Yehova a nga si tendele vhathu vhavhi vha tshi tshinya Paradiso. Ndi khonani dzawe fhedzi dzine dza ḓo dzula henefho. Hu ḓo itea mini nga vhathu vhavhi? U itela u wana phindulo, ṱhogomelani nganea ya ngoho ya Noaxe. Noaxe o tshila miṅwaha ya zwigidi yo fhiraho. O vha e munna wavhuḓi we tshifhinga tshoṱhe a vha a tshi shuma nga maanḓa u ita zwi funwaho nga Yehova. Fhedzi vhaṅwe vhathu kha ḽifhasi vho ita zwithu zwivhi. Ngauralo Yehova o vhudza Noaxe uri O vha a tshi ḓo ḓisa maḓi mahulu u itela u fhelisa vhathu vhavhi vhoṱhe. O vhudza Noaxe uri a fhaṱe gungwa u itela uri ene na muṱa wawe vha si fe musi Maḓi Mahulu a tshi ḓa.​—Genesi 6:9-18.

Noaxe na muṱa wawe vho fhaṱa gungwa. Noaxe o sevha vhathu uri Maḓi Mahulu o vha a tshi khou ḓa, fhedzi a vho ngo mu thetshelesa. Vho bvela phanḓa vha tshi ita zwithu zwivhi. Musi o no fhedza u fhaṱa gungwa, Noaxe a dzhenisa zwipuka gungwani, na ene na muṱa wawe vha dzhena ngomu. Nga zwenezwo Yehova a ḓisa ḓumbu ḽihulu. Mvula yo na maḓuvha a 40 na vhusiku ha 40. Maḓi a ḓadza ḽifhasi ḽoṱhe.​—Genesi 7:7-12.

 Vhathu vhavhi vho xelelwa nga vhutshilo havho, fhedzi Noaxe na muṱa wawe vho tshidzwa. Yehova o vha tsireledza kha Maḓi Mahulu vha dzhena kha ḽifhasi ḽo kunakiswaho ḽi si na vhuvhi. (Genesi 7:22, 23) Bivhili i amba uri hu ḓo swika tshifhinga tshine Yehova a ḓo dovha a fhelisa vhane vha hana u ita zwo lugaho. Vhathu vho lugaho a vha nga ḓo fheliswa. Vha ḓo tshila Paradisoni kha ḽifhasi nga hu sa fheli.​—2 Petro 2:5, 6, 9.

Ṋamusi vhathu vhanzhi vha ita zwithu zwivhi. Shango ḽo ḓala khakhathi. Yehova u rumela Ṱhanzi dzawe lunzhi-lunzhi uri dzi sevhe vhathu, naho zwo ralo vhanzhi a vha ṱoḓi u thetshelesa maipfi a Yehova. A vha ṱoḓi u shandula nḓila dzavho. A vha ṱoḓi u thetshelesa musi Mudzimu a tshi vha vhudza nga ha zwo lugaho na zwi songo lugaho. Hu ḓo itea mini nga vhenevha vhathu? Naa vha ḓo vhuya vha shanduka ḽiṅwe ḓuvha? Vhanzhi vha nga si shanduke. Tshifhinga tshi khou ḓa tshine vhathu vhavhi vha ḓo fheliswa nahone a vha tsha ḓo tshila hafhu.​—Psalme ya 92:7.

Ḽifhasi a ḽi nga ḓo fheliswa; ḽi ḓo itwa paradiso. Vhane vha ḓo vha khonani dza Mudzimu vha ḓo tshila tshoṱhe Paradisoni kha ḽifhasi.​—Psalme ya 37:29.