Arali ni tshi ṱoḓa u vha khonani ya Mudzimu, ni fanela u vha vhurerelini vhune Mudzimu a vhu ṱanganedza. Yesu o amba uri “vharabeli vhukuma” vha ḓo gwadamela Mudzimu u tendelana na “mafhungo-ngoho.” (Yohane 4:23, 24) Hu na nḓila nthihi fhedzi yo lugaho ya u gwadamela Mudzimu. (Vha-Efesa 4:4-6) Vhurereli ha ngoho vhu i sa vhutshiloni vhu sa fheli, nahone vhurereli ha mazwifhi vhu i sa ndozwoni.​—Mateo 7:13, 14.

Ni nga ṱalula vhurereli ha ngoho nga u sedza vhathu vhane vha vha khaho. Samusi Yehova o luga, vhane vha vha vhagwadameli vhawe vha ngoho vha fanela u vha vho lugaho. Samusi na muri wavhuḓi wa muswiri u tshi aṋwa maswiri avhuḓi, vhurabeli ha ngoho vhu bveledza vhathu vhavhuḓi.​—Mateo 7:15-20.

Khonani dza Yehova dzi ṱhonifha Bivhili nga ho dzikaho. Vha a zwi ḓivha uri Bivhili i bva ha Mudzimu. Vha tenda uri zwine ya amba zwi endedze vhutshilo havho, zwi piringulule vhuleme havho, nahone i vha thuse u guda nga ha Mudzimu. (2 Timotheo 3:16) Vha lingedza u ita zwine vha zwi amba.

 Khonani dza Yehova dzi a funana. Yesu o sumbedza u funa vhathu nga u vha funza nga ha Mudzimu, u fhodza vhe vha vha vha tshi khou lwala. Vha re vhurerelini ha ngoho vha a funa vhaṅwe. U fana na Yesu, a vha dzhieli fhasi zwisiwana kana vha matsinde o fhambanaho na avho. Yesu o amba uri vhathu vha ḓo ḓivha vhafunziwa vhawe nga u funana havho.​—Yohane 13:35.

Khonani dza Mudzimu dzi ṱhonifha dzina ḽa Mudzimu, Yehova. Arali muṅwe muthu a hana u shumisa dzina ḽaṋu, naa onoyo muthu a nga vha khonani yaṋu ya tsini-tsini? Na kathihi! Musi ri na khonani, ri shumisa dzina ḽawe nahone ri amba zwithu zwavhuḓi nga yeneyo khonani na vhaṅwe. Ngauralo vhane vha tama u vha khonani dza Mudzimu vha fanela u shumisa dzina ḽawe nahone vha ambe nga hae na vhaṅwe. Yehova u ṱoḓa ri tshi ita zwenezwo.​—Mateo 6:9; Vha-Roma 10:13, 14.

U fana na Yesu, khonani dza Mudzimu dzi funza vhathu nga ha Muvhuso wa Mudzimu. Muvhuso wa Mudzimu ndi hulumeni wa ṱaḓulu une wa ḓo ita uri ḽifhasi ḽi vhe paradiso. Khonani dza Mudzimu vha vhudza vhaṅwe enea mafhungo maḓifha nga ha Muvhuso wa Mudzimu.​—Mateo 24:14.

Ṱhanzi dza Yehova vha lingedza u vha khonani dza Mudzimu. Vha ṱhonifha Bivhili nahone vha a funana. Vha shumisa na u hulisa dzina ḽa Mudzimu na u funza vhaṅwe nga ha Muvhuso wa Mudzimu. Ṱhanzi dza Yehova ndi vhathu vhane vha vha vhurerelini ha ngoho ḽifhasini ṋamusi.