Paradiso a i nga ḓo nga shango ḽine ra khou dzula khaḽo zwino. Mudzimu ho ngo vhuya a ṱoḓa ḽifhasi ḽi tshi ḓala khakhathi na zwililo, vhuṱungu na tshengelo. Tshifhingani tshi ḓaho, Mudzimu u ḓo ita ḽifhasi paradiso. Paradiso i ḓo vha yo itisa hani? Kha ri vhone uri Bivhili i ri mini:

Vhathu vho lugaho. Paradiso i ḓo vha haya ha khonani dza Mudzimu. Vha ḓo itelana zwithu zwavhuḓi. Vha ḓo tshila nga nḓila dzo lugaho dza Mudzimu.​—Mirero 2:21.

Zwiḽiwa zwinzhi. Paradisoni, a hu nga vhi na nḓala. Bivhili i ri: “Shangoni hu ḓo vha na muḓalo wa mavhele [kana, zwiḽiwa].”​—Psalme ya 72:16.

Nnḓu dzavhuḓi na mushumo u takadzaho. Paradisoni kha ḽifhasi, muṱa muṅwe na muṅwe u ḓo vha na haya hawo. Muṅwe na muṅwe u ḓo ita mushumo une wa ḓisa dakalo ḽa vhukuma.​—Yesaya 65:21-23.

 Mulalo shangoni ḽoṱhe. Vhathu a vha tsha ḓo lwa na u fa nndwani. Ipfi ḽa Mudzimu ḽi ri: “[Mudzimu] u dzivhisa dzinndwa.”​—Psalme ya 46:8, 9.

Mutakalo wavhuḓi. Bivhili i fulufhedzisa uri: “Kha vho dzulaho fhano [Paradisoni] a huna ane a ḓo ri: ndi a lwala.” (Yesaya 33:24) Hafhu, a hu tsha ḓo vha na tshihole kana mabofu kana madzinganḓevhe kana tshimuma.​—Yesaya 35:5, 6.

A hu tsha ḓo vha na vhuṱungu, zwililo, na lufu. Ipfi ḽa Mudzimu ḽi ri: “Lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”​—Ndzumbululo 21:4.

Vhathu vhavhi vha ḓo vha vha si tsheeho. Yehova u fulufhedzisa uri: “Vhavhi . . . tshavho ndi u lovha shangoni, vha mashandukwa vha tupulwa khaḽo.”​—Mirero 2:22.

Vhathu vha ḓo funana na u ṱhonifhana. A hu tsha ḓo vha na tshikhetho, u tsikeledzwa, vhupangwa, na u vhengana. Vhathu vha ḓo vha vhathihi nahone vha ḓo tshila u tendelana na nḓila dzo lugaho dza Mudzimu.​—Yesaya 26:9.