Mudzimu u ramba vhathu vha tshaka dzoṱhe uri vha sendele tsini nae nga thabelo. (Phisalema 65:2) Fhedzi ha thetshelesi kana u ṱanganedza thabelo dzoṱhe. Sa tsumbo, thabelo dza munna a sa fari zwavhuḓi mufumakadzi wawe dzi nga thivhelwa. (1 Petro 3:7) Zwiṅwe hafhu, musi Vhaisiraele vha tshi bvela phanḓa na u ita zwivhi, Mudzimu ho ngo thetshelesa thabelo dzavho. Zwi khagala uri thabelo ndi ndugelo. Mudzimu u ḓo thetshelesa na thabelo dza muthu o ita zwivhi zwihulwane, arali o rembuluwa.​—Vhalani Yesaya 1:15; 55:7.

Ṱalelani vidio ine ya ri, Naa Mudzimu U Thetshelesa Thabelo Dzoṱhe?

Thabelo ndi tshipiḓa tsha vhurabeli hashu, nga zwenezwo ri tea u rabela Yehova fhedzi ane a vha Musiki washu. (Mateo 4:10; 6:9) Samusi ri tshi khakha, ri tea u rabela dzinani ḽa Yesu ngauri o fela zwivhi zwashu. (Yohane 14:6) Yehova ha ṱoḓi uri ri dovholole thabelo dze ra dzi rwela ngomani kana dze ra tou dzi ṅwala. U ṱoḓa uri ri rabele zwi tshi bva mbiluni.​—Vhalani Mateo 6:7; Vhafilipi 4:6, 7.

Musiki washu u a pfa na thabelo dzashu na musi ri tshi rabelela mbiluni. (1 Samuele 1:12, 13) U ri ramba uri ri rabele tshifhinga tshoṱhe, musi ḓuvha ḽi tshi ṱavha na musi ḽi tshi kovhela, musi ri tshi ḽa zwiḽiwa na musi ri na thaidzo.​—Vhalani Phisalema 55:22; Mateo 15:36.

A zwo ngo leluwa u sendela tsini na Mudzimu ngauri ri tshila vhukati ha vhathu vha si na lutendo kha Mudzimu na vhane vha si tende uri zwe Mudzimu a zwi fhulufhedzisa zwi  ḓo itea. (2 Timotheo 3:1, 4; 2 Petro 3:3, 13) Nga zwenezwo, ri tea u kuvhangana na vhatendi nga riṋe u itela u ṱuṱuwedzana.​—Vhalani Vhahevheru 10:24, 25.

U konana na vhathu vhane vha funa Mudzimu zwi ri thusa uri ri sendele tsini na Mudzimu. Miṱangano ya Ṱhanzi dza Yehova i ri ṋea zwibuli zwavhuḓi zwa u ṱuṱuwedzana lutendoni.​—Vhalani Vharoma 1:11, 12.

Ni nga sendela tsini na Yehova nga u elekanya nga ha zwe na zwi guda Ipfini ḽawe. Elekanyani nga ha zwine na nga zwi guda kha mishumo yawe, nyeletshedzo dzawe na zwe a zwi fhulufhedzisa. U rabela na u elekanya zwi ri thusa uri ri dzhiele nṱha nḓila ine Mudzimu a ri funa ngayo na vhuṱali hawe.​—Vhalani Yoshua 1:8; Phisalema 1:1-3.

Ni nga sendela tsini na Mudzimu arali fhedzi ni tshi mu fhulufhela, ni na lutendo khae. Fhedzi lutendo lu fana na tshithu tshi tshilaho tshine tsha tea u ṱhogomelwa. Ni fanela u kanzwa lutendo lwaṋu tshifhinga tshoṱhe nga u elekanya nga ha zwine zwa ita uri ni vhe na lutendo.​—Vhalani Mateo 4:4; Vhahevheru 11:1, 6.

Yehova u na ndavha na vhane vha mu funa. A nga vha tsireledza kha tshiṅwe na tshiṅwe tshine tsha nga tshinya lutendo lwavho na fhulufhelo ḽavho ḽa u wana vhutshilo vhu sa fheli. (Phisalema 91:1, 2, 7-10) U ri sevha nga ha matshilele ane a nga vhea mutakalo washu khomboni na u ita uri ri si takale. Yehova u ri funza nḓila ya khwine ya vhutshilo.​—Vhalani Phisalema 73:27, 28; Yakobo 4:4, 8.