Yesu ndi ṱhoho ya tshivhidzo tsha Vhakriste. (Vhaefesa 5:23) Ṋamusi, Yesu u livhisa vhatevheli vhawe e ṱaḓulu a tshi shumisa “mulanda a fhulufhedzeaho na wa vhuṱali.” (Vhalani Mateo 24:45.) Yesu Kristo ndi ene o khethaho onoyo mulanda, a mu ṋea ndugelo ya u ita dziṅwe phetho. Fhedzi onoyo mulanda u tea u thetshelesa Yesu Kristo na u shumela vharathu vhawe. Onoyo mulanda ndi nnyi? U ri ṱhogomela hani?

1. “Mulanda a fhulufhedzeaho na wa vhuṱali” ndi nnyi?

Ndi kale Yehova a tshi shumisa vhathu kana tshigwada tshiṱuku tsha vhathu uri tshi ṋee vhathu vhawe vhulivhisi. (Maḽeaxi 2:7; Vhahevheru 1:1) Nga murahu ha lufu lwa Yesu, vhaapostola na vhahulwane vha Yerusalema vho mbo ḓi thoma u ranga phanḓa. (Mishumo 15:2) Na ṋamusi, tshigwada tshiṱuku tsha vhahulwane vha tshivhidzo tshi khou ranga phanḓa. Tshi vhidzwa Tshigwada tshi Langaho tsha Ṱhanzi dza Yehova. Tshi ri ṱhogomela nga u ri ṋea zwithu zwine zwa khwaṱhisa lutendo lwashu na u livhisa mushumo wa u ḓivhadza mafhungo maḓifha. Tshenetshi tshigwada tshi dovha tsha vhidzwa “mulanda a fhulufhedzeaho na wa vhuṱali . . . we [Yesu] a mu vhea.” (Mateo 24:45a) Miraḓo yoṱhe ya Tshigwada tshi Langaho ndi Vhakriste vho ḓodzwaho nga muya mukhethwa nahone vha ḓo vhusa na Kristo Muvhusoni wa ṱaḓulu musi vho no fhedza vhutshilo havho ha kha ḽifhasi.

2. Mulanda a fhulufhedzeaho u ri ṋea zwithu zwifhio zwi khwaṱhisaho lutendo lwashu?

Yesu o amba uri mulanda a fhulufhedzeaho u ḓo “[ṋea Vhakriste] zwiḽiwa zwavho nga tshifhinga tsho teaho.” (Mateo 24:45b) Samusi zwiḽiwa zwi tshi ri thusa uri ri vhe na maanḓa na u ita uri ri vhe na mutakalo wavhuḓi, na zwiḽiwa zwine zwa ri khwaṱhisa lutendo zwi ita uri ri dzule ro khwaṱha ri tshi fhulufhedzea kha Yehova na u ita mushumo we Yesu a ri ṋea wone. Zwenezwo zwiḽiwa ndi vhulivhisi vhu bvaho Ipfini ḽa Mudzimu. (1 Timotheo 4:6) Ri wana zwenezwo zwiḽiwa zwi khwaṱhisaho lutendo miṱanganoni ya tshivhidzo, maguvhanganoni, mabuthanoni, kha khandiso dzo thewaho Bivhilini na kha vidio dzine dza ri thusa u ḓivha zwine Mudzimu a zwi ṱoḓa na u ita uri ri vhe na vhushaka ho khwaṱhaho nae.

 GUDANI ZWO ENGEDZEAHO

3. Vhathu vha Yehova vha tea u dzudzanyea

Tshigwada tshi Langaho tshi dzudzanya mushumo wa Ṱhanzi dza Yehova tshi tshi livhiswa nga Yesu. Yesu o livhisa Vhakriste vha u thoma nga nḓila i fanaho. Ṱalelani VIDIO.

Vhalani 1 Vhakorinta 14:33, 40, ni kone u fhindula mbudziso i tevhelaho:

• Idzi vese dzi sumbedza hani uri Yehova u ṱoḓa uri Ṱhanzi dzawe dzi dzudzanyee?

4. Mulanda a fhulufhedzeaho u dzudzanya mushumo washu wa u ḓivhadza mafhungo maḓifha

U ḓivhadza mafhungo maḓifha ho vha hu mushumo wa ndeme we Vhakriste vha u thoma vha u ita. Vhalani Mishumo 8:14, 25, ni kone u fhindula mbudziso dzi tevhelaho:

• Kha Vhakriste vha u thoma, ndi nnyi we a vha a tshi livhisa mushumo wa u ḓivhadza mafhungo maḓifha?

• Petro na Yohane vho ita mini musi vha tshi ṋewa vhulivhisi nga vhaapostola ngavho?

Mushumo wa u ḓivhadza mafhungo maḓifha ndi mushumo wa ndeme nga maanḓa wo dzudzanywaho nga Tshigwada tshi Langaho. Ṱalelani VIDIO.

 Yesu o ombedzela nḓila ine u ḓivhadza mafhungo maḓifha zwa vha zwa ndeme ngayo. Vhalani Marko 13:10, ni kone u fhindula mbudziso dzi tevhelaho:

• Ndi ngani u ḓivhadza mafhungo maḓifha zwi zwa ndeme kha Tshigwada tshi Langaho?

• Ndi ngani ri tshi ṱoḓa “mulanda a fhulufhedzeaho na wa vhuṱali” uri a dzudzanye wonoyu mushumo une wa itwa shangoni ḽoṱhe?

5. Mulanda a fhulufhedzeaho u ri ṋea vhulivhisi

Tshigwada tshi Langaho tshi ṋea Vhakriste vhulivhisi shangoni ḽoṱhe. Tshi ḓivha hani uri ndi vhulivhisi vhufhio vhune tsha tea u vhu ṋea? Vhonani uri tshigwada tshi langaho tsha Vhakriste vha u thoma tsho zwi itisa hani. Vhalani Mishumo 15:1, 2, ni kone u fhindula mbudziso dzi tevhelaho:

• Vhaṅwe Vhakriste vha u thoma vho vha vha sa tendelani kha mini?

• Paulo, Baranaba na vhaṅwe vho ya kha nnyi u itela u wana thuso?

Vhalani Mishumo 15:12-18, 23-29, ni kone u fhindula mbudziso i tevhelaho:

• Tshigwada tshi langaho tsha Vhakriste vha u thoma tsho ita mini musi tshi sa athu dzhia phetho u itela u livhiswa nga Mudzimu kha eneo mafhungo?—Vhalani vese 12, 15 na 28.

Vhalani Mishumo 15:30, 31 na 16:4, 5, ni kone u fhindula mbudziso dzi tevhelaho:

• Vhakriste vha u thoma vho ḓipfa hani nga vhulivhisi he vha ṋewa hone nga tshigwada tshi langaho?

• Yehova o vha fhaṱutshedza hani nge vha thetshelesa?

Vhalani 2 Timotheo 3:16 na Yakobo 1:5, ni kone u fhindula mbudziso i tevhelaho:

• Ṋamusi Tshigwada tshi Langaho tshi wana ngafhi vhulivhisi musi tshi tshi ṱoḓa u ita phetho?

 NO GUDA MINI?

Tshigwada tshi Langaho ndi “mulanda a fhulufhedzeaho na wa vhuṱali” o khethiwaho nga Kristo. Tshi ṋea Vhakriste vhulivhisi na zwiḽiwa zwi vha khwaṱhisaho lutendo u mona na shango ḽoṱhe.

Ni Kha Ḓi Zwi Humbula?

• Ndi nnyi o khethaho “mulanda a fhulufhedzeaho na wa vhuṱali”?

• Tshigwada tshi Langaho tshi ri ṱhogomela hani?

• Naa ni a tenda uri Tshigwada tshi Langaho ndi “mulanda a fhulufhedzeaho na wa vhuṱali”?