Ngudo 6
Paradiso I Tsini!
Zwithu zwivhi zwine zwa khou itea zwino kha ḽifhasi zwi sumbedza uri Paradiso i tsini. Bivhili i ri ri ḓo vhona zwifhinga zwi ṱungufhadzaho hu sa athu ḓa Paradiso. Ri khou tshila kha zwenezwo zwifhinga zwino! Hu tevhela zwiṅwe zwithu zwe Bivhili ya amba uri zwi ḓo itea:
Dzinndwa khulwane. “Lushaka lu ḓo vutshela lushaka; muvhuso wa vutshela muvhuso.” (Mateo 24:7) Honohu vhuporofita ho ḓadzea. U bva nga ṅwaha wa 1914, ho vha na nndwa mbili na dziṅwe nndwa dza shango nnzhi ṱhukhu. Vhathu vha dzimilioni vho fa khadzo.
Malwadze o phaḓalalaho. ‘Nga thungo ho vha na malwadze.’ (Luka 21:11) Naa zwenezwi ndi ngoho? Ee. Khentsara, vhulwadze ha mbilu, vhulwadze ha lufhiha, malaria, AIDS, na maṅwe malwadze o vhulaha vhathu vha dzimilioni.
U shayea ha zwiḽiwa. Ḽifhasini ḽoṱhe hu na vhathu vha shayaho zwiḽiwa zwo linganaho. Vhathu vha dzimilioni vha fa nga nḓala ḓuvha ḽiṅwe na ḽiṅwe. Tshenetshi ndi tshiṅwe tshiga tshi sumbedzaho uri hu si kale Paradiso i ḓo vha hone. Bivhili i ri: “Hu ḓo wa dzinḓala.”—Marko 13:8.
Midzinginyo. “Hu ḓo vha na midzinginyo afho na afho.” (Mateo 24:7) Zwenezwi zwo itea tshifhingani tshashu. Vhathu vha fhiraho milioni vho fa nga midzinginyo u bva nga 1914.
Vhathu vhavhi. Vhathu vha ḓo vha “vhatami vha mali” na “vha funaho hu tshi naka zwavho fhedzi.” Vha ‘tama u ḓiphina u fhira u tama Mudzimu.’ Vhana vha ḓo vha “vhanyadzi vha vhabebi.” (2 Timotheo 3:1-5) Naa a ni tendi uri hu na vhathu vhanzhi vho raloho ṋamusi? A vha ṱhonifhi Mudzimu, nahone vha itela khakhathi vhane vha lingedza u guda nga ha Mudzimu.
Vhuvemu. Hu ḓo dovha ha vha na u “anda ha vhuvhi.” (Mateo 24:12) Vhukuma ni ḓo tenda uri vhuvemu vhu khou ṋaṋa u fhira miṅwaha yo fhiraho. Vhathu huṅwe na huṅwe vha khou ṱangulwa, u fhurwa, kana u huvhadzwa.
Zwenezwi zwithu zwoṱhe zwi sumbedza uri Muvhuso wa Mudzimu u tsini. Bivhili i ri: “Arali ni tshi vhona izwo zwi tshi vho vha hone, ni ḓivhe zwauri muvhuso wa Mudzimu u tsini.” (Luke 21:31) Muvhuso wa Mudzimu ndi mini? Ndi hulumeni wa Mudzimu wa ṱaḓulu une wa ḓo ḓisa Paradiso kha ḽifhasi. Muvhuso wa Mudzimu u ḓo dzhiela vhudzulo mivhuso ya vhathu.—Daniele 2:44.
