela ḓuvha ḽa mabebo?
-
U ya nga dzenedzi vese, ni vhona u nga Yehova u ḓipfa hani nga ha u pembelela ḓuvha ḽa mabebo?
Ni nga kha ḓi ḓivhudzisa uri: ‘Naa Yehova u na ndavha nazwo arali nda pembelela ḓuvha ḽa mabebo kana u pembelela zwiṅwe zwithu zwi sa tshimbidzani na zwine Bivhili ya zwi funza?’ Vhalani Ekisoda 32:1-8. Ni ṱalele VIDIO, ni kone u fhindula mbudziso dzi tevhelaho.
-
Ndi ngani ri tshi fanela u vha na vhungoho ha uri ndi zwifhio zwine Yehova a zwi ṱanganedza?
-
Ri nga zwi itisa hani?
Ri nga ḓivha hani uri zwine zwa khou pembelelwa zwi sinyusa Mudzimu?
-
Naa zwi tshimbidzana na pfunzo dzi sa bviho Bivhilini? U itela u wana phindulo, itani ṱhoḓisiso ya uri zwo thoma ngafhi.
-
Naa zwi hulisa vhathu zwi songo tea, madzangano kana zwiga zwa lushaka? Ri hulisa Yehova u fhira zwithu zwoṱhe nahone ri fhulufhela uri ndi ene ane a ḓo tandulula thaidzo dzoṱhe dzi re hone shangoni.
-
Naa zwine zwa itwa zwi lwisana na milayo i re Bivhilini? Ri fanela u dzula ri tshi ḓifara nga nḓila yo kunaho.
5. Thusani vhaṅwe uri vha ṱhonifhe zwine na zwi tenda
A zwo ngo leluwa u hana musi vhaṅwe vha tshi ni kombetshedza uri ni pembelele zwithu zwine zwa sinyusa Yehova. Vha vhudzeni zwine na zwi tenda nga vhuṱali nahone ni sa fheli mbilu. U itela u vhona tsumbo ya uri ni nga zwi itisa hani, ṱalelani VIDIO.
Vhalani Mateo 7:12, ni kone u fhindula mbudziso dzi tevhelaho:
-
U ya nga iyi vese, naa ni fanela u vhudza mashaka aṋu vhane vha si gwadamele Yehova uri a vho ngo tea u pembelela holodei?
-
Ni nga khwaṱhisedza hani mashaka aṋu uri ni a vha funa naho hu na zwiṅwe zwithu zwine a ni nga ḓo pembelela navho?
6. Yehova u ṱoḓa uri ri takale
Yehova u ṱoḓa uri ri ḓiphiṋe na mashaka ashu na khonani dzashu. Vhalani Muhuweleli 8:15, ni kone u fhindula mbudziso i tevhelaho:
-
Iyi vese i sumbedza hani uri Yehova u ṱoḓa ri tshi takala?
Yehova u ṱoḓa vhathu vhawe vha tshi ḓiphiṋa musi vho kuvhangana vhoṱhe. Ṱalelani VIDIO, ni vhone uri zwenezwi zwi itea hani musi Ṱhanzi dza Yehova vho kuvhangana mabuthanoni avho a tshaka dzoṱhe.
Vhalani Vhagalata 6:10, ni kone u fhindula mbudziso dzi tevhelaho:
-
Naa ri tea u pembelela holodei dzo ḓoweleaho u itela uri ri “thuse” vhaṅwe vhathu?
-
Ndi zwifhio zwine zwa nga ita uri ni takale nga maanḓa? Naa ndi u ṋea ni tshi khou tou kombetshedzea nga nṱhani ha uri ndi holodei kana ndi u ṋea nga nṱhani ha uri ni khou tou pfa ni tshi takalela u ṋea?
-
Nga zwiṅwe zwifhinga, vhunzhi ha Ṱhanzi dza Yehova vha a dzudzanya u ita zwithu zwavhuḓi u itela u ḓitakadza na vhana vhavho na u vha ṋea zwifhiwa vha songo zwi lavhelela. Arali ni na vhana, ndi zwifhio zwiṅwe zwithu zwo khetheaho zwine na nga vha itela zwone?
VHAṄWE VHATHU VHA AMBA URI: “A zwi na ndavha uri holodei dzo thoma ngafhi, tsha ndeme ndi u ḓiphiṋa na mashaka na dzikhonani.”
-
Inwi ni nga ri mini?
NO GUDA MINI?
Yehova u ṱoḓa uri ri ḓiphiṋe na mashaka na dzikhonani. Fhedzi u ṱoḓa ri tshi iledza u pembelela zwithu zwine zwa mu sinyusa.
Ni Kha Ḓi Zwi Humbula?
-
Ri nga ḓivhudzisa mbudziso dzifhio u itela u vhona arali zwine zwa khou pembelelwa zwi tshi sinyusa Yehova?
-
Ri nga thusa hani mashaka ashu na khonani dzashu uri vha pfesese phetho yashu nga ha dziholodei?
-
Ni zwi ḓivha hani uri Yehova u ṱoḓa uri ri takale na u ḓiphiṋa?
WANANI ZWO ENGEDZEAHO
Vhonani uri ndi holodei dzifhio dzine Vhakriste vha si dzi pembelele.
“Ndi Ngani Ṱhanzi Dza Yehova Vha Sa Pembeleli Holodei?” (Thero i re kha jw.org)
Vhonani zwithu zwiṋa zwine zwa ita uri ri tende uri u pembelela maḓuvha a mabebo zwi sinyusa Mudzimu.
“Ndi Ngani Ṱhanzi Dza Yehova Vha Sa Pembeleli Ḓuvha Ḽa Mabebo?” (Thero i re kha jw.org)
Vhonani uri muṅwe muswa o shumisa hani vhuṱali musi a tshi seiwa tshikoloni ngauri ha pembeleli Khirisimusi.
Vhakriste vhanzhi vho khetha u sa pembelela Khirisimusi. Vha ḓipfa hani nga phetho ye vha i dzhia?
“Vho Wana Zwithu Zwa Khwine-Khwine” (Tshiingamo, 1 December 2012)
a Vhalani Mafhungo O Engedzeaho 5 u itela u vhona zwine na nga zwi ita kha vhuṅwe vhuimo musi vhaṅwe vha tshi khou pembelela holodei.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
