U vha khonani ya Mudzimu ndi tshithu tsha khwine vhukuma. Mudzimu u ḓo ni funza nḓila ya u wana dakalo na tsireledzo; u ḓo ni vhofholola kha pfunzo dzo khakheaho na maitele a re na khombo. U ḓo thetshelesa thabelo dzaṋu. U ḓo ni thusa uri ni ḓiphine nga mulalo wa ngelelo na u vha na fulufhelo. (Psalme ya 71:5; 73:28) Mudzimu u ḓo ni tikedza musi wa khakhathi. (Psalme ya 18:18) Nahone Mudzimu u ni ṋea tshifhiwa tshawe tsha vhutshilo vhu sa fheli.​—Vha-Roma 6:23.

Musi ni tshi sendela tsini na Mudzimu, ni ḓo sendela tsini ha dziṅwe khonani dza Mudzimu. Vha ḓo vha khonani dzaṋu-vho. Zwi re zwone ndi uri vha ḓo nga dzikhaladzi na vhakomana vhaṋu. Vha ḓo takalela u ni funza nga ha Mudzimu nahone vha ḓo ni thusa na u ni ṱuṱuwedza.

A ri lingani na Mudzimu. Musi ni tshi ṱoḓa vhukonani na Mudzimu, ni fanela u pfesesa mbuno dza ndeme. Vhukonani na Mudzimu a si vhukonani vhune ra nga vhu vhambedza na vhuṅwe. Ndi muhulwanesa nahone u na vhuṱali na maanḓa mahulu u ri fhira. Ndi Muvhusi a re na ndugelo ya u ri vhusa. Ngauralo arali ri tshi ṱoḓa u vha khonani dzawe, ri fanela u mu thetshelesa nahone ri ite zwine a ri vhudza zwone. Zwenezwi zwi ḓo ri vhuyedza misi yoṱhe.​—Yesaya 48:18.