Arali ni na khonani ine na i takalela na u i ṱhonifha, ni lingedza u fana nayo. Bivhili i ri: “Yehova ndi wa vhuthu, tshawe ndi u luga.” (Psalme ya 25:8) Uri ri vhe khonani dza Mudzimu, ri fanela u vha na vhuthu. Bivhili i ri: “Ivhani vha-edzisa-Mudzimu sa vhana vha funwaho, ni tshimbile lufunoni.” (Vha-Efesa 5:1, 2) Hu tevhela dziṅwe nḓila dzine na nga ita zwenezwo ngadzo:

Thusani vhaṅwe. “Nga ri ite zwivhuya ri tshi itela vhoṱhe.”​—Vha-Galata 6:10.

Shumani nga maanḓa. “Mudzia-u-tswa a songo tsha tswa, khwine nga a shume a tshi ita zwo nakaho nga zwanḓa zwawe ene muṋe.”​—Vha-Efesa 4:28.

Dzulani no kuna mivhilini na kha matshilele. “Nga ri ṱambe dzitshika dzoṱhe dza kha ṋama na kha muya, ri khunyeledze vhukhethwa hoṱhe rí tshi ofha Mudzimu.”​—2 Vha-Korinta 7:1.

 Shumisanani na miraḓo ya muṱa waṋu nga lufuno na ṱhonifho. “Huno . . . funa musadzi wau vhunga U tshi ḓi-funa, musadzi hone hu uri a ofhe munna wawe. Inwi vhana, thetshelesani vhabebi vhaṋu.”​—Vha-Efesa 5:33–6:1.

Funani vhaṅwe. “Nga ri funane, ngauri lufuno lu bva Mudzimuni.”​—1 Yohane 4:7.

Thetshelesani milayo ya shango. “Vhathu vhoṱhe nga vha pfe [muvhuso] . . . Ṋeani vhoṱhe zwo vha fanelaho: o fanelwaho nga lutho, ni mu fhe lutho.”​—Vha-Roma 13:1, 7.