Mudzimu u ṱoḓa ni tshi vha khonani yawe. Naa no no vhuya na humbula uri ni nga vha khonani ya Muthu muhulwanesa wa fhethu hoṱhe? Abrahamu, we a tshila kale-kale, o vha a tshi vhidzwa khonani ya Mudzimu. (Yakobo 2:23) Vhaṅwe vhe ha ambiwa ngavho Bivhilini na vhone vho ḓiphina nga vhukonani na Mudzimu nahone vho fhaṱutshedzwa zwihulwane. Ṋamusi, vhathu vha zwipiḓani zwoṱhe zwa ḽifhasi vho vha khonani dza Mudzimu. Na inwi-vho ni nga vha khonani ya Mudzimu.

U vha khonani ya Mudzimu zwi khwine u fhira u vha khonani ya muthu naho e ufhio. Mudzimu ha nyabwisi khonani dzawe dzi fulufhedzeaho. (Psalme ya 18:25) U vha khonani ya Mudzimu zwi khwine u fhira u vha na lupfumo. Musi mupfumi a tshi fa, vhaṅwe vha dzhia tshelede yawe. Naho zwo ralo, vhane vha ḓiphina nga vhukonani na Mudzimu vha na lupfumo lune lu sa ḓo dzhiiwa nga muṅwe.​—Mateo 6:19.

Vhaṅwe vhathu vha nga lingedza u ni litshisa u guda nga ha Mudzimu. Zwenezwi zwi nga itwa nga dziṅwe khonani dzaṋu kana vha muṱani. (Mateo 10:36, 37) Arali vhaṅwe vha ni sea kana vha ni shushedza, ḓivhudziseni, ‘Ndi nnyi ane nda ṱoḓa u mu takadza​—vhathu kana Mudzimu? Humbulani hezwi: Arali muthu a ni vhudza uri ni litshe u ḽa, naa ni nga mu thetshelesa? Vhukuma ni nga si mu thetshelese! Ni ṱoḓa zwiḽiwa uri ni tshile. Fhedzi Mudzimu a nga ni ita uri ni tshile nga hu sa fheli! Ngauralo ni songo tenda naho e nnyi a tshi ni litshisa u guda uri ni nga vha hani khonani ya Mudzimu.​—Yohane 17:3.