Vhuvhi ho thoma kha ḽifhasi musi Saṱhane a tshi thoma u zwifha. U thomani Saṱhane o vha e muruṅwa o fhelelaho, fhedzi “ho ngo ima kha ngoho.” (Yohane 8:44) O thoma u ṱoḓa uri vhathu vha mu gwadamele nṱhani ha uri vha gwadamele Mudzimu. Saṱhane o zwifhela Eva, mufumakadzi wa u thoma, a mu kunga uri a gwadamele ene nṱhani ha uri a gwadamele Mudzimu. Na Adamu o ita zwa Eva a sa thetshelese Mudzimu. U sa thetshelesa hawe zwo ita uri hu vhe na tshengelo na lufu.​—Vhalani Genesi 3:1-6, 19.

Musi Saṱhane a tshi zwifhela Eva nga u ita uri a si thetshelese Mudzimu, o vha a tshi khou thoma u shandukela nḓila ine Mudzimu a vhusa ngayo kana vhuimo hawe sa Wa-Ṱaḓulu-ṱaḓulu. Vhunzhi ha vhathu vho tikedza Saṱhane kha u landula Mudzimu uri a sa vhe Muvhusi wavho. Zwa ita uri Saṱhane a vhe “muvhusi wa shango.”​—Vhalani Yohane 14:30; 1 Yohane 5:19.

A huna na tshithihi tsho khakheaho kha zwoṱhe zwe Mudzimu a zwi sika. Vhathu na vharuṅwa vhe Mudzimu a vha sika vho vha vha tshi nga kona u thetshelesa ndaela dza Mudzimu nga ho fhelelaho. (Dotoronomio 32:4, 5) Mudzimu o ri sika ri na mbofholowo ya u ḓikhethela kha u ita zwo lugaho na zwi songo lugaho. Yeneyo mbofholowo i ri ṋea tshibuli tsha u sumbedza uri ri funa Mudzimu.​—Vhalani Yakobo 1:13-15; 1 Yohane 5:3.

Yehova o tendela vhathu lwa tshifhinganyana vha tshi shandukela nḓila ine a vhusa ngayo. Ndi ngani? U itela u sumbedza uri vhathu vha nga si vhuyelwe na luthihi arali vha sa vhuswi ngae. (Muhuweleli 7:29; 8:9) Ro no vhona vhuṱanzi ha zwenezwo kha miṅwaha ya 6 000 yo fhiraho. Vhavhusi vho balelwa  u fhelisa nndwa, vhuvemu, u haṱula nga nḓila i si yavhuḓi na malwadze.​—Vhalani Yeremia 10:23; Vharoma 9:17.

Nḓila ine Mudzimu a vhusa ngayo yo fhambana na nḓila ine vhathu vha vhusa ngayo ngauri i vhuyedza vhane vha i ṱanganedza. (Yesaya 48:17, 18) Hu si kale Yehova u ḓo fhelisa mivhuso yoṱhe ya vhathu. Vhane vha ḓo dzula kha ḽifhasi ndi vhane vha khetha u vhuswa Mudzimu.—Yesaya 11:9; Vhalani Daniele 2:44.

Ṱalelani vidio ine ya ri, Ndi Ngani Mudzimu A Tshi Tendela Tshengelo?

Saṱhane u amba uri vhathu vha shumela Yehova nga zwiitisi zwa tseḓa. Naa ni nga takalela u sumbedza uri zwenezwo ndi mazwifhi? Ni nga zwi kona! U sa fhela mbilu ha Mudzimu hu ita uri roṱhe ri kone u sumbedza arali ri tshi ṱoḓa u vhuswa nga Mudzimu kana nga vhathu. Ri sumbedza zwine ra zwi khetha nga nḓila ine ra tshila ngayo.​—Vhalani Yobo 1:8-12; Mirero 27:11.

Ri sumbedza uri ri khetha Mudzimu uri a vhe Muvhusi washu nga u guda na u tevhedza mafhungo ngoho a re Bivhilini. (Yohane 4:23) Ri landula Saṱhane uri a sa vhe muvhusi washu nga u iledza u ṱanganela kha zwa politiki na dzinndwa, samusi na Yesu o ita nga u ralo.​—Vhalani Yohane 17:14.

Saṱhane u shumisa maanḓa awe u itela uri u ḓifara luvhi na u ita zwithu zwi re na khombo zwi vhonale u nga ndi zwavhuḓi. Musi ri sa iti zwithu zwo raloho, dziṅwe khonani dzashu na maṅwe mashaka ashu vha nga ri goḓa kana u ri pikisa. (1 Petro 4:3, 4) Ri fanela u khetha. Naa ri ḓo vha khonani na vhathu vhane vha funa Mudzimu? Naa ri ḓo thetshelesa milayo yawe ya vhuṱali na i sumbedzaho uri u a ri funa? Arali ra ita nga u ralo, ri ḓo vha ri tshi khou sumbedza uri Saṱhane o vha a tshi khou zwifha musi a tshi amba uri a hu na muthu ane a nga ita zwine zwa ambiwa nga Mudzimu musi o sedzana na mutsiko.​—Vhalani 1 Vhakorinta 6:9, 10; 15:33.

Nḓila ine Mudzimu a funa ngayo vhathu i khwaṱhisedza uri vhuvhi na tshengelo zwi ḓo fhela. Vhane vha sumbedza uri vha a tenda zwenezwi vha ḓo ḓiphiṋa nga vhutshilo kha ḽifhasi nga hu sa fheli.​—Vhalani Yohane 3:16.