Sedzani kutukana ku re kha tshifanyiso. Ku vhonala ku kwoṱhe nahone ku tshi khou ofha, a si zwone kani? Naa no no vhuya na ḓipfa nga yeneyo nḓila?— Roṱhe ri a ḓipfa nga yeneyo nḓila nga tshiṅwe tshifhinga. Bivhili i amba nga ha khonani dza Yehova dze dza ḓipfa dzi dzoṱhe nahone dzi tshi ofha. Muṅwe wavho ndi Elia. Kha ri ambe nga hae.

Elia o vha a tshi dzula Isiraele, musi Yesu a sa athu bebiwa. Ahaba, khosi ya Isiraele, o vha a sa khou rabela Mudzimu wa ngoho, Yehova. Ahaba na mufumakadzi wawe Isebele, vho vha vha tshi rabela Baali mudzimu wa mazwifhi. Nga zwenezwo vhathu vhanzhi kha ḽa Isiraele vha thoma u rabela Baali. Isebele o vha a tshi ṱoḓa u vhulaha vhathu vhoṱhe vhane vha rabela Yehova, u katela na Elia! Naa ni a ḓivha uri Elia o ita mini?—

Elia o shavha! A ya kule hune ha vha sogani nahone a dzumbama bakoni. Ni humbula uri ndi ngani o ita zwenezwo?— Ee, ndi  ngauri o vha a tshi khou ofha. Fhedzi zwo vha zwi sa ṱoḓei uri Elia a ofhe. Ndi ngani? O vha a tshi zwi ḓivha uri Yehova a nga mu thusa. Yehova o vha o no sumbedza Elia maanḓa awe tshifhingani tsho fhiraho. Yehova o vhuya a fhindula thabelo ya Elia nga u ḓisa mulilo u tshi bva ṱaḓulu. Vhukuma Yehova a nga kona u thusa Elia zwino!

Musi Elia e bakoni, Yehova o amba nae a mu vhudzisa a ri: ‘U khou ṱoḓa mini fhano?’ Elia a fhindula a ri: ‘Ndi nṋe ane a kha ḓi rabela iwe. Ndo dzula ndi ndoṱhe, nahone ndi khou ofha uri ndi ḓo vhulahwa.’ Elia o humbula uri khamusi vhaṅwe vhashumeli vhoṱhe vha Yehova vho vhulahwa. Fhedzi Yehova o vhudza Elia uri: ‘Hai, a si ngoho hezwo. Huna vhathu vha 7 000 vhane vha kha ḓi rabela nṋe. U songo ofha, ndi na mushumo munzhi u ne nda ṱoḓa u tshi u ita!’ Naa ni humbula uri Elia o vha o takala musi a tshi pfa zwenezwo?—

Ni nga guda mini kha zwo iteaho kha Elia?— Ni songo vhuya na ḓipfa ni noṱhe nahone ni tshi khou ofha. Ni na khonani dzine dza funa Yehova na inwi dzi a ni funa. Zwiṅwe hafhu, Yehova u na maanḓa mahulu, nahone u ḓo dzula a tshi ni thusa! Naa no takala u ḓivha uri zwa vhukuma a ni noṱhe?—