Swina ḽihulwane ḽa Mudzimu ndi Sathane Diabolo. Ndi tshivhumbiwa tsha muya tshe tsha shandukela Yehova. Sathane u bvela phanḓa a tshi lwa na Mudzimu nahone a tshi itela vhathu khakhathi khulwane. Sathane ndi muvhi. Ndi muzwifhi na muvhulahi.​—Yohane 8:44.

Zwiṅwe zwivhumbiwa zwa muya zwo ṱanganela na Sathane kha u shandukela Mudzimu. Bivhili i zwi vhidza madimoni. U fana na Sathane, madimoni ndi maswina a vhathu. A ṱoḓa u huvhadza vhathu. (Mateo 9:32, 33; 12:22) Yehova u ḓo fhelisa tshoṱhe Sathane na madimoni awe. O salelwa nga tshifhinga tshiṱuku tsha u itela vhathu khakhathi.​—Ndzumbululo 12:12.

Arali ni tshi ṱoḓa u vha khonani ya Mudzimu, ni songo ita zwine Sathane a ṱoḓa uri ni zwi ite. Sathane na madimoni vha vhenga Yehova. Ndi maswina a Mudzimu, nahone vha ṱoḓa uri ni vhe swina ḽa Mudzimu. Ni fanela u khetha ane na ṱoḓa u mu takadza​—Sathane kana Yehova. Arali ni tshi ṱoḓa vhutshilo vhu sa fheli, ni fanela u khetha u ita zwi funwaho nga Mudzimu. Sathane u na vhukwila vhunzhi na nḓila nnzhi dzine a fhura vhathu ngadzo. Vhathu vhanzhi vha khou fhurwa ngae.​—Ndzumbululo 12:9.