Kha ri zwi dzhie ri ḓoroboni ya Yeriko. Heyi ḓorobo i shangoni ḽa Kanana, hune vhathu vha si tende kha Yehova. Mufumakadzi ane a pfi Rahaba u dzula henefha.

Musi Rahaba a tshi kha ḓi vha musidzana muṱuku, o pfa nga ha mafhungo a uri Mushe o fhandekanya Lwanzhe Lutswuku nahone a ranga phanḓa Vhaisiraele vha tshi bva Egipita. O dovha a pfa nga nḓila ye Yehova a vha thusa ngayo uri vha kunde dzinndwani musi vha tshi lwa na maswina avho. Zwino u pfa uri Vhaisiraele vha khou dzula tsini na Yeriko!

Ḽiṅwe ḓuvha nga madekwana, Vhaisiraele vhavhili vha ya u ṱola ḓorobo ya Yeriko. Vha ḓa nḓuni ya Rahaba. A vha vhudza uri kha vha dzhene vha dzule. Nga madekwana, khosi ya Yeriko ya pfa uri Vhaisiraele vhavhili vha fhano ḓoroboni nahone vha nḓuni ya Rahaba. Khosi ya rumela vhanna uri vha ḓe vha vha fare. Rahaba a dzumba vhanna vhavhili vha Vhaisiraele kha ṱhanga ya nnḓu yawe nahone a vhudza vhanna vho rumiwaho nga khosi uri: ‘Ndi zwone vhanna vhavhili Vhaisiraele vho vha vhe fhano, fhedzi vho no ṱuwa fhano ḓoroboni. Arali na vha pandamedza zwino, ni nga kona u vha fara!’ Naa ni a ḓivha uri ndi ngani Rahaba a tshi khou tsireledza a vha vhanna vhavhili?— Ndi ngauri o vha a tshi tenda kha Yehova nahone a tshi ḓivha uri u ḓo ṋea Vhaisiraele shango ḽa Kanana.

Musi vhanna vhavhili vha Vhaisiraele vha tshe nḓuni ya Rahaba, vha mu fulufhedzisa uri ene na vha muṱa wawe vha ḓo tsireledzwa musi Yeriko hu tshi fheliswa. Naa ni a ḓivha uri vho mu vhudza uri a ite mini?— Vho ri: ‘U dzhie heyi thambo tswuku, u i vhofhe i ṋembelele kha fasiṱere. Arali wa ita ngauralo, vhoṱhe vha re nḓuni yau vha ḓo tsireledzwa.’ Rahaba a ita zwoṱhe zwe vhanna vhavhili vha Vhaisiraele vha mu vhudza zwone. Naa ni a ḓivha uri ho itea mini nga murahu ha zwenezwo?—

Nga murahu ha maḓuvha-nyana, Vhaisiraele vho ḓa vha mona na ḓorobo vha sa iti phosho. Vho mona na ḓorobo maḓuvha a rathi, luthihi nga ḓuvha. Fhedzi nga ḓuvha ḽa vhusumbe, vho mona na ḓorobo lwa sumbe. Nga zwenezwo vha amba nga ipfi ḽihulu. Yehova a ita uri mbondo dzo tangaho yeneyo ḓorobo dzi wele fhasi. Fhedzi nnḓu i re na thambo tswuku yo ṋembelelaho kha fasiṱere  yo sala yo ima! Naa ni khou i vhona kha tshifanyiso?— Rahaba na muṱa wawe vho tsireledzwa!

Ni nga guda mini kha Rahaba?— Rahaba o tenda kha Yehova ngauri o guda zwithu zwoṱhe zwavhuḓi nga hae. Na vhoinwi ni khou guda zwithu zwinzhi zwavhuḓi nga ha Yehova. Naa ni a tenda khae u fana na Rahaba?— Ri a zwi ḓivha uri ni a tenda!